പതിനാല്​ വയസിന്​ മുമ്പ്​ മക്കൾക്ക്​ മദ്യപാനത്തിന്​ അനുമതി നൽകിയ രക്ഷിതാക്കളേ ജാഗ്രത

പതിനാല്​ വയസോടെ മക്കളെ മദ്യപിക്കാൻ അനുവദിക്കുന്ന രക്ഷിതാക്കൾക്ക്​ ഇതാ മുന്നറിയിപ്പ്​. അമേരിക്കയിലെ പെൻസിൽവാനിയ സർവകലാശാലയിലെ ഗവേഷകർ നടത്തിയ പഠനമാണ്​ അപായ സൂചന നൽകുന്നത്​. കുട്ടികളുടെ ഭാവിയിൽ വലിയ പ്രത്യാഘാതങ്ങൾക്ക്​ ഇൗ അനുമതി വഴിവെക്കുമെന്നാണ്​ പഠനം പറയുന്നത്​. ആറിൽ ഒന്ന്​ രക്ഷിതാക്കളും ഇത്തരത്തിൽ അനുമതി നൽകുന്നവരാണ്​.

സർവകലാശാലയിലെ യു.സി.എൽ ഇൻസ്​റ്റിറ്റ്യൂട്ട്​ ഒാഫ്​ എജ്യുക്കേഷനിലെ സെന്‍റര്‍ ഫോർ ലോങ്​റ്റ്യൂഡിനൽ സ്​റ്റഡീസിലെ ഗവേഷകർ ആണ്​ പഠനം നടത്തിയത്​. പല രക്ഷിതാക്കളും ചെറുപ്പത്തിൽ തന്നെ കുട്ടികളെ​ ഉത്തരവാദിത്വത്തോടെ മദ്യപിക്കാൻ പഠിപ്പിക്കുന്നവരാണെന്ന്​ പഠനത്തിൽ പറയുന്നു. കൗമാരക്കാരിലെ മദ്യപാനം ഭാവിയിൽ അവരെ അപകടരമായ മദ്യപാനത്തിലേക്ക്​ നയിക്കും. ചെറുപ്പത്തിൽ മദ്യപിക്കാൻ പഠിച്ച കുട്ടികൾ സ്​കൂളുകളിൽ പരാജയപ്പെടുകയും പെരുമാറ്റ പ്രശ്​നങ്ങൾ പ്രകടിപ്പിക്കുകയും ചെയ്യുന്നതായി നേരത്തെ നടത്തിയ പഠനത്തിൽ കണ്ടെത്തിയിരുന്നു.  

ബ്രിട്ടനിലെ പതിനായിരം കുട്ടികളെ ഉപയോഗിച്ചാണ്​ പഠനം നടത്തിയത്​. ഉയർന്ന വിദ്യാഭ്യാസമുള്ള വെള്ളക്കാരിൽ കൂടുതൽ പേരും മക്കളെ 14 വയസോടെ മദ്യപിക്കാൻ അനുവദിക്കുന്നവരാണ്​.  അനുമതി നൽകുന്നത്​  അവരെ ഉത്തരവാദിത്വമുള്ള മദ്യപാനികളാക്കി മാറ്റുമെന്നാണ്​ സാമൂഹികമായി മുന്നാക്കം നിൽക്കുന്ന കുട്ടികളുടെ രക്ഷിതാക്കൾ കരുതുന്നത്​. അപകടകരമായ മദ്യപാനത്തി​ന്‍റെ ദോഷങ്ങൾ അവരെ ബോധ്യപ്പെടുത്താനും ഇതുവഴി കഴിയുമെന്നും അവർ കരുതുന്നു.  

എന്നാൽ ദീർഘകാല സാമൂഹിക പ്രത്യാഘാതമുണ്ടാക്കുന്നതാണ്​ ഇതെന്നാണ്​   ഗവേഷകരുടെ വിലയിരുത്തൽ. സാമൂഹികമായി പിന്നാക്കം നിൽക്കുന്ന കുട്ടികളുടെ രക്ഷിതാക്കളിൽ നിന്നുള്ള പ്രതികരണങ്ങളും ഇത്​ ശരിവെക്കുന്നു. ഗുരുതരമായ ആരോഗ്യ പ്രശ്​നങ്ങൾ  വരെ ഇതുവരുത്തിവെക്കുന്നു. 

കുട്ടികളെ ഒരു കാരണവശാലും 15 വയസിന്​ മുമ്പ്​ മദ്യപിക്കാന അനുവദിക്കരുതെന്ന ചീഫ്​ മെഡിക്കൽ ഒാഫീസറുടെ ഉപദേശത്തെ പഠനത്തിൽ പ്രത്യേകമായി എടുത്തുകാണിച്ചിട്ടുണ്ട്​. മസ്​തിഷ്​കവും ശരീരവും പൂർണവളർച്ചയെത്താത്ത കാലയളവിലെ മദ്യപാനം കുട്ടികളെ ദോഷകരമായി ബാധിക്കുമെന്ന്​ പഠനത്തിന്​ നേതൃത്വം നൽകിയ ഇൻസ്​റ്റിറ്റ്യൂട്ട്​ ചീഫ്​ എക്​സിക്യുട്ടീവ്​ കാതെറിൻ ബ്രൌൺ പറഞ്ഞു.