ബിപിസിഎല് സ്വകാര്യവല്ക്കരിക്കരുത്; പ്രധാനമന്ത്രിക്ക് മുഖ്യമന്ത്രിയുടെ കത്ത്
Synopsis
സ്വകാര്യവല്ക്കരിക്കാന് കേന്ദ്രസര്ക്കാര് നടപടി ആരംഭിച്ചത് ജനങ്ങളില് വലിയ ഉത്ക്കണ്ഠ ഉളവാക്കി അഞ്ചുവര്ഷത്തിനിടയില് അരലക്ഷം കോടി രൂപയുടെ നിക്ഷേപമാണ് ബിപിസിഎല് നടത്തിയത് ദേശീയ താത്പര്യവും കേരളത്തിന്റെ പ്രത്യേക താത്പര്യവും കണക്കിലെടുക്കണമെന്ന് മുഖ്യമന്ത്രി
തിരുവനന്തപുരം: ഭാരത് പെട്രോളിയം കോര്പ്പറേഷന് ലിമിറ്റഡ് (ബിപിസിഎല്) സ്വകാര്യല്ക്കരിക്കാനുള്ള നീക്കം ഉപേക്ഷിക്കണമെന്ന് മുഖ്യമന്ത്രി പിണറായി വിജയന് പ്രധാനമന്ത്രി നരേന്ദ്രമോദിയോട് ആവശ്യപ്പെട്ടു. ലാഭകരമായി പ്രവര്ത്തിക്കുന്ന ഈ കമ്പനി പൊതുമേഖലയില് നിലനിര്ത്തേണ്ടത് രാജ്യതാത്പര്യമാണെന്ന് പ്രധാനമന്ത്രിക്കയച്ച കത്തില് മുഖ്യമന്ത്രി പറഞ്ഞു.
സ്വകാര്യവല്ക്കരിക്കാന് കേന്ദ്രസര്ക്കാര് നടപടി ആരംഭിച്ചത് ജനങ്ങളില് വലിയ ഉത്ക്കണ്ഠ ഉളവാക്കിയിരിക്കുകയാണ്. മുപ്പതിനായിരത്തിലേറെ സ്ഥിരം ജീവനക്കാരെയും കരാര് അടിസ്ഥാനത്തില് ജോലി ചെയ്യുന്നവരെയും ഈ നീക്കം ദോഷകരമായി ബാധിക്കും. കഴിഞ്ഞ അഞ്ചുവര്ഷത്തിനിടയില് അരലക്ഷം കോടി രൂപയുടെ നിക്ഷേപമാണ് ബിപിസിഎല് നടത്തിയത്.
ബിപിസിഎല്ലിന്റെ കാര്യത്തില് കേരളത്തിലെ ജനങ്ങള്ക്കും സര്ക്കാരിനും പ്രത്യേക താത്പര്യമുണ്ടെന്ന് മുഖ്യമന്ത്രി പറഞ്ഞു. ഇപ്പോള് ബിപിസിഎല്ലിന്റെ ഭാഗമായ കൊച്ചി റിഫൈനറി സ്ഥാപിച്ചത് കേരള സര്ക്കാര് കൂടി മുന്കയ്യെടുത്താണ്. റിഫൈനറിയില് കേരളത്തിന് അഞ്ച് ശതമാനം ഓഹരിയുണ്ടായിരുന്നു.
റിഫൈനറി ബിപിസിഎല് ഏറ്റെടുത്തപ്പോള് സംസ്ഥാനത്തിന്റെ ഓഹരി നിലനിര്ത്തുകയും ബോര്ഡില് ഒരു ഡയറക്ടറെ ഉള്പ്പെടുത്തുകയും ചെയ്തു. ബിപിസിഎല് അതിന്റെ ഉല്പാദനശേഷി വര്ധിപ്പിച്ചുപ്പോള് സംസ്ഥാന സര്ക്കാര് സാമ്പത്തികവും സാമ്പത്തികേതരവുമായ പിന്തുണ നല്കിയിട്ടുണ്ട്. കമ്പനിയുടെ ശേഷി വര്ധിക്കുമ്പോള് അധികമായി ലഭിക്കുന്ന വാറ്റ് വരുമാനം ദീര്ഘകാല വായ്പയായി കണക്കാക്കാനും സംസ്ഥാനം തയ്യാറായി. ഈ നിലയില് 1,500 കോടി രൂപയാണ് കേരളം ഈ പൊതുമേഖലാ കമ്പനിക്ക് വായ്പയായി നല്കാന് നിശ്ചയിച്ചത്. ഈ സഹായമെല്ലാം സംസ്ഥാന സര്ക്കാര് അനുവദിച്ചത് പൊതുമേഖലയിലുള്ള എണ്ണ ശുദ്ധീകരണശാല വികസിക്കണമെന്ന താല്പര്യത്തോടെയാണ്.
ബിപിസിഎൽ കൊച്ചി റിഫൈനറിക്ക് സമീപത്തായി വന്കിട പെട്രോകെമിക്കല് പാര്ക്ക് സ്ഥാപിക്കാന് സംസ്ഥാന സര്ക്കാര് തീരുമാനിച്ചിരിക്കുകയാണ്. കൊച്ചി റിഫൈനറിയിൽ ക്രൂഡ് ഓയില് സംസ്കരണം കഴിഞ്ഞ് ബാക്കി വരുന്ന പദാര്ത്ഥങ്ങളാണ് നിര്ദിഷ്ട പാര്ക്കില് ഉല്പാദനത്തിന് ആവശ്യമായി വരുന്നത്.
പെട്രോകെമിക്കല് കോംപ്ലക്സ് വഴി 25,000 കോടി രൂപയുടെ നിക്ഷേപമാണ് സംസ്ഥാനം ഈ മേഖലയില് പ്രതീക്ഷിക്കുന്നത്. ബിപിസിഎല്ലിന്റെ സ്വകാര്യവല്ക്കരണം കേരളത്തിന്റെ പദ്ധതിയെ അനിശ്ചിതത്വത്തിലാക്കുമെന്ന ആശങ്കയും മുഖ്യമന്ത്രി പ്രകടിപ്പിച്ചു. ദേശീയ താത്പര്യവും കേരളത്തിന്റെ പ്രത്യേക താത്പര്യവും കണക്കി ലെടുത്ത് സ്വകാര്യവല്ക്കരണ നടപടികള് നിര്ത്തിവയ്ക്കാന് ബന് പ്പെട്ടവര്ക്ക് നിര്ദേശം നല്കണമെന്നും മുഖ്യമന്ത്രി ആവശ്യപ്പെട്ടു.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam