ബട്ടറും നെയ്യും കുടൽ ക്യാന്‍സറിനുളള സാധ്യത വർധിപ്പിക്കുമെന്ന്​ പഠനം

വെണ്ണ(ബട്ടർ), നെയ്യ്​, ഇറച്ചി ഉപയോഗിച്ചുണ്ടാക്കുന്ന സോസേജുകൾ, നിറയെ കൊഴുപ്പുള്ള ക്രീമുകൾ, തൈര്​ എന്നിവയുടെ പരിധിവിട്ട ഉപയോഗം കുടലിലെ ക്യാന്‍സറിനുള്ള സാധ്യത വർധിപ്പിക്കുന്നുവെന്ന്​ പുതിയ പഠനം. കാലിഫോണിയ സർവകലാശാലയിലെ സ്​കൂൾ ഒാഫ്​ മെഡിസിനിലെ ശാസ്​ത്രജ്​ഞൻ ഡേവിഡ്​ ജെഫൻ ആണ്​ മൃഗങ്ങളുടെ ​കൊളസ്​ട്രോൾ നില മനുഷ്യശരീരത്തിലെ മൂലകോശങ്ങളുടെ വിഭജനം വേഗത്തിലാക്കുമെന്ന്​ കണ്ടെത്തിയത്​. ഇത്​ ശരീരത്തിൽ ക്യാന്‍സർ കോശങ്ങൾ രൂപപ്പെടുത്തുന്നതിനെ നൂറിരട്ടി വേഗത്തിൽ സഹായിക്കുന്നു.

ഇൗ പഠനം കുടലിലുണ്ടാകുന്ന ക്യാന്‍സർ ചികിത്സക്കുള്ള മരുന്നുവികസിപ്പിക്കാൻ സഹായിക്കുന്ന തൻമാത്രാ വഴി കൂടി തുറന്നിട്ടുണ്ട്​. ക്യാന്‍സർ കോശങ്ങളുടെ രൂപാന്തരണത്തിന്​ മൂലകോശങ്ങളിൽ കൊളസ്​ട്രോൾ നൂറിരട്ടി സ്വാധീനം  ചെലുത്തുന്നുവെന്ന കണ്ടെത്തൽ അത്​ഭുതപ്പെടുത്തിയെന്ന്​ പഠനത്തിന്‍റെ പ്രബന്ധം പ്രസിദ്ധീകരിച്ച ഡോ. പീറ്റർ ടൊൺ​ടൊണോസ്​ പറഞ്ഞു.

ഭക്ഷണത്തിലെ കൊളസ്​ട്രോളും കാൻസറും തമ്മിലുള്ള ബന്ധം നേരത്തെ തെളിയിക്കപ്പെട്ടതാണ്​. എന്നാൽ ഇതിന്​ പിറകിലെ പ്രവർത്തനം എന്താണെന്ന്​ ഇതിന്​ മുമ്പ്​ ആരും വിശദീകരിച്ചിട്ടില്ലെന്നും ഡോ. ​ടൊൺ​ടൊണോസ്​ പറഞ്ഞു. എലികളിൽ നടത്തിയ പഠനത്തിലാണ്​ സുപ്രധാന കണ്ടുപിടുത്തത്തിൽ സംഘം എത്തിയത്​. പഠനം സെൽ സ്​റ്റെം സെൽ എന്ന ജേണലിൽ പ്രസിദ്ധീകരിച്ചിട്ടുണ്ട്​.