പിഎസ്സി ഭരണസമിതിക്ക് എതിരായ ഗവർണറുടെ കത്തിനെ കുറിച്ച് അറിയില്ലെന്ന് ആഭ്യന്തരമന്ത്രി; ആർടിഐ നിയമത്തിൽ വെള്ളം ചേർക്കില്ലെന്നും ചെന്നിത്തല

പി.എസ്.സി ഭരണസമിതിയെ പുറത്താക്കാൻ ഗവർണർ അയച്ച കത്തിനെക്കുറിച്ച് സർക്കാരിന് അറിവില്ലെന്ന് ആഭ്യന്തരമന്ത്രി രമേശ് ചെന്നിത്തല വ്യക്തമാക്കി. പി.എസ്.സിക്കെതിരായ ക്രൈംബ്രാഞ്ച് അന്വേഷണം ശരിയായ ദിശയിലാണെന്നും നഷ്ടപ്പെട്ട വിശ്വാസ്യത വീണ്ടെടുക്കുമെന്നും അദ്ദേഹം പറഞ്ഞു.

തിരുവനന്തപുരം: പി.എസ്.സി ഭരണസമിതിയെ പുറത്താക്കണമെന്നാവശ്യപ്പെട്ട് രാഷ്ട്രപതിക്ക് ഗവർണർ അയച്ച കത്തിനെക്കുറിച്ച് തനിക്ക് വിവരമൊന്നുമില്ലെന്ന് ആഭ്യന്തരമന്ത്രി രമേശ് ചെന്നിത്തല മാധ്യമങ്ങളോട് പറഞ്ഞു. സർക്കാരിനെ അറിയിച്ചുകൊണ്ടായിരിക്കില്ല ഗവർണർ ഇത്തരമൊരു കത്തയച്ചിട്ടുള്ളതെന്നും അദ്ദേഹം വ്യക്തമാക്കി.

പി.എസ്.സിക്കെതിരെ നിലവിൽ ധാരാളം പരാതികൾ ലഭിക്കുന്നുണ്ട്. വിഷയത്തിൽ ക്രൈംബ്രാഞ്ച് അന്വേഷണം ശരിയായ ദിശയിൽ തന്നെ മുന്നോട്ടുപോകും. ഇതുമായി ബന്ധപ്പെട്ട കോടതിയുടെ വിമർശനങ്ങളെ ശരിയായ അർത്ഥത്തിൽ ഉൾക്കൊള്ളുന്നുവെന്നും പി.എസ്.സിയുടെ നഷ്ടപ്പെട്ട വിശ്വാസ്യത പൂർണ്ണമായും വീണ്ടെടുക്കുമെന്നും അദ്ദേഹം കൂട്ടിച്ചേർത്തു.

അതേസമയം, ചേരാനെല്ലൂർ വാഹനാപകടത്തെക്കുറിച്ച് ഇരകളുടെ ബന്ധുക്കൾക്ക് യാതൊരുവിധ ആശങ്കയും വേണ്ടെന്ന് മന്ത്രി ഉറപ്പുനൽകി. അപകടത്തിന് കാരണക്കാരായവർക്കെതിരെ നിയമം അനുശാസിക്കുന്ന കടുത്ത ശിക്ഷ ഉറപ്പാക്കും. സംഭവത്തിൽ പോലീസ് പ്രാഥമിക അന്വേഷണം ആരംഭിച്ചിട്ടുണ്ട്. ഒപ്പം തന്നെ, വിവരാവകാശ നിയമത്തിൽ സർക്കാർ യാതൊരുവിധ വെള്ളം ചേർക്കലുകളും നടത്തില്ലെന്നും ആഭ്യന്തരമന്ത്രി വ്യക്തമാക്കി.

ചില പ്രത്യേക അന്വേഷണങ്ങൾ പൂർത്തിയാക്കാൻ ഫയലുകൾ രഹസ്യമായി സൂക്ഷിക്കേണ്ടതുണ്ട്. വിജിലൻസ് അന്വേഷണ സംഘം ആവശ്യപ്പെട്ട പ്രകാരം മാത്രമാണ് ചില ഫയലുകൾ താൽക്കാലികമായി വിവരവകാശ നിയമത്തിന്റെ പരിധിയിൽ നിന്ന് ഒഴിവാക്കിയത്. എന്നാൽ ഇത്തരത്തിൽ എന്നെന്നേക്കുമായി ഫയലുകൾ രഹസ്യമായി സൂക്ഷിക്കില്ലെന്നും, സർക്കാരിന് ഇതിൽ ഒന്നും മറച്ചുവെക്കാനില്ലെന്നും രമേശ് ചെന്നിത്തല വ്യക്തമാക്കി