600ലധികം കുടുംബങ്ങള്, 400ലധികം ദിവസങ്ങള്, ഒടുവിൽ സമരത്തിന് പര്യവസാനം; മുനമ്പം ഭൂസമരം ഞായറാഴ്ച അവസാനിപ്പിക്കാൻ തീരുമാനം
Synopsis
വഖഫ് വിവാദത്തെ തുടര്ന്ന് മുനമ്പത്തെ അറുന്നൂറിലേറെ കുടുംബങ്ങള് നാനൂറ് ദിവസത്തിലേറെയായി നടത്തി വന്നിരുന്ന സമരം ഞായറാഴ്ച അവസാനിപ്പിക്കും. സമരം അവസാനിപ്പിക്കുന്ന കാര്യത്തില് ഇന്ന് രാത്രി ചേര്ന്ന സമരസമിതി കോര് കമ്മിറ്റി യോഗത്തിലാണ് തീരുമാനം
കൊച്ചി: വഖഫ് വിവാദത്തെ തുടര്ന്ന് മുനമ്പത്തെ അറുന്നൂറിലേറെ കുടുംബങ്ങള് നാനൂറ് ദിവസത്തിലേറെയായി നടത്തി വന്നിരുന്ന സമരം ഞായറാഴ്ച അവസാനിപ്പിക്കും. സമരം അവസാനിപ്പിക്കുന്ന കാര്യത്തില് ഇന്ന് രാത്രി ചേര്ന്ന സമരസമിതി കോര് കമ്മിറ്റി യോഗത്തിലാണ് സമരം ഞായറാഴ്ച അവസാനിപ്പിക്കാൻ അന്തിമ തീരുമാനമെടുത്തത്.മുനമ്പം തീരത്ത് താമസിക്കുന്ന ഏകദേശം 250 ഓളം വരുന്ന കുടുംബങ്ങൾ കുഴുപ്പിള്ളി,പള്ളിപ്പുറം വില്ലേജുകളിലായി കരമടച്ചു കഴിഞ്ഞു. ഭൂമി പോക്ക് വരവിന് ഹെൽപ് ലൈൻ തുറക്കാമെന്ന് മന്ത്രി പി രാജീവ് ഉറപ്പ് നൽകിയതായി സമരസമിതി അറിയിച്ചു. നിയമ മന്ത്രി പി രാജീവ്, വൈപ്പിൻ എംഎൽഎ കെ എൻ ഉണ്ണികൃഷ്ണൻ അടക്കമുള്ളവർ ഞായറാഴ്ച ഉച്ചയ്ക്കുശേഷം 2.30 ന് സമരപ്പന്തലിൽ എത്തി സമരം ഇരിക്കുന്നവർക്ക് നാരങ്ങാനീര് നൽകി സമരം അവസാനിപ്പിക്കും. 2024 ഒക്ടോബര് 13 ന് തുടങ്ങിയ മുനമ്പം ഭൂസമരമാണ് 413 ാം ദിവസം പര്യവസാനിക്കുന്നത്.
വഖഫ് ബോര്ഡ് അവകാശവാദം ഉന്നയിച്ച ഭൂമിയിലെ താമസക്കാര്ക്ക് വ്യവസ്ഥകളോടെ ഭൂനികുതി അടയ്ക്കാമെന്ന ഹൈക്കോടതി ഉത്തരവിന്റെ പശ്ചാത്തലത്തിലാണ് സമരം അവസാനിപ്പിക്കാൻ സമര സമിതി തീരുമാനിച്ചിരിക്കുന്നത്. വഖഫ് ബോര്ഡിന്റെ ആസ്തിക്കണക്കില് നിന്ന് വിവാദ ഭൂമി പൂര്ണമായും ഒഴിവാക്കും വരെ സമരം തുടരണമെന്ന ആവശ്യവും ഒരു വിഭാഗം സമരക്കാര് നേരത്തെ ഉന്നയിച്ചിരുന്നെങ്കിലും കോര് കമ്മിറ്റി യോഗത്തില് വിശദമായ കൂടിയാലോചനയ്ക്കുശേഷം സമരം അവസാനിപ്പിക്കാൻ തീരുമാനിക്കുകയായിരുന്നു.
മുനമ്പം ജനതയെ കുടിയിറക്കില്ലെന്ന മുഖ്യമന്ത്രിയുടെ ഉറപ്പ് പാലിക്കപ്പെട്ടെന്നാണ് ഇന്ന് നിയമമന്ത്രി പി.രാജീവ് അവകാശപ്പെട്ടത്. തദ്ദേശ തെരഞ്ഞെടുപ്പിന്റെ കൂടി പശ്ചാത്തലത്തില് പുതിയ സാഹചര്യത്തിന്റെ രാഷ്ട്രീയ ആനുകൂല്യം കൂടി ലക്ഷ്യമിട്ടാണ് മന്ത്രി പി.രാജീവിന്റെ പ്രസ്താവന. സമര സമിതി കണ്വീനര് ജോസഫ് ബെന്നിയെ തദ്ദേശ തെരഞ്ഞെടുപ്പില് യുഡിഎഫ് സ്ഥാനാര്ഥിയായി മല്സരിപ്പിക്കാനുളള ചര്ച്ചകള് കോണ്ഗ്രസ് നേതാക്കള് നടത്തിയിരുന്നു. ഈ വിഷയമടക്കം ഉന്നയിച്ച് സമര സമിതിയുടെ ഭാഗമായി പ്രവര്ത്തിച്ച ബിജെപി അനുകൂലികളില് ചിലര് സമര സമിതിയില് ഭിന്നാഭിപ്രായം രേഖപ്പെടുത്തിയിരുന്നു. സമര സമിതിയിലെ രാഷ്ട്രീയ അഭിപ്രായ ഭിന്നതകള് രൂക്ഷമാകുന്ന പശ്ചാത്തലത്തില് കൂടിയാണ് സമരം അവസാനിപ്പിക്കാനുള്ള നിര്ണായക തീരുമാനമുണ്ടാകുന്നത്.