നിലപാട് വ്യക്തമാക്കി മാണി സി കാപ്പൻ:'കേരളാ കോൺഗ്രസ് എം യുഡിഎഫിൽ വരുന്നതിൽ എതിർപ്പില്ല, പാലാ വിട്ടുകൊടുക്കില്ല'

എൽഡിഎഫ് വിട്ട് കേരള കോൺഗ്രസ് എം യുഡിഎഫിൽ വരുന്നതിനോട് എതിർപ്പില്ലെന്നും എന്നാൽ പാലാ സീറ്റ് വിട്ടുകൊടുക്കില്ലെന്നും മാണി സി കാപ്പൻ

തിരുവനന്തപുരം: സംസ്ഥാനത്തെ കോൺഗ്രസ് പാർട്ടിയിൽ ഇന്ന് നേതൃ തലത്തിൽ തർക്കമൊന്നും ഉണ്ടാകില്ലെന്ന് എഐസിസി ജനറൽ സെക്രട്ടറി ദീപാ ദാസ് മുൻഷി ഉറപ്പ് നൽകിയെന്ന് മാണി സി കാപ്പൻ. കൂടിക്കാഴ്ചയ്ക്ക് ശേഷം തിരുവനന്തപുരത്ത് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. മുന്നണി വിപുലീകരണം ചർച്ചയായില്ലെന്നും എന്നാൽ കേരള യുഡിഎഫിലേക്ക് കോൺഗ്രസ് എം തിരികെ വരുന്നതിൽ പ്രശ്നമില്ലെന്നും പറഞ്ഞ അദ്ദേഹം പാലാ സീറ്റ് വിട്ടുകൊടുക്കില്ലെന്നും വ്യക്തമാക്കി. കോൺഗ്രസ് നേതാക്കളോട്  ഒറ്റക്കെട്ടായി പോകണമെന്ന് നേതാക്കൾക്ക് നിർദ്ദേശം നൽകിയിട്ടുണ്ടെന്ന് ഘടകകക്ഷി നേതാക്കൾക്ക് എഐസിസി ജനറൽ സെക്രട്ടറി ദീപാ ദാസ് മുൻഷി ഉറപ്പ് നൽകി.

അതേസമയം യുഡിഎഫിൽ നിയമസഭാ സീറ്റ് വിഭജനം നേരത്തെ ആക്കണമെന്ന് ദീപാ ദാസ് മുൻഷിയോട് ആവശ്യപ്പെട്ടെന്ന് സിഎംപി നേതാവ് സിപി ജോൺ പറഞ്ഞു. മുന്നണിയുടെ അടിത്തറ വിപുലീകരിക്കണമെന്നും സിഎംപി ആവശ്യപ്പെട്ടു. യുഡിഎഫിനെ അധികാരത്തിൽ എത്തിക്കാനുള്ള നടപടികളാണ് യോഗത്തിൽ ചർച്ചയായതെന്നും ജോൺ വ്യക്തമാക്കി.