ആലപ്പുഴ റെയിൽവെ സ്റ്റേഷനിൽ വീഴ്ച; 3 ട്രാക്കിലും ഒരേ സമയം കോച്ചുകൾ നിർത്തി, സ്റ്റേഷൻ മാസ്റ്റർക്ക് സസ്പെൻഷൻ

ആലപ്പുഴ വഴിയുള്ള ആറോളം ട്രെയിനുകൾ വൈകിയെന്നാണ് വിവരം. റെയിൽവെ ഉദ്യോഗസ്ഥർ ഇതേക്കുറിച്ച് പ്രതികരിക്കാൻ തയ്യാറായില്ല

ആലപ്പുഴ: ആലപ്പുഴ റെയിൽവെ സ്റ്റേഷനിലെ സ്റ്റേഷൻ മാസ്റ്ററെ സർവീസിൽ നിന്ന് സസ്പെന്റ് ചെയ്തു. മൂന്ന് ട്രാക്കിലും കോച്ചുകൾ നിർത്തിയതിന്റെ പശ്ചാത്തലത്തിലാണ് സ്റ്റേഷൻ മാസ്റ്റർ കെ എസ് ബിനോദിനെ സസ്പെന്റ് ചെയ്തു. എഞ്ചിനുകൾ മാറ്റുന്ന ഷണ്ടിംഗ് നടപടികൾക്കായാണ് ആകെയുള്ള മൂന്ന് ട്രാക്കിലും ഇന്ന് രാവിലെ ആറരയോടെ കോച്ചുകൾ നിർത്തിയിട്ടത്. ഇതിനിടെ മറ്റ് ട്രെയിനുകൾ സ്റ്റേഷൻ പരിധിക്ക് പുറത്ത് പ്രവേശനം ലഭിക്കാതെ കാത്തിരിക്കേണ്ടി വന്നു. ഇത് മൂലം വലിയ ഗതാഗത തടസം ഉണ്ടായി. ഏറനാട്, എറണാകുളം പാസഞ്ചർ എന്നിവ പിടിച്ചിട്ടു. ധൻബാദ് എക്സ്പ്രസ് ഒന്നര മണിക്കൂർ വൈകി. ആലപ്പുഴ വഴിയുള്ള ആറോളം ട്രെയിനുകൾ വൈകിയെന്നാണ് വിവരം. റെയിൽവെ ഉദ്യോഗസ്ഥർ ഇതേക്കുറിച്ച് പ്രതികരിക്കാൻ തയ്യാറായില്ല.

ഏഷ്യാനെറ്റ് ന്യൂസ് ലൈവ്