പിഎസ്‍സി പരീക്ഷ ക്രമക്കേടിൽ അതിവേഗം അന്വേഷണം സംഘം; സെക്രട്ടറി സാജു ജോർജിനെ നാളെ ചോദ്യം ചെയ്യും

പിഎസ്‍സി പരീക്ഷ ക്രമക്കേടിൽ സെക്രട്ടറി സാജു ജോർജിനെയും പരീക്ഷ കൺട്രോളറെയും അന്വേഷണ സംഘം ചോദ്യം ചെയ്യും. ചെയർമാന്റെയും അംഗങ്ങളുടെയും മൊഴികളിലെ ഭിന്നതയെ തുടർന്ന് ക്രൈംബ്രാഞ്ച് പ്രത്യേക അന്വേഷണ സംഘം വിപുലീകരിച്ചു. കേസിൽ പ്രതിയായ അഡീഷണൽ ചീഫ് സെക്രട്ടറി ആർ ഹരി നിലവിൽ ഒളിവിലാണ്.

തിരുവനന്തപുരം: പിഎസ്‍സി പരീക്ഷ ക്രമക്കേടിൽ സെക്രട്ടറി സാജു ജോർജിനെ നാളെ ചോദ്യം ചെയ്യും. ഇന്ന് നോട്ടീസ് നൽകും. പരീക്ഷ കൺട്രോളർ ബിനി കെ എബ്രഹാമിനെ തിങ്കളാഴ്ചയാണ് ചോദ്യം ചെയ്യുക. തിങ്കളാഴ്ച മുതൽ മറ്റ് അംഗങ്ങളെ ചോദ്യം ചെയ്യും. അംഗങ്ങളെ ചോദ്യം ചെയ്തശേഷം സെക്രട്ടറിയെ ചോദ്യം ചെയ്യാമെന്നായിരുന്നു ആദ്യധാരണ. എന്നാല്‍, ചെയർമാൻ ഉദ്യോഗസ്ഥരെ പഴിച്ച് മൊഴി നൽകിയ സാഹചര്യത്തിലാണ് സെക്രട്ടറിയെ ഉടൻ ചോദ്യം ചെയ്യുന്നത്.

അതേസമയം, പിഎസ്‍സി പരീക്ഷ ക്രമക്കേടിൽ പ്രത്യേക അന്വേഷണ സംഘം വിപുലപ്പെടുത്തി. രണ്ടു എസ്പി മാരെയും ഒരു ഡിവൈഎസ്‍പിയെയും അന്വേഷണ സംഘത്തിന്റെ ഭാഗമാക്കി. പുതുതായി രജിസ്റ്റർ ചെയ്ത 3 കേസുകൾ ഉദ്യോഗസ്ഥർക്ക് നൽകി. 10 പി എസ് സി അംഗങ്ങൾക്കും സെക്രട്ടറിക്കും ഇന്ന് നോട്ടീസ് നൽകും. പിഎസ്‍സി പരീക്ഷാ തട്ടിപ്പിൽ ചെയർമാനും അംഗങ്ങളും നൽകിയ മൊഴികളിൽ ഭിന്നതയുണ്ട്. എല്ലാ തീരുമാനങ്ങളും കൂട്ടായി എടുത്തതാണെന്ന് ക്രൈംബ്രാഞ്ച് ചോദ്യം ചെയ്യലിൽ പിഎസ്‍സി ചെയ‍ർമാൻ എം ആർ ബൈജു മൊഴി നൽകിയത്.

പല തീരുമാനങ്ങളും ചെയർമാൻ ഒറ്റയ്ക്ക് എടുക്കുന്നുവെന്നാണ് ചില അംഗങ്ങൾ മൊഴി നൽകിയിരിക്കുന്നത്. കേസിൽ പ്രതിയായ അഡീഷണൽ ചീഫ് സെക്രട്ടറി ആർ ഹരിയും എം ആർ ബൈജുവും വലിയ അടുപ്പത്തിലാണെന്ന് ചില അംഗങ്ങൾ മൊഴി നൽകിയിട്ടുണ്ട്. ഹരി ഇപ്പോഴും ഒളിവിൽ തുടരുകയാണ്. ഇയാളുടെ വീട് പൂട്ടിയ നിലയിലാണ്. അതേസമയം അറസ്റ്റിലായ മുൻ ഡെപ്യൂട്ടി സെക്രട്ടറി സതീഷിനെ റിമാൻഡ് ചെയ്തിട്ടുണ്ട്.

ഉദ്യോ​ഗസ്ഥരായ ഹരി, സതീഷ് എന്നിവരെ പൂർണമായും സംരക്ഷിക്കുന്ന രീതിയിലുള്ള മൊഴിയാണ് ചെയർമാൻ എം ആർ ബൈജു നൽകിയിരിക്കുന്നത്. ആസൂത്രണ ബോ‍ർഡ് പരീക്ഷയിലെ 10 ചോദ്യങ്ങളുടെ മൂല്യനിർണയം നടക്കാതെ പോയതിന് കാരണം സാങ്കേതിക പിഴവാണെന്നും ബോധപൂർവമായ വീഴ്ചയല്ലെന്നുമാണ് ചെയർമാൻ്റെ മൊഴി. ചെയ‍ർമാൻ്റെ മൊഴി പൂർണമായും ക്രൈംബ്രാഞ്ച് വിശ്വാസത്തിലെടുത്തിട്ടില്ല.