നെടുമ്പാശേരി അപകടത്തിൽ പ്രതിക്കു വേണ്ടി ഇടപെട്ടെന്ന ആരോപണം; മറുപടിയുമായി എക്സൈസ് മന്ത്രി എം. ലിജു

നെടുമ്പാശേരി അപകടത്തിൽ പ്രതിയെ സഹായിച്ചെന്ന ഡിവൈഎഫ്ഐയുടെ ആരോപണം എക്സൈസ് മന്ത്രി എം. ലിജു പൂർണമായും തള്ളി. മദ്യപിച്ച് വാഹനമോടിച്ച പ്രതിക്ക് പരമാവധി ശിക്ഷ നൽകണമെന്നും അദ്ദേഹം വ്യക്തമാക്കി. ആരോപണങ്ങൾ അടിസ്ഥാനരഹിതമാണെന്ന് കോൺഗ്രസ് നേതാവ് എ.എ. ഷുക്കൂറും പ്രതികരിച്ചു.

ദില്ലി: നെടുമ്പാശ്ശേരി അപകടത്തിൽ ഇടപെട്ടു എന്ന ഡിവൈഎഫ്ഐയുടെ ആരോപണം പൂർണമായി നുണയാണെന്ന് എക്സൈസ് മന്ത്രി എം. ലിജു. സംഭവം ശ്രദ്ധയിൽപ്പെട്ടപ്പോൾ തന്നെ മദ്യം നൽകിയ സ്ഥാപനങ്ങൾക്കെതിരെ കേസെടുക്കാൻ നിർദേശം നൽകിയിരുന്നതായി അദ്ദേഹം ദില്ലിയില്‍ മാധ്യമപ്രവര്‍ത്തകരോട് പറഞ്ഞു. ഒരു പ്രതിക്കുവേണ്ടിയും ഇടപെട്ടിട്ടില്ലെന്നും മദ്യപിച്ച് മൂന്ന് പേരുടെ ജീവനെടുത്ത പ്രതിക്ക് പരമാവധി ശിക്ഷ നൽകണമെന്നാണ് അഭിപ്രായമെന്നും അദ്ദേഹം വ്യക്തമാക്കി. ഡിവൈഎഫ്ഐ ഇത്തരം നുണപ്രചാരണങ്ങൾ അവസാനിപ്പിക്കണമെന്നും തെറ്റായ വിവരങ്ങൾ പ്രചരിപ്പിക്കുന്നവരെ പിന്തിരിപ്പിക്കാൻ സംസ്ഥാന ഡിവൈഎഫ്ഐയും സിപിഎം നേതൃത്വവും തയ്യാറാകണമെന്നും അദ്ദേഹം ആവശ്യപ്പെട്ടു. തനിക്ക് പ്രതിയെക്കുറിച്ച് അറിയില്ലെന്നും മോട്ടോർ വാഹന നിയമം കുറച്ചുകൂടി കർശനമാക്കണമെന്നാണ് തന്റെ അഭിപ്രായമെന്നും മന്ത്രി പറഞ്ഞു.

ഡിവൈഎഫ്ഐ ആരോപണങ്ങൾ പൂർണ്ണമായും തള്ളി കോൺ​ഗ്രസ് നേതാവ് എ.എ. ഷുക്കൂറും രംഗത്തെത്തി. സർക്കാരും പൊതുസമൂഹവും കർശനമായ നിയമങ്ങളുമായി മുന്നോട്ടുപോകുമ്പോൾ 'ചോര തന്നെ കൊതുകിന് കൗതുകം' എന്ന തരത്തിലാണ് ഡിവൈഎഫ്ഐ പ്രവർത്തിക്കുന്നത് എന്ന് അദ്ദേഹം വിമർശിച്ചു. തനിക്ക് പ്രതികളെ അറിയില്ലെന്നും ആരോപണം തെളിയിക്കാൻ കഴിഞ്ഞാൽ പൊതുപ്രവർത്തനം അവസാനിപ്പിക്കാൻ തയ്യാറാണെന്നും എ.എ. ഷുക്കൂർ വെല്ലുവിളിച്ചു.