യാത്രക്കാരുടെ ശ്രദ്ധയ്ക്ക്; ആലുവയിൽ പാലത്തിൽ അറ്റകുറ്റപ്പണി, വന്ദേഭാരത് അടക്കമുള്ള ട്രെയിനുകള്‍ വൈകിയോടുന്നു, മെമു റദ്ദാക്കി

മംഗളൂരു-തിരുവനന്തപുരം വന്ദേഭാരത് ട്രെയിൻ അടക്കമുള്ളവയാണ് വൈകിയോടുന്നത്

തിരുവനന്തപുരം: ആലുവയിൽ റെയില്‍വെ പാലത്തിൽ അറ്റകുറ്റപ്പണി നടക്കുന്നതിനാൽ ഇന്ന് (ആഗസ്റ്റ് 3) ട്രെയിനുകള്‍ വൈകിയോടുന്നു. പാലക്കാട്-എറണാകുളം റൂട്ടിലെ മെമു ട്രെയിൻ സര്‍വീസ് ഇന്ന് റദ്ദാക്കി. പാലം അറ്റകുറ്റപ്പണിയുള്ളതിനാൽ ഈ റൂട്ടിലെ ട്രെയിൻ സര്‍വീസിന് നിയന്ത്രണമുണ്ടാകുമെന്ന് റെയില്‍വെ അറിയിച്ചു. 

പാലം അറ്റകുറ്റപ്പണി തുടരേണ്ടതിനാൽ ആഗസ്റ്റ് പത്തിനും ട്രെയിൻ സര്‍വീസിന് നിയന്ത്രണമുണ്ടാകും. ഇന്നത്തെ മംഗളൂരു-തിരുവനന്തപുരം വന്ദേഭാരത് ട്രെയിൻ അടക്കമുള്ളവയാണ് വൈകിയോടുന്നത്. മംഗളൂരു-തിരുവനന്തപുരം വന്ദേഭാരത് 25 മിനുട്ട് വൈകിയായിരിക്കും എത്തുക. ഇതിനാൽ വൈകിട്ട് 4.05ന് പുറപ്പെടേണ്ട തിരുവനന്തപുരം-മംഗളൂരു വന്ദേഭാരത് പത്തു മിനുട്ട് വൈകി 4.15നായിരിക്കും പുറപ്പെടുക.

ഇന്ന് റദ്ദാക്കിയ ട്രെയിനുകള്‍

• പാലക്കാട്-എറണാകുളം മെമു (66609)
• എറണാകുളം- പാലക്കാട് മെമു (66610)
  (ആഗസ്റ്റ് പത്തിനും മെമു ട്രെയിൻ സര്‍വീസ് റദ്ദാക്കും)

വൈകിയോടുന്ന ട്രെയിനുകള്‍

• ഗൊരഖ്പുര്‍ -തിരുവനന്തപുരം സെന്‍ട്രൽ എക്സ്പ്രസ് ഒരു മണിക്കൂര്‍ 20 മിനുട്ട് വൈകിയോടുന്നു (12511)
• കണ്ണൂര്‍- ആലപ്പുഴ എക്സിക്യൂട്ടീവ് എക്സ്പ്രസ് ഒന്നേകാൽ മണിക്കൂര്‍ വൈകിയോടുന്നു (16308)
• മംഗളൂരു സെന്‍ട്രൽ -തിരുവനന്തപുരം സെന്‍ട്രൽ വന്ദേഭാരത് (20631)
• തിരുവനന്തപുരം സെന്‍ട്രൽ -മംഗളൂരു സെന്‍ട്രൽ വന്ദേഭാരത് (20632)
• സെക്കന്തരാബാദ് -തിരുവനന്തപുരം ശബരി എക്സ്പ്രസ് (17230)
• ജാംനഗര്‍-തിരുനെൽവേലി എക്സ്പ്രസ് (19578)