വിവരാവകാശ നിയമപ്രകാരം അപേക്ഷ നൽകുന്നവരെ നിരീക്ഷിക്കാൻ കൊച്ചി കോർപ്പറേഷൻ; അപേക്ഷകരുടെ വിവരങ്ങൾ ശേഖരിച്ച് വിജിലൻസിന് കൈമാറും; എതിർത്ത് എൽഡിഎഫ്

സ്ഥിരമായി വിവരാവകാശ അപേക്ഷകൾ നൽകുന്നവരെ നിരീക്ഷിക്കാനും വിവരങ്ങൾ വിജിലൻസിന് കൈമാറാനും കൊച്ചി കോർപ്പറേഷൻ കൗൺസിൽ തീരുമാനിച്ചു. അപേക്ഷകരുടെ ചിത്രങ്ങൾ ഓഫീസിൽ പതിപ്പിക്കണമെന്ന യു.ഡി.എഫ് ആവശ്യത്തിനെതിരെ എൽ.ഡി.എഫ് രംഗത്തെത്തി. ഇത് തികച്ചും ജനാധിപത്യവിരുദ്ധമാണെന്ന് എൽ.ഡി.എഫ് കൗൺസിലർമാർ വ്യക്തമാക്കി.

കൊച്ചി: സ്ഥിരമായി വിവരാവകാശ നിയമപ്രകാരം അപേക്ഷ സമർപ്പിക്കുന്നവരെ നിരീക്ഷിക്കാൻ കൊച്ചി കോർപ്പറേഷൻ കൗൺസിൽ യോഗത്തിൽ തീരുമാനം. ഇത്തരം അപേക്ഷകരുടെ വിവരങ്ങൾ ശേഖരിക്കാൻ കോർപ്പറേഷൻ സെക്രട്ടറിക്ക് കൗൺസിൽ യോഗം നിർദ്ദേശം നൽകി. ശേഖരിക്കുന്ന വിവരങ്ങൾ വിജിലൻസിന് കൈമാറി അപേക്ഷകർക്കെതിരെ അന്വേഷണം നടത്താനും യോഗത്തിൽ തീരുമാനമായിട്ടുണ്ട്.

കൗൺസിൽ യോഗത്തിൽ യു.ഡി.എഫ് കൗൺസിലർമാരാണ് സ്ഥിരമായി വിവരാവകാശ അപേക്ഷ നൽകുന്നവരുടെ ചിത്രങ്ങൾ കോർപ്പറേഷൻ ഓഫീസിൽ പതിപ്പിക്കണമെന്ന ആവശ്യം ഉന്നയിച്ചത്. കൂടാതെ അപേക്ഷകരെ 'വിവരാവകാശ തൊഴിലാളികൾ' എന്ന് വിളിച്ച് അധിക്ഷേപിച്ചതായും ആക്ഷേപമുണ്ട്. അതേസമയം, കോർപ്പറേഷന്റെ ഈ നീക്കം തികച്ചും ജനാധിപത്യവിരുദ്ധമാണെന്ന് ചൂണ്ടിക്കാട്ടി കൗൺസിൽ യോഗത്തിൽ ശക്തമായ എതിർപ്പ് ഉയർന്നതായി എൽ.ഡി.എഫ് കൗൺസിലർ എലിസബത്ത് ടീച്ചർ വ്യക്തമാക്കി.