പ്രതിഷേധം തുടർന്നതോടെ വഴങ്ങി പൊലീസ്, ജ‍ഡ്ജിയുടെ മകനായ 17കാരനെതിരെ വീണ്ടും നടപടി; ജുവനൈയിൽ ജസ്റ്റിസ് ബോർഡിന് മുന്നിൽ ഹാജരാക്കും

ചേരാനല്ലൂരിൽ അമിതവേഗതയിൽ കാറിടിച്ച് സ്കൂട്ടർ യാത്രക്കാരൻ മരിച്ച കേസിൽ 17കാരനെതിരെ പൊലീസ് വീണ്ടും നടപടിയെടുത്തു. കുടുംബത്തിൻ്റെയും നാട്ടുകാരുടെയും ശക്തമായ പ്രതിഷേധത്തെ തുടർന്നാണ് സ്റ്റേഷൻ ജാമ്യത്തിലായിരുന്ന പ്രതിയെ വീണ്ടും കസ്റ്റഡിയിലെടുത്തത്. പ്രതിയെ ജുവനൈൽ ജസ്റ്റിസ് ബോർഡിന് മുന്നിൽ ഹാജരാക്കും.

കൊച്ചി: ചേരാനല്ലൂർ വാഹനാപകടക്കേസിൽ പ്രതിയായ 17കാരനെതിരെ വീണ്ടും നടപടിയുമായി പൊലീസ്. കുടുംബവും നാട്ടുകാരും വിവിധ സംഘടനകളും പൊലീസ് സ്റ്റേഷന് മുന്നിൽ നടത്തിയ പ്രതിഷേധങ്ങൾക്ക് ഒടുവിലാണ് നടപടികളിലേക്ക് പൊലീസ് കടന്നത്. സ്റ്റേഷൻ ജാമ്യത്തിൽ ഇറങ്ങിയ 17കാരനെ വീണ്ടും അപ്രിഹെൻഡ് ചെയ്തു. മുതിർന്നവരുടെ അറസ്റ്റിനു തുല്യമായ പ്രോസസ് ആണ് ഇത്. ഇപ്പോൾ തന്നെ പ്രതിയെ ജുവനൈയിൽ ജസ്റ്റിസ് ബോർഡിനു മുന്നിൽ ഹാജരാക്കും.

അപ്രിഹെൻഡ് ചെയ്തില്ലെങ്കിൽ സ്റ്റേഷന് മുന്നിൽ നിന്ന് പോകില്ലെന്ന് കുടുംബം നിലപട് എടുത്തിരുന്നു. അർദ്ധരാത്രിയിലും പ്രതിഷേധം തുടരും എന്നു കണ്ടതോടെയാണ് പൊലീസ് അതിവേഗ നടപടികളിലേക്ക് കടന്നത്. ജുവനൈയിൽ ജസ്റ്റിസ് ബോർഡിന്‍റെ തീരുമാനം എന്താണെന്ന് അറിഞ്ഞ ശേഷം പൊലീസ് സ്റ്റേഷന് മുന്നിൽ നിന്ന് പിരിഞ്ഞുപോകാമെന്ന് കുടുംബാംഗങ്ങൾ വ്യക്തമാക്കി. വാഹന ഉടമയ്ക്കെതിരെ കേസെടുക്കണമെന്നും കുടുബം ആവശ്യം ഉയർത്തിയിട്ടുണ്ട്.

നേരത്തെ, ചേരാനല്ലൂർ വാഹനാപകടക്കേസിൽ പ്രതിയായ 17 കാരനെ ജാമ്യം നൽകി വിട്ടയച്ചതിലെ പ്രതിഷേധത്തിനിടെ മരിച്ച ജയബാലകൃഷ്ണന്‍റെ മകൾ തളർന്നുവീണിരുന്നു. ഇവരെ ആശുപത്രിയിലേക്ക് മാറ്റി. ചേരാനല്ലൂർ പൊലീസ് സ്റ്റേഷന് മുൻപിൽ മകളടക്കമുള്ള കുടുംബാംഗങ്ങൾ കുത്തിയിരിന്ന് പ്രതിഷേധിക്കുകയായിരുന്നു. ഇതിനിടെയാണ് മകൾ തള‍ർന്നുവീണത്. അതേസമയം, വാഹനാപകടം സംബന്ധിച്ച് കൂടുതൽ വിവരങ്ങൾ പുറത്ത് വന്നു. കേസിൽ പ്രതിയായ 17കാരൻ ഓടിച്ച കാർ അമിത വേഗത്തിലായിരുന്നു എന്ന് പൊലീസ് വ്യക്തമാക്കി. 104 കിലോമീറ്റർ സ്പീഡിൽ ആണ് കാര്‍ ഓടിച്ചതെന്നാണ് നിഗമനം. വേഗതയുടെ ദൃശ്യങ്ങൾ 17കാരരന്‍റെ മൊബൈലിൽ കണ്ടെത്തി. പ്രതിക്കെതിരെ 181,183 മോട്ടോർ ആക്ട് ചുമത്തിയിട്ടുണ്ട്. ലൈസൻസ് ഇല്ലാതെ വാഹനം ഓടിച്ചു, അമിതവേഗതിയിൽ വാഹനം ഓടിച്ചു എന്നിവയാണ് വകുപ്പുകൾ.

ഞായറാഴ്ച പുലർച്ചെയാണ് ജഡ്ജിയുടെ മകനായ 17 കാരൻ ഓടിച്ച ബെൻസ് കാറിടിച്ച് സ്കൂട്ടർ യാത്രക്കാരനായ മ‍ഞ്ഞാലി സ്വദേശി ജയബാലകൃഷ്ണൻ(55) മരിച്ചത്. അപകടത്തിന് പിന്നാലെ 17 കാരനെ പൊലീസ് കസ്റ്റഡിയിലെടുത്തിരുന്നു. ഞായറാഴ്ച വൈകിട്ടോടെ 17 കാരനെ സ്റ്റേഷൻ ജാമ്യത്തിൽ വിട്ടയക്കുകയുംചെയ്തു. ഇത് വിവാദമായതോടെയാണ് ആഭ്യന്തരമന്ത്രി രമേശ് ചെന്നിത്തല അടിയന്തര നടപടിക്ക് നിർദേശം നൽകിയത്. അപകടത്തിൽ നിയമം അനുശാസിക്കുന്ന ശിക്ഷ ഉറപ്പാക്കുമെന്ന് ആഭ്യന്തരമന്ത്രി പ്രസ്താവന നടത്തി മണിക്കൂറുകൾക്കുള്ളിലാണ് 17 കാരന് ജാമ്യം ലഭിച്ചത്.