വയോധികയ്ക്ക് പാമ്പുകടിയേറ്റു, ക്ഷേത്ര പുരയിടവും തൊട്ടടുത്ത മറ്റൊരു പുരയിടവും കാട് കയറിക്കിടക്കുന്നത് പ്രതിസന്ധിയെന്ന് നാട്ടുകാർ

കുട്ടമ്പേരൂർ കുന്നത്തൂർ ക്ഷേത്രത്തിന് കിഴക്ക് വീടിന് സമീപത്ത് വെച്ച് വയോധികയ്ക്ക് പാമ്പുകടിയേറ്റു

മാന്നാർ: കുട്ടമ്പേരൂർ കുന്നത്തൂർ ക്ഷേത്രത്തിന് കിഴക്ക് വീടിന് സമീപത്ത് വെച്ച് വയോധികയ്ക്ക് പാമ്പുകടിയേറ്റു. കുട്ടമ്പേരൂർ പതിനൊന്നാം വാർഡ് പുലരിയിൽ ഗീതമ്മ (65)യ്ക്കാണ് ഞായറാഴ്ച രാത്രി അണലിയുടെ കടിയേറ്റത്. വീടിന് സമീപത്തുള്ള കോൺക്രീറ്റ് റോഡിൽ വെച്ചാണ് ഗീതമ്മയുടെ കാൽ പാദത്തിൽ പാമ്പിന്‍റെ കടിയേറ്റത്. ഉടൻ തന്നെ പരുമലയിലെ സ്വകാര്യ ആശുപത്രിയിൽ പ്രവേശിപ്പിച്ചതിനാൽ അപകട നില തരണം ചെയ്തതായി ബന്ധുക്കൾ പറഞ്ഞു. ഈ ഭാഗത്തുള്ള കുന്നത്തൂർ ക്ഷേത്ര പുരയിടവും സ്വകാര്യ വ്യക്തിയുടെ ഉടമസ്ഥതയിലുള്ള പുരയിടവും കാട് കയറിക്കിടക്കുന്നതിനാൽ ഈ പ്രദേശം പാമ്പുകളുടെ ഭീതിയിലാണെന്ന് നാട്ടുകാർ ആരോപിച്ചു. കുന്നത്തൂർ ക്ഷേത്ര പുരയിടം കാടുവെട്ടിത്തെളിച്ച് വൃത്തിയാക്കാൻ ക്ഷേത്രം റിസീവർക്ക് കത്ത് നൽകിയതായി വാർഡ് മെമ്പറും മാന്നാർ ഗ്രാമപഞ്ചായത്ത് ക്ഷേമകാര്യ സമിതി അദ്ധ്യക്ഷയുമായ പുഷ്പ സുനിൽ അറിയിച്ചു.