ചൂരല്‍മലയിൽ പുതിയ ഹൈടെക് പാലം വരുന്നു; ചെലവ് 34 കോടി രൂപ, നിർമാണം ഊരാളുങ്കല്‍ ലേബര്‍ സൊസൈറ്റി

വയനാട് ചൂരല്‍മലയില്‍ ഉരുള്‍പൊട്ടലില്‍ തകര്‍ന്ന പാലത്തിന് പകരം 34 കോടി രൂപ ചെലവില്‍ പുതിയ ഹൈടെക് പാലം വരുന്നു. ചൂരൽമലയിൽ സൈന്യം നിർമിച്ച ബെയ്‍ലി പാലത്തിന് സമാന്തരമായാണ് പുതിയ പാലം ഒരുങ്ങുന്നത്.

കൽപ്പറ്റ: ഉരുള്‍പൊട്ടലില്‍ ഒലിച്ചു പോയ വയനാട്ടിലെ ചൂരല്‍മല പാലത്തിനു പകരം പുതിയ ഹൈടെക് പാലം വരുന്നു. പാലത്തിന്‍റെ നിര്‍മ്മാണ പ്രവർത്തനങ്ങൾ തുടങ്ങി. 34 കോടി രൂപ ചെലവില്‍ ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിയാണ് പാലം നിര്‍മ്മിക്കുന്നത്.

ചൂരൽമലയിൽ സൈന്യം നിർമിച്ച ബെയ്‍ലി പാലത്തിന് സമാന്തരമായാണ് പുതിയ പാലം ഒരുങ്ങുന്നത്. ഗര്‍ഡറുകള്‍ പരസ്പരം ചേര്‍ത്തുള്ള ബോസ്ട്രിങ് മാതൃകയിലാണ് നിര്‍മാണം. പുഴയുടെ മുകളിൽ 107 മീറ്ററും ഇരു കരകളിലും 80 മീറ്ററും നീളം പാലത്തിനുണ്ടാവും. ഉയരം കൂട്ടി നിർമിക്കുന്നതിനാലാണ് ഇരു കരകളിലും 80 മീറ്റർ നീളത്തിൽ പണിയുന്നത്. പുഴയിലേക്ക് തൂണുകൾ ഇല്ലാത്ത രീതിയിലാണ് രൂപകൽപ്പന. ദുരന്ത കാലത്ത്‌ പുന്നപ്പുഴയിലുണ്ടായ പരമാവധി ഉയർന്ന ജലനിരപ്പ് തിട്ടപ്പെടുത്തി അതിനെക്കാൾ ഉയരത്തിലാണ് പാലം. ഇനിയൊരു അപകടമുണ്ടായാൽ അതിജീവിക്കാൻ ശേഷിയുള്ള വിധമാണ് നിർമാണം.

ചൂരല്‍മല ടൗണില്‍ പാലത്തിന്‍റെ പൈലിംഗ് ജോലികള്‍ തുടങ്ങി. ചൂരൽമല ടൗണിൽ നിന്ന് ആരംഭിച്ച് മറുകരയിൽ അട്ടമല -മുണ്ടക്കൈ റോഡുകൾ കൂടിച്ചേരുന്നിടത്താണ് പാലം അവസാനിക്കുക. നാല് വർഷം കൊണ്ട് പണി പൂർത്തിയാക്കാനാണ് ലക്ഷ്യം വെക്കുന്നത്.