കുട്ടികളെ ലൈംഗികാതിക്രമങ്ങളില്‍ നിന്നും രക്ഷിക്കാന്‍ ഇക്കാര്യങ്ങള്‍ ശ്രദ്ധിക്കാം

നിങ്ങളുടെ കുട്ടി കണ്ണീരിലും വേദനയിലും കുതിർന്നാണോ വീട്ടിൽ വരുന്നത്​? മൗനിയായി അവർ ഒതുങ്ങിക്കൂടുകയോ പുറമെ നിന്നുള്ള ആരെയെങ്കിലും ഭയപ്പെടുകയോ ചെയ്യുന്നുണ്ടോ? എന്നാൽ കരുതിയിരിക്കുക, നിങ്ങളുടെ കുട്ടി ഒരുപക്ഷേ ലൈംഗികാതിക്രമത്തി​ന്‍റെ ഇരയായിരിക്കാം. കഴിഞ്ഞ ഏതാനും ദിവസം മുമ്പ്​ നാല്​ വയസുകാരിയായ പെൺകുട്ടിക്ക്​ സ്​കൂളിൽ നിന്ന്​ കൂടെ പഠിക്കുന്ന കുട്ടിയിൽ നിന്നുണ്ടായ അനുഭവം ആരും മറന്നുകാണില്ലല്ലോ. കുട്ടികൾക്ക്​ നേരെയുള്ള ലൈംഗിക അതിക്രമം ഇന്ന്​ അസാധാരണമല്ലാതായിരിക്കുന്നു.

ചിലർക്ക്​ അവരുടെ ലൈംഗികാസക്​തി നിയന്ത്രിക്കാൻ പറ്റാതെവരികയും കുട്ടികളെ ലൈംഗികമായി ആക്രമിക്കുകയും ചെയ്യുന്നു. ലൈംഗിക അതിക്രമം നടക്കു​മ്പോള്‍ എന്താണ്​ സംഭവിക്കുന്നതെന്ന്​ കുട്ടികൾ അറിയുന്നില്ല. ആരാണ്​ അവരെ ഇത്തരം കാര്യങ്ങൾ പറഞ്ഞു മനസിലാക്കേണ്ടത്​? കുഞ്ഞുങ്ങൾക്ക്​ നേരെ നടക്കുന്ന ലൈംഗിക അതിക്രമം അവരുടെ ബാല്യം കവർന്നെടുക്കുന്ന അട്ടയാണ്​. അവരെ ലോകത്തിന്‍റെ ഇരുട്ടറയിലേക്ക്​ തള്ളിവിടുന്ന കൃത്യം കൂടിയാണത്​.

ഇവ പൂർണമായും ഇല്ലാതാക്കാനായില്ലെങ്കിലും ഒന്ന്​ ശ്രദ്ധവെച്ചാൽ കുറച്ചുകൊണ്ടുവരാൻ കഴിയും. കുട്ടികളെ ശാക്​തീകരിക്കാനും അപകട​ത്തിൽപെടു​മ്പോള്‍ എന്ത്​ ചെയ്യണമെന്നതും സംബന്ധിച്ച്​ ചില കാര്യങ്ങൾ മാതാപിതാക്കൾ അവരെ പഠിപ്പിക്കണം. കുഞ്ഞുങ്ങളെ ഇത്തരം സാഹചര്യത്തിൽ നിന്ന്​ രക്ഷപ്പെടുത്താൻ ചില നിർദേശങ്ങൾ:

കുട്ടികളോട്​ സംസാരിക്കാൻ രക്ഷിതാക്കൾ തയാറാവുക. അവരു​ടെ ഒാരോ ദിവസത്തെക്കുറിച്ചും സംസാരിക്കുക. അവർക്കൊപ്പം ഇരുന്ന്​ സംസാരിച്ചാൽ എന്തെങ്കിലും തെറ്റായി സംഭവിക്കുന്നുണ്ടെങ്കിൽ അത്​ തിരിച്ചറിയാൻ സഹായിക്കും. അതെ കുറിച്ച്​ കുട്ടികളെ പറഞ്ഞുമനസിലാക്കാനും സാധിക്കും. 

അവരുടെ ശരീരഭാഗങ്ങളെക്കുറിച്ചും അവയിൽ സ്വകാര്യത സൂക്ഷിക്കേണ്ടത്​ ഏതെന്നത്​ സംബന്ധിച്ചും അവരെ പറഞ്ഞു മനസിലാക്കുക. ശരീരഭാഗങ്ങളിൽ ആരെയും സ്​പർശിക്കാൻ അനുവദിക്കരുതെന്നും ബോധ്യപ്പെടുത്തുക. 

എന്ത്​ സംഭവിക്കുന്നുവെന്ന്​ നിങ്ങളോട്​ വന്ന്​ പറയാൻ മക്കളെ പ്രേരിപ്പിക്കുക. കുട്ടികളുമായി ശക്​തമായ ആശയവിനിമയ ബന്ധം നിലനിർത്തുക. ഇത്തരം കാര്യങ്ങൾ പറയുമ്പോള്‍ അവരെ കാര്യങ്ങൾ പറഞ്ഞുപഠിപ്പിക്കുക.  നിങ്ങളിൽ നിന്ന്​ കാര്യങ്ങൾ മറച്ചുവെക്കാതെ സംസാരിക്കാൻ പഠിപ്പിക്കുക. അത്തരം സന്ദർഭങ്ങളിൽ അവർക്കൊപ്പം നിൽക്കുമെന്നും സംരക്ഷിക്കുമെന്നും ഉറപ്പുനൽകുക.  

ഏത്​ തരത്തിലുള്ള പെരുമാറ്റമാണ്​ തെറ്റ് എന്ന്​ അവരെ പഠിപ്പിക്കുകയും അത്തരം സന്ദർഭങ്ങളിൽ അത്​ മുതിർന്ന​വരോട്​ പറയാനും പ്രേരിപ്പിക്കുക. ലൈംഗികാവയവങ്ങൾക്ക്​ പുറമെ ചുണ്ട്​, കാൽ, കഴുത്ത്​, കൈകൾ എന്നിവയിലും ലൈംഗികതാൽപര്യത്തോടെ സ്​പർശിക്കാം. ഏത്​ രുപത്തിലുള്ള സ്​പർശനം ആകാമെന്നും ആകാൻപാടില്ലാത്തത്​ ഏതെന്നും അവരെ ​ബോധ്യപ്പെടുത്തുക.  അതൃപ്​തിയുള്ള പെരുമാറ്റങ്ങൾ ഏതെന്ന്​ അവരെ മനസിലാക്കുകയും അത്​ നിങ്ങളോട്​ പങ്കുവെക്കാനും പറയുക. 

കുട്ടികളോട്​ സ്​നേഹം പ്രകടിപ്പിക്കാൻ നിങ്ങൾ ചെയ്യുന്ന ചെറിയ പ്രവർത്തനങ്ങൾ പോലും ലൈംഗിക അതിക്രമം നടത്തുന്നവർ ഉപയോഗിച്ചേക്കാം. നിങ്ങൾ കുട്ടികളോട്​ ചിലപ്പോൾ ആ​ശ്ലേഷിക്കാനോ ചുംബിക്കാനോ ആവശ്യപ്പെ​ട്ടേക്കാം. ഇതേ രീതി തന്നെ ലൈംഗിക അതിക്രമം നടത്തുന്നവരും പ്രയോഗിച്ചേക്കാം. എങ്ങനെ സ്​നേഹ പ്രകടനം നടത്താം എന്ന്​ കുട്ടികളെ നിർബന്ധമായും പഠിപ്പിക്കുക.

കുട്ടികളിലെ രഹസ്യാത്മകത അപകടകരമാണ്​. പലപ്പോഴും സംഭവിച്ചതിനെക്കുറിച്ചും ആര്​ ചെയ്​തുവെന്നതിനെക്കുറിച്ചും കുട്ടികൾ തുറന്നുപറയാൻ മടിക്കുന്നു. കാര്യങ്ങൾ രഹസ്യമാക്കി വെക്കുന്നതിലെ അപകടം അവരെ പറഞ്ഞുമനസിലാക്കുക. 

ആരെയെല്ലാം വിശ്വസിക്കാമെന്നും അടുപ്പിക്കാമെന്നും കുട്ടികളോട്​ പറയുക. ഇത്തരം ആളുകളെ തെരഞ്ഞെടുക്കു​മ്പോള്‍ രക്ഷിതാക്കൾ അതീവ ശ്രദ്ധപുലർത്തുകയും വേണം. കുട്ടിയുടെ അധ്യാപകൻ, കൂട്ടുകാർ, ഇടപഴകുന്ന മറ്റുള്ളവർ എന്നിവരെക്കുറിച്ചെല്ലാം രക്ഷിതാക്കൾ അറിഞ്ഞിരിക്കണം.  നമ്മുടെ കുട്ടികൾക്ക്​ ചുറ്റും അരക്ഷിതത്വം ഉണ്ടെന്ന്​ രക്ഷിതാക്കൾ തിരിച്ചറിയുക.