കാലിക്കറ്റ് സർവകലാശാല ക്യാമ്പസിലെ സംഘർഷം യുഡിഎസ്എഫ്, എസ്എഫ്ഐ പ്രവർത്തകർ അറസ്റ്റിൽ

എംഎസ്എഫ് പ്രവർത്തകരെ ക്യാമ്പസിൽ അക്രമിച്ച സംഭവത്തിലാണ് എസ്എഫ്ഐ പ്രവർത്തകനെ അറസ്റ്റ് ചെയ്തത്.

മലപ്പുറം: കാലിക്കറ്റ് സർവകലാശാല ക്യാമ്പസിലെ സംഘർഷവുമായി ബന്ധപ്പെട്ട് യുഡിഎസ്എഫ്, എസ്എഫ്ഐ പ്രവർത്തകരെയും പൊലീസ് അറസ്റ്റ് ചെയ്തു. യുഡിഎസ്എഫ് പ്രവർത്തകരായ എടപ്പാൾ സ്വദേശി ഷറഫുദ്ദീൻ പി., മുഹമ്മദ് ഫുഹാദ് കെ. പി., എസ്എഫ്ഐ പ്രവർത്തകനായ പെരുവള്ളൂർ സ്വദേശി മുഹമ്മദ് മിദ്ലാജ് എന്നിവരാണ് അറസ്റ്റിലായത്. അറസ്റ്റിലായ രണ്ട് യുഡിഎസ്എഫ് പ്രവർത്തകരും ആശുപത്രിയിൽ കയറി അക്രമം നടത്തിയവരാണ്.

എംഎസ്എഫ് പ്രവർത്തകരെ ക്യാമ്പസിൽ അക്രമിച്ച സംഭവത്തിലാണ് എസ്എഫ്ഐ പ്രവർത്തകനെ അറസ്റ്റ് ചെയ്തത്. എംഎസ്എഫ് പ്രവർത്തകൻ സുഫിയാന്റെ വീട്ടിലേക്ക് പെട്രോൾ ബോംബ് എറിഞ്ഞ സംഭവത്തിൽ രണ്ട് എസ്എഫ്ഐ പ്രവർത്തകർ കൂടി അറസ്റ്റിലായി. വളാഞ്ചേരി മുക്കിലപീടിക സ്വദേശി ഹനീൻ, വളാഞ്ചേരി മേച്ചേരിപ്പറമ്പ് സ്വദേശി അഭിഷേക് എന്നിവരെയാണ് കോട്ടക്കൽ പൊലീസ് അറസ്റ്റ് ചെയ്തത്.