Kerala Local Body Election Result LIVE:നാട്ടിലും നഗരത്തിലും മിന്നി യുഡിഎഫ്, തിരുവനന്തപുരത്ത് എൻഡിഎ തേരോട്ടം, കോര്‍പ്പറേഷൻ പിടിച്ചെടുത്തു

എസ്എഫ്ഐ മുൻ സെക്രട്ടറി പിഎം ആർഷോയുടെ വാർഡിൽ യുഡിഎഫ് സ്ഥാനാര്‍ത്ഥി ജയിച്ചു. പാലക്കാട് തച്ചമ്പാറ ആറാം വാർഡ് പിച്ചളമുണ്ട വാർഡിൽ 64 വോട്ടിനാണ് യുഡിഎഫ് സ്ഥാനാർത്ഥി ജയിച്ചത്.

ഷാഫി പറമ്പിൽ എംപിയുടെ വീട് സ്ഥിതി ചെയ്യുന്ന പാലക്കാട് ഓങ്ങല്ലൂർ പഞ്ചായത്തിലെ 13-ാം വാർഡിൽ എസ്ഡിപിഐ സ്ഥാനാർത്ഥിയ്ക്ക് ജയം. അനില അശോകൻ 248 വോട്ടിന്റെ ഭൂരിപക്ഷത്തിൽ വിജയിച്ചു.

തലസ്ഥാന കോർപ്പറേഷൻ ഇനി ബിജെപി ഭരിക്കും. നാല് പതിറ്റാണ്ടായി തുടരുന്ന ഇടതുകോട്ട തകർത്താണ് അമ്പത് സീറ്റുമായി ബിജെപി തിരുവനന്തപുരം കോർപ്പറേഷൻ പിടിച്ചത്. അതേസമയം, സീറ്റ് ഇരട്ടിയാക്കി യുഡിഎഫ് വൻ മുന്നേറ്റമുണ്ടാക്കി.

തിരുവനന്തപുരം കോർപ്പറേഷനിൽ ബിജെപി-എൻ‌ഡി‌എ സഖ്യത്തിന് ലഭിച്ച ഭൂരിപക്ഷം കേരള രാഷ്ട്രീയത്തിലെ ഒരു നിർണായക നിമിഷമാണെന്ന് പ്രധാനമന്ത്രി നരേന്ദ്രമോദി. 'നന്ദി തിരുവനന്തപുരം' എന്നാണ് പ്രധാനമന്ത്രി എക്സിൽ കുറിച്ചത്.

ജനങ്ങൾ സർക്കാരിനെ നിർത്തി പൊരിച്ചുവെന്നും മുഖ്യമന്ത്രിക്കും സർക്കാരിനെതിരായ വിധിയെഴുത്താണെന്നും ഷാഫി പറമ്പിൽ എംപി. സർക്കാരിൻ്റെ വിലയിരുത്തലെന്ന് മുഖ്യമന്ത്രി തന്നെ പറഞ്ഞിട്ടുണ്ട്. എല്ലായിടങ്ങളിലും യുഡിഎഫിനു മുന്നേറ്റം ഉണ്ടായി. അധികാരത്തിലിരിക്കുന്നവരേക്കാൾ ശക്തി ജനങ്ങൾക്കാണെന്ന് തെളിഞ്ഞു.

തദ്ദേശ തെരഞ്ഞെടുപ്പിലെ യുഡിഎഫിൻ്റെ മികച്ച വിജയത്തിൽ പ്രതികരണവുമായി കോൺ​ഗ്രസ് നേതാവ് രാഹുൽ ഗാന്ധി. യുഡിഎഫിൽ വിശ്വാസമർപ്പിച്ചതിന് കേരളത്തിലെ ജനങ്ങൾക്ക് സല്യൂട്ട് എന്ന് രാഹുൽ ​ഗാന്ധി പറഞ്ഞു. ഈ ഫലം യുഡിഎഫിൽ വളർന്നുവരുന്ന ആത്മവിശ്വാസത്തിന്റെ വ്യക്തമായ സൂചനയാണ്. നിയമസഭാ തിരഞ്ഞെടുപ്പ് തൂത്തുവാരും. വിജയം സാധ്യമാക്കിയ നേതാക്കൾക്കും പ്രവർത്തകർക്കും നന്ദിയുണ്ടെന്നും രാഹുൽഗാന്ധി പറഞ്ഞു.

തൃശൂരില്‍ എല്‍ഡിഎഫിന്‍റെ അപ്രമാദിത്യത്തിന് കനത്ത തിരിച്ചടി നൽകി ജനവിധി. തൃശൂര്‍ കോര്‍പ്പറേഷന്‍ പത്തു വര്‍ഷത്തിന് ശേഷം വ്യക്തമായ ഭൂരിപക്ഷത്തോടെ യുഡിഎഫ് തിരിച്ചുപിടിച്ചു. മുപ്പത്തിമൂന്നു ഡിവിഷനുകളില്‍ വ്യക്തമായ ആധിപത്യത്തോടെയാണ് യുഡിഎഫ് തൃശൂരില്‍ അധികാരത്തിലെത്തുന്നത്. കുര്യച്ചിറയില്‍ യുഡിഎഫ് സ്ഥാനാര്‍ഥിയെ പരാജയപ്പെടുത്തി വിജയിച്ചു കയറിയത് യുഡിഎഫ് റിബല്‍ സ്ഥാനാർത്ഥിയാണ്. കോര്‍പ്പറേഷനില്‍ മത്സരിച്ച രണ്ട് കെപിസിസി സെക്രട്ടറിമാരില്‍ ജോണ്‍ ഡാനിയേല്‍ പാട്ടുരായ്ക്കലില്‍ എന്‍ഡിഎ സ്ഥാനാര്‍ഥിയോട് തോറ്റപ്പോള്‍ സിവില്‍ സ്റ്റേഷനില്‍ എ. പ്രസാദ് വിജയിച്ചു.

തദ്ദേശ തെരഞ്ഞെടുപ്പിലെ ഫലത്തിൽ നിന്നും സർക്കാർ പാഠങ്ങൾ പഠിക്കണമെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. എൽഡിഎഫ് തരംഗം ഉണ്ടാകുമെന്നായിരുന്നു പ്രതീക്ഷ. എന്നാൽ, തെരഞ്ഞെടുപ്പ് ഫലം എൽഡിഎഫിന് അനുകൂലമല്ലെന്നും ജനവിധിയെ മാനിക്കുന്നതായും ബിനോയ് വിശ്വം മാധ്യമങ്ങളോട് പറഞ്ഞു.

പത്തനംതിട്ട റാന്നി പെരുനാട് ഗ്രാമപഞ്ചായത്തിലെ ശബരിമല വാര്‍ഡിൽ എൽഡിഎഫിന് ടോസിലൂടെ വിജയം. ശബരിമല ക്ഷേത്രം സ്ഥിതി ചെയ്യുന്ന വാര്‍ഡിലാണ് എൽഡിഎഫ് അപ്രതീക്ഷിത വിജയം നേടിയത്. ഇവിടെ എൽഡിഎഫ് സ്ഥാനാര്‍ത്ഥിക്കും യുഡിഎഫ് സ്ഥാനാര്‍ത്ഥിക്കും തുല്യ വോട്ട് ലഭിച്ചതോടെ ടോസ് ഇട്ടാണ് വിജയിയെ തെരഞ്ഞെടുത്തത്. ടോസിൽ എൽഡിഎഫ് സ്ഥാനാര്‍ത്ഥി വിജയിക്കുകയായിരുന്നു. ബിജെപിയുടെ സിറ്റിങ് സീറ്റിലാണ് എൽഡിഎഫിന്‍റെ വിജയം.

തിരുവനന്തപുരം കോര്‍പ്പറേഷനിലെ എൽഡിഎഫിന്‍റെ കനത്ത തോൽവിയിൽ മേയര്‍ ആര്യാ രാജേന്ദ്രനെതിരെ രൂക്ഷ വിമര്‍ശനവുമായി മുൻ സിപിഎം കൗണ്‍സിലര്‍ ഗായത്രി ബാബു. ഫേസ്ബുക്കിലൂടെയാണ് വിമര്‍ശനം. ജനകീയത ഇല്ലാതാക്കിയത് തിരിച്ചടിയായെന്നും കരിയര്‍ ബിൽഡിങിനുള്ള കോക്കസാക്കി സ്വന്തം ഓഫീസിനെ മേയര്‍ മാറ്റിയെന്നും പാർട്ടിയെക്കാൾ വലുതെന്ന ഭാവവും അധികാരത്തിൽ താഴെയുള്ളവരോടുള്ള പുച്ഛവും വിനയായെന്നുമാണ് ഗായത്രി ബാബുവിന്‍റെ വിമര്‍ശനം. എൽഡിഎഫിന്‍റെ കനത്ത തിരിച്ചടിക്ക് പിന്നാലെയാണ് മേയറുടെ പേരോ സ്ഥാനമോ എടുത്തു പറയാതെയുള്ള വിമര്‍ശനം. മേയര്‍ ആര്യാ രാജേന്ദ്രന്‍റെ ഭരണസമിതിയിൽ വഞ്ചിയൂര്‍ വാര്‍ഡിൽ നിന്നുള്ള കൗണ്‍സിലറായിരുന്നു ഗായത്രി ബാബു. ഫേസ്ബുക്ക് പോസ്റ്റ് പിന്നീട് പിൻവലിച്ചെങ്കിലും രൂക്ഷ വിമര്‍ശനമാണ് നടത്തുന്നത്.

സിപിഐ വിട്ട് കോൺ​ഗ്രസില്‍ ചേര്‍ന്ന് മത്സരിച്ച ശ്രീനാദേവി കുഞ്ഞമ്മ വിജയിച്ചു. 196 വോട്ടിന്‍റെ ഭൂരിപക്ഷത്തിലാണ് പത്തനംതിട്ട ജില്ലാ പഞ്ചായത്ത് പള്ളിക്കൽ ഡിവിഷനിലെ കോൺ​ഗ്രസി സ്ഥാനാർത്ഥിയായ ശ്രീനാദേവി കുഞ്ഞമ്മ ജയിച്ചത്.

തദ്ദേശ തെരഞ്ഞെടുപ്പിൽ വർഗ്ഗീയതയാണ് ഇടത് മുന്നണിയുടെ തോൽവിക്ക് കാരണമെന്ന് പ്രതിപക്ഷ നേതാവ് വിഡി സതീശൻ. നിയമസഭ തെരഞ്ഞെടുപ്പിൽ ചർച്ച ചെയ്ത അജണ്ടയാണ് തദ്ദേശ ഫലം. നിയമസഭാ തെരഞ്ഞെടുപ്പിൽ തിളക്കമാർന്ന ജയം ഉണ്ടായില്ലെങ്കിൽ രാഷ്ട്രീയ വനവാസം തന്നെയെന്നും പ്രതിപക്ഷ നേതാവ് വാർത്താസമ്മേളനത്തിൽ പറഞ്ഞു.

തിരുവനന്തപുരത്ത് കോൺഗ്രസ് വലിയമുന്നേറ്റം നിർത്തിയെന്നും എൽഡിഎഫിന്‍റെ ഭരണപരാജയമാണ് തിരുവനന്തപുരത്ത് ബിജെപിയെ സഹായിച്ചതെന്നും കെപിസിസി അധ്യക്ഷൻ സണ്ണി ജോസഫ് പറഞ്ഞു. എല്ലാ ത്രിതല പഞ്ചായത്തിലും വൻ വിജയമാണ് നേടിയത്. സർക്കാരിനെതിരായവിധി എഴുത്താണിത്. ശബരിമലസ്വർണ കൊള്ള ജനകീയമായി അവതരിപ്പിച്ചു.

യു ഡി എഫിന്‍റെ തരംഗമാണ് കേരളത്തിൽ ഉണ്ടായതെന്നും ജനങ്ങളോട് നന്ദിയുണ്ടെന്നും യു.ഡി.എഫ് കണ്‍വീനര്‍ അടൂര്‍ പ്രകാശ് പറഞ്ഞു. ഓരോ ഘട്ടത്തിലും വേണ്ട നിർദേശങ്ങൾ നൽകി. കൂട്ടായ പ്രവര്‍ത്തനമാണ് വിജയത്തിന് കാരണമായത്. താഴെ തട്ടിലും യോഗങ്ങൾ വിളിക്കാൻ നിർദേശം നൽകിയിരുന്നു. അതിന്‍റെ ഫലം തെരഞ്ഞെടുപ്പിൽ കണ്ടു. കേരളത്തിലെ ജനങ്ങൾക്ക് നന്ദി അറിയിക്കുകയാണ്. മാധ്യമങ്ങളോടും നന്ദിയുണ്ട്. ശബരിമല വിഷയം എല്ലാ ജില്ലയിലും ഉയർത്തി വലിയ പ്രചാരണം നടത്തി. അതിൽ നിന്ന് യു ഡി എഫ് പിന്നോട്ടുപോകില്ല. സ്വർണ്ണ കൊള്ളയ്ക്ക് കൂട്ടു നിന്നവരും ജയിലിലേക്ക് പോകേണ്ടി വരും. ജനങ്ങൾ നടത്തിയ വിലയിരുത്തലിന്‍റെ ഫലമാണ് ഇത്. മുഖ്യമന്ത്രിയുടെ തെരഞ്ഞെടുപ്പ് ദിവസത്തെ പരാമർശം ജനം തള്ളിയെന്നും അടൂര്‍ പ്രകാശ്

വിവാദ പരാമർശവുമായി മുതിർന്ന സിപിഎം നേതാവ് എംഎം മണി. ജനങ്ങൾ ആനുകൂല്യങ്ങൾ കൈപ്പറ്റി പണി തന്നെന്നാണ് എംഎം മണിയുടെ വിവാദ പരാമർശം. തദ്ദേശ തെര‍ഞ്ഞെടുപ്പ് ഫലം അവസാന ഘട്ടത്തിലേക്ക് എത്തുമ്പോൾ എൽഡിഎഫ് കനത്ത തിരിച്ചടി നേരിടുന്ന സാഹചര്യത്തിലാണ് എംഎം മണിയുടെ പ്രതികരണം.

ജനം പ്രബുദ്ധരാണെന്നും എത്ര ബഹളം വെച്ചാലും അവർ കേൾക്കേണ്ടത് കേൾക്കുക തന്നെ ചെയ്യുമെന്നുമാണ് രാഹുൽ മാങ്കൂട്ടത്തിലിന്റെ പ്രതികരണം. ഫേസ്ബുക്ക് പേജിലൂടെയാണ് രാഹുൽ പ്രതികരണം നടത്തിയത്.

യുഡിഎഫിനുണ്ടായ വിജയം താൽക്കാലികമാണെന്നും എൽഡിഎഫിന്റെ അഴിമതിക്കും ശബരിമലയിൽ ചെയ്ത ദ്രോഹത്തിനും ഉള്ള മറുപടിയാണിതെന്നുംബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ. പിന്തുണ നൽകിയ വോട്ടർമാർക്കും അദ്ദേഹം നന്ദി അറിയിച്ചു.

സിപിഐയിൽ നിന്ന് കോൺഗ്രസിലെത്തി മത്സരിച്ച ശ്രീനാ ദേവി കുഞ്ഞമ്മ തോറ്റു. പത്തനംതിട്ട ജില്ലാ പഞ്ചായത്ത് പള്ളിക്കൽ ഡിവിഷൻ സ്ഥാനാർത്ഥി ആയിരുന്നു. സിപിഐ സ്ഥാനാർത്ഥി ശ്രീലത രമേശാണ് ഇവിടെ വിജയിച്ചത്.

തിരുവനന്തപുരത്ത് എൻഡിഎ തേരോട്ടം, കോര്‍പ്പറേഷൻ പിടിച്ചെടുത്തു, നാട്ടിലും നഗരത്തിലും മിന്നി യുഡിഎഫ്, എൽഡിഎഫിന് നിരാശ

50 ഇടത്ത് എൻഡിഎ

26 ഇടത്ത് എൽഡിഎഫ്

19 ഇടത്ത് യുഡിഎഫ്

മറ്റുള്ളവർ 2

കോഴിക്കോട് കോര്‍പ്പറേഷനില്‍ ശക്തമായ പോരാട്ടം. ആര്‍ക്കും കേവല ഭൂരിപക്ഷമില്ല. 30 സീറ്റുകളില്‍ എൽഡിഎഫ് മുന്നിട്ട് നില്‍ക്കുമ്പോൾ 29 ഇടത്ത് യുഡിഎഫ്. 13 ഇടത്ത് എൻഡിഎ.

തിരുവനന്തപുരം കോര്‍പ്പറേഷനിലെ കവടിയാർ സ്ഥാനാർത്ഥി കെഎസ് ശബരിനാഥൻ വിജയിച്ചു.  74 വോട്ടിന്‍റെ ഭൂരിപക്ഷമാണ് ശബരിനാഥൻ നേടിയത്. 

സിപിഎം തിരുവനന്തപുരം ജില്ലാ സെക്രട്ടറി വി ജോയി എംഎല്‍എയുടെ പഞ്ചായത്തിൽ ബിജെപി ഭരണം. അഴൂർ ഗ്രാമപഞ്ചായത്ത് ഇനി ബിജെപി നയിക്കും. അഴൂർ പഞ്ചായത്തിൽ 9 സീറ്റ് നേടി ഏറ്റവും വലിയ ഒറ്റകക്ഷിയായിരിക്കുന്നു.

വയനാട് വെള്ളമുണ്ട പഞ്ചായത്തില്‍ വിജയിച്ച് യുഡിഎഫ്. എൽഡിഎഫ് ഭരിച്ചിരുന്ന പഞ്ചായത്ത് യുഡിഎഫ് അട്ടിമറിച്ചു. 16 സീറ്റുകളിലാണ് യുഡിഎഫ് വിജയിച്ചത്. എൽഡിഎഫിന് 7 സീറ്റ് മാത്രമാണ് ലഭിച്ചത്. സിപിഎം ജില്ലാ സെക്രട്ടറി കെ റഫീഖിൻ്റെ വീട് ഉൾപ്പെടുന്ന വാർഡ് അടക്കം യുഡിഎഫ് വിജയിച്ചു. 

പാലക്കാട് നഗരസഭയില്‍ രാഹുൽ മാങ്കൂടത്തിലിൻ്റെ കുന്നത്തൂർമേട് വാർഡിൽ കോൺഗ്രസിന് ജയം. യുഡിഎഫ് സ്ഥാനാർത്ഥി പ്രശോഭ് ജയിച്ചത് 8 വോട്ടിന്.

മുന്‍ വടക്കാഞ്ചേരി എംഎല്‍എ അനില്‍ അക്കരെ അടാട്ട് ഗ്രാമ പഞ്ചായത്തില്‍ വിജയിച്ചു.

പത്തനംതിട്ട ജില്ലയിലെ മൂന്ന് നഗരസഭകളും യുഡിഎഫിന്. പത്തനംതിട്ട, അടൂർ, തിരുവല്ല നഗരസഭകളിൽ അധികാരത്തിലേക്ക്. പന്തളത്ത് മൂന്നുമുന്നണികളും ശക്തമായ പോരാട്ടം തുടരുന്നു

തിരുവനന്തപുരം കോര്‍പ്പറേഷനില്‍ 42 ഇടത്ത് എന്‍ഡിഎയുടെ തേരോട്ടം. 21 ഇടത്താണ് എല്‍ഡിഎഫ് ലീഡ്. 14 ഇടത്ത് യുഡിഎഫ് മുന്നില്‍.

ഒഞ്ചിയത്ത് വോട്ടെണ്ണല്‍ പൂര്‍ത്തിയായി. നാലാം തവണയും ആർഎംപി അധികാരത്തില്‍. 12 സീറ്റുകളാണ് നേടിയത്. എല്‍ഡിഎഫ് 7

4 കോര്‍പ്പറേഷനുകളിലും 53 മുന്‍സിപ്പാലിറ്റികളിലും 8 ജില്ലാ പഞ്ചായത്തുകളിലും 81 ബ്ലോക്ക് പഞ്ചായത്തുകളിലും 415 ഗ്രാമ പഞ്ചായത്തുകളിലും യുഡിഎഫ് മുന്നില്‍.

എറണാകുളം ജില്ലയിൽ യുഡിഎഫ് ആധിപത്യം. ജില്ലാ പഞ്ചായത്തിലും ബ്ലോക്കിലും മുൻസിപ്പാലിറ്റികളിലും ഗ്രാമപഞ്ചായത്തിലും യുഡിഎഫ് ബഹുദൂരം മുന്നിൽ.

തൃശൂർ കോർപറേഷൻ യുഡിഎഫിന്. ഫലം വന്ന ഡിവിഷനുകളിൽ 30 ഡിവിഷനിലും യുഡിഎഫ് ജയിച്ചു. യുഡിഎഫ് കേവല ഭൂരിപക്ഷം കടന്നു. 10 വാർഡുകളിൽ മാത്രമാണ് എൽഡിഎഫ് ജയിച്ചത്. എൻഡിഎ ഏഴ് ഡിവിഷനുകളിൽ ജയിച്ചു.പ്രതിപക്ഷത്തിനായുള്ള മത്സരത്തില്‍ എൽഡിഎഫും എൻഡിഎയും

കൊല്ലത്ത് എല്‍ഡിഎഫിന് പ്രഹരം. മേയര്‍ ഹണി ബെഞ്ചമിന് തോല്‍വി. യുഡിഎഫ് 15 ഇടത്തും എല്‍ഡിഎഫ് 11 ഇടത്തും എന്‍ഡിഎ 8 ഇടത്തും മുന്നില്‍

വർക്കല നഗരസഭയില്‍ 34 വാർഡുകളും എണ്ണിക്കഴിഞ്ഞപ്പോൾ 16 സീറ്റില്‍ എല്‍ഡിഎഫ് വിജയിച്ചു. ബിജെപി 6 സീറ്റില്‍. 10 സീറ്റില്‍ യുഡിഎഫ്. 2 ഇടത്ത് വിമതര്‍

കൊല്ലം കോര്‍പ്പറേഷനില്‍ 13 ഇടത്ത് യുഡിഎഫ്, 9 ഇടത്ത് എല്‍ഡിഎഫ്, 7 ഇടത്ത് എന്‍ഡിഎ മുന്നേറ്റം

തിരുവനന്തപുരം കോര്‍പ്പറേഷനില്‍ 30 ഇടത്ത് എന്‍ഡിഎ മുന്നില്‍. 19 ഇടത്ത് എല്‍ഡിഎഫ്. 14 ഇടത്ത് യുഡിഎഫ്

കൊടുങ്ങാനൂരില്‍ എന്‍ഡിഎ സ്ഥാനാ‍ത്ഥി വി വി രാജേഷ് ജയിച്ചു. 507 വോട്ടിന്‍റെ ലീഡാണ് വിവി രാജേഷിന്.

പാലക്കാട് രണ്ട് നഗരസഭകൾ തിരിച്ച് പിടിച്ച് യുഡിഎഫ്. പട്ടാമ്പിയും ചിറ്റൂരും യുഡിഎഫ് ഭരണം. മണ്ണാർക്കാട് നിലനിർത്തി.

എറണാകുളം ജില്ലയിൽ യുഡിഎഫിന്‍റെ വൻ മുന്നേറ്റം. ജില്ലാ പഞ്ചായത്തിൽ 24 ഡിവിഷനുകളിൽ യുഡിഎഫ് ലീഡ്. രണ്ടിടത്ത് ഒതുങ്ങി എൽഡിഎഫ്. രണ്ടിടത്ത് ട്വന്‍റി 20

നഗരസഭ ലീഡ്

യുഡിഎഫ് ഭരിക്കുന്ന ഫറോക്ക് നഗരസഭ - യുഡിഎഫ് മുന്നിൽ

യുഡിഎഫ് ഭരിക്കുന്ന കൊടുവള്ളി നഗരസഭ - യുഡിഎഫ് മുന്നിൽ

എല്‍ഡിഎഫ് ഭരിക്കുന്ന കൊയിലാണ്ടി നഗരസഭ - യുഡിഎഫ് മുന്നിൽ

എല്‍ഡിഎഫ് ഭരിക്കുന്ന മുക്കം നഗരസഭ - എല്‍ഡിഎഫ് മുന്നിൽ

യുഡിഎഫ് ഭരിക്കുന്ന പയ്യോളി നഗരസഭ - യുഡിഎഫ് മുന്നിൽ

യുഡിഎഫ് ഭരിക്കുന്ന രാമനാട്ടുകര നഗരസഭ - യുഡിഎഫ് മുന്നിൽ

എൽഡിഎഫ് ഭരിക്കുന്ന വടകര നഗരസഭ - എല്‍ഡിഎഫ് മുന്നിൽ

ഒഞ്ചിയത്ത് ആർഎംപി മുന്നണി അധികാരം നിലനിർത്തി. 9 സീറ്റിൽ ജനകീയ മുന്നണി ജയിച്ചു. 3 സീറ്റിൽ മുന്നിലാണ്. 5 സീറ്റില്‍ എല്‍ഡിഎഫ് വിജയിച്ചു.