K Sudhakaran : 'സിപിഎം-സിപിഐ പോര് ലൈഫ് പദ്ധതി പ്രതിസന്ധിയിലാക്കി'; ഭവനരഹിതരെ സർക്കാർ വഞ്ചിച്ചെന്നും സുധാകരന്
Synopsis
കൃഷി അസിസ്റ്റന്റുമാരെ പരിശോധനയ്ക്ക് നിയോഗിച്ചതിനെ ചൊല്ലി കൃഷി-തദ്ദേശ വകുപ്പുകള് തമ്മില് നടക്കുന്ന അടിയാണ് ലൈഫ് പദ്ധതിയെ വന് പ്രതിസന്ധിയിലാക്കിയതെന്ന് സുധാകരൻ
തിരുവനന്തപുരം: വീടില്ലാത്ത പാവപ്പെട്ടവര് പ്രളയത്തിലും (Kerala floods) കൊവിഡ് (Covid 19) മഹാമാരിയിലും നരകയാതന അനുഭവിക്കുമ്പോള്, രാഷ്ടീയമേല്ക്കോമയ്ക്ക് സിപിഎമ്മും സിപിഐയും (CPM - CPI) തമ്മിലടിച്ച് ലൈഫ് പദ്ധതിയെ (Kerala Life Mission) വന് പ്രതിസന്ധിയിലാക്കിയെന്ന് കെപിസിസി പ്രസിഡന്റ് കെ സുധാകരന് എം പി (KPCC President K Sudhakaran). ഇത് ഭവനരഹിതരോടു കാട്ടുന്ന കടുത്ത വഞ്ചനയാണെന്ന് അദ്ദേഹം കുറ്റപ്പെടുത്തി. വീടിന് അര്ഹരായവരുടെ കരട് പട്ടിക പ്രസിദ്ധീകരിക്കാന് പഞ്ചായത്തുകള്ക്ക് അനുവദിച്ച സമയം കഴിഞ്ഞിട്ടും വകുപ്പുകള് തമ്മിലുള്ള തര്ക്കം കാരണം 22 ശതമാനം അപേക്ഷകളില് മാത്രമാണ് പരിശോധന പൂര്ത്തിയായതെന്നും സുധാകരൻ ചൂണ്ടികാട്ടി.
കൃഷി അസിസ്റ്റന്റുമാരെ പരിശോധനയ്ക്ക് നിയോഗിച്ചതിനെ ചൊല്ലി കൃഷി-തദ്ദേശ വകുപ്പുകള് തമ്മില് നടക്കുന്ന അടിയാണ് ലൈഫ് പദ്ധതിയെ വന് പ്രതിസന്ധിയിലാക്കിയത്. ഇത് പരിഹരിക്കേണ്ട സിപിഎമ്മിന്റെയും സിപി ഐയുടെയും നേതൃത്വം ഉദ്യോഗസ്ഥ ചേരിപ്പോരിന് വളംവച്ചുകൊടുത്തു. ലൈഫ് പദ്ധതി വഴി സംസ്ഥാനത്ത് 9,20,256 പേര് അപേക്ഷിച്ചതില് വെറും 2,06,064 പേരുടെ പരിശോധനകള് മാത്രമാണ് പൂര്ത്തിയായത്. കോഴിക്കോട്,വയനാട്,തിരുവനന്തപുരം ജില്ലകളില് 30 ശതമാനം അപേക്ഷകളില് പരിശോധന പൂര്ത്തിയാക്കിയിട്ടില്ല. മറ്റു ജില്ലകളിലെ സ്ഥിതി ഇതിലും പരിതാപകരമാണെന്നും സുധാകരൻ അഭിപ്രായപ്പെട്ടു.
പാലക്കാട് ജില്ലയില് 1.36 ലക്ഷം അപേക്ഷകളില് 1.22 ലക്ഷം അപേക്ഷകളും കെട്ടിക്കിടക്കുകയാണ്. ഇടുക്കിയില് 38122 അപേക്ഷകളില് വെറും 5712 എണ്ണം മാത്രമാണ് പരിശോധന പൂര്ത്തിയാക്കിയത്. ഒന്നാം പിണറായി സര്ക്കാര് 2020 ല് തെരഞ്ഞെടുപ്പ് മുന്നില് കണ്ട് സ്വീകരിച്ച അപേക്ഷകളില് 17 മാസം അടയിരുന്നു. ലൈഫ് പദ്ധതിയുടെ രണ്ടാംഘട്ടത്തില് 9 ലക്ഷം അപേക്ഷ സ്വീകരിച്ചെങ്കിലും ഒന്നര വര്ഷമായിട്ടും ഗുണഭോക്താക്കളുടെ അന്തിമപട്ടിക പ്രസിദ്ധീകരിച്ചില്ല. തുടര്ന്ന് പ്രതിപക്ഷം നിയമസഭയില് വന് പ്രതിഷേധം ഉയര്ത്തിയപ്പോഴാണ് സര്ക്കാര് അനങ്ങിയത്. വിവിധ ഭവന നിര്മ്മാണ പദ്ധതികള് സമന്വയിപ്പിച്ച് ലൈഫ് മിഷന് കീഴിലാക്കിയതോടെയാണ് സംസ്ഥാനത്ത് ഭവന നിര്മ്മാണ പദ്ധതി നിലച്ചതെന്നും സുധാകരൻ പറഞ്ഞു.
കെ റെയിലിനെതിരെ സമരത്തിന് യുഡിഎഫ്; യോഗത്തില് നിന്ന് വിട്ടുനിന്ന് ഉമ്മന് ചാണ്ടിയും ചെന്നിത്തലയും
2016 മുതല് 2021 വരെ കാലഘട്ടത്തില് രണ്ടു ലക്ഷത്തില് താഴെ വീടുകള് മാത്രമാണ് പിണറായി സര്ക്കാര് (Pinarayi government) നിര്മിച്ച് നല്കിയത്. 5 ലക്ഷം വീടുകളായിരുന്നു വാഗ്ദാനം. ഉമ്മന് ചാണ്ടി സര്ക്കാരിന്റെ (Oommen Chandy government) കാലത്ത് 2011 മുതല് 2016 വരെ നാലു ലക്ഷത്തിമുപ്പത്തിനാലായിരം വീടുകളാണ് നിര്മ്മിച്ചു നല്കിയത്. ഭവനരഹിതര്ക്ക് വീട് വച്ചു നല്കിയത് ഉമ്മന്ചാണ്ടി സര്ക്കാര് പ്രചാരണമാക്കിയില്ല. എന്നാല് പിണറായി സര്ക്കാര് കൊട്ടിഘോഷിച്ച് ആഘോഷമാക്കി നവകേരള സ്വപ്നം എന്നൊക്കെ പറഞ്ഞ് വലിയ സംഭവമാക്കി മാറ്റാന് ശ്രമിച്ചു. തദ്ദേശ സ്വയംഭരണ സ്ഥാപനങ്ങളുടെ അധികാരങ്ങള് കവര്ന്നെടുക്കുന്ന പദ്ധതിയായി ലൈഫ് മിഷന് മാറിയിരിക്കുകയാണെന്നും ഇത് അധികാര വികേന്ദ്രീകരണത്തിന് എതിരാണെന്നും സുധാകരന് ചൂണ്ടിക്കാട്ടി.
ഉമ്മൻ ചാണ്ടിക്കും രമേശ് ചെന്നിത്തലക്കും എതിരെ കെ പി സി സി നേതൃത്വം; ഹൈക്കമാണ്ടിനു പരാതി നൽകും
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam