മധുരത്തോട് 'നോ': ജെൻ സി ട്രെൻഡായി മാറുന്ന 'ഷുഗർ കട്ട്' ഡയറ്റ്

നമ്മുടെ ഭക്ഷണമേശയിലെ ഏറ്റവും വലിയ വില്ലൻ ആരാണെന്ന് ചോദിച്ചാൽ ഇന്ന് പുതിയ തലമുറയ്ക്ക് ഒരൊറ്റ ഉത്തരമേയുള്ളൂ അത് പഞ്ചസാരയാണ്. ഒരു കാലത്ത് മധുരം സന്തോഷത്തിന്റെ അടയാളമായിരുന്നെങ്കിൽ, ഇന്ന് ജെൻ സി യുവാക്കൾക്കിടയിൽ അത് ഒരു ഹെൽത്ത് ചലഞ്ചാണ്. 

ഇന്നത്തെ കാലത്ത് സോഷ്യൽ മീഡിയ പ്ലാറ്റ്‌ഫോമുകളായ ഇൻസ്റ്റാഗ്രാമിലും ടിക് ടോക്കിലും പുതിയൊരു വിപ്ലവം നടക്കുകയാണ്. ഫാഷനോ മ്യൂസിക്കോ ഒന്നുമല്ല ഇത്, മറിച്ച് ആരോഗ്യകരമായ ഒരു ശീലമാണ് 'ഷുഗർ കട്ട്' . പഞ്ചസാര പൂർണ്ണമായും അല്ലെങ്കിൽ വലിയൊരു അളവ് വരെ ഭക്ഷണത്തിൽ നിന്ന് ഒഴിവാക്കുന്ന ഈ രീതി ഇന്ന് ജെൻ സി യുവാക്കൾക്കിടയിൽ വലിയ തരംഗമായി മാറിക്കഴിഞ്ഞു.

എന്താണ് ഈ ഷുഗർ കട്ട് ട്രെൻഡ്?

ഭക്ഷണത്തിലെ 'ഹിഡൻ ഷുഗർ' അഥവാ മറഞ്ഞിരിക്കുന്ന പഞ്ചസാരയെ തിരിച്ചറിഞ്ഞ് അവ ഒഴിവാക്കുന്ന രീതിയാണിത്. കേവലം ചായയിലെ പഞ്ചസാര മാത്രമല്ല, ബ്രെഡ്, സോസുകൾ, കോളകൾ, പാക്ക് ചെയ്ത പലഹാരങ്ങൾ എന്നിവയെല്ലാം ഇതിന്റെ പരിധിയിൽ വരും. കേവലം തടി കുറയ്ക്കാനല്ല, മറിച്ച് 'സ്കിൻ കെയർ', 'മെന്റൽ ഹെൽത്ത്' എന്നിവയ്ക്കാണ് ഇവർ മുൻഗണന നൽകുന്നത്.

എന്തുകൊണ്ട് ജെൻ സി പഞ്ചസാര ഒഴിവാക്കുന്നു?

• തിളക്കമുള്ള ചർമ്മം : പഞ്ചസാര അമിതമായി കഴിക്കുന്നത് ചർമ്മത്തിലെ കൊളാജനെ നശിപ്പിക്കുകയും മുഖക്കുരുവിനും ചുളിവുകൾക്കും കാരണമാവുകയും ചെയ്യും. 'ഷുഗർ ഫ്രീ' ചലഞ്ചുകൾക്ക് ശേഷം തങ്ങളുടെ ചർമ്മം കൂടുതൽ തെളിഞ്ഞുവെന്ന് പല ഇൻഫ്ലുവൻസർമാരും സാക്ഷ്യപ്പെടുത്തുന്നു.
• ഊർജ്ജം നിലനിർത്താൻ: പഞ്ചസാര കഴിക്കുമ്പോൾ പെട്ടെന്ന് ഊർജ്ജം ലഭിക്കുമെങ്കിലും, അത് വേഗത്തിൽ തന്നെ കുറയുകയും നമ്മെ ക്ഷീണിപ്പിക്കുകയും ചെയ്യും. ഇത് ഒഴിവാക്കി പകരം 'സ്റ്റേബിൾ എനർജി' ലഭിക്കാൻ മധുരം കുറയ്ക്കുന്നത് സഹായിക്കുന്നു.
• മാനസികാരോഗ്യം: ഉയർന്ന അളവിൽ പഞ്ചസാര കഴിക്കുന്നത് ഉത്കണ്ഠയ്ക്കും മൂഡ് സ്വിങ്സിനും കാരണമാകുമെന്ന് പഠനങ്ങൾ പറയുന്നു. ക്ലിയർ ആയി ചിന്തിക്കാനും മാനസിക സന്തോഷത്തിനും ജെൻ സി മധുരം കുറയ്ക്കുന്നു.

ശ്രദ്ധിക്കേണ്ട കാര്യങ്ങൾ

നിങ്ങളും ഒരു 'ഷുഗർ കട്ട്' പരീക്ഷിക്കാൻ ഒരുങ്ങുകയാണോ? എങ്കിൽ ഇവ ശ്രദ്ധിക്കുക:

• പെട്ടെന്ന് നിർത്തരുത്: പഞ്ചസാര പെട്ടെന്ന് നിർത്തുന്നത് തലവേദനയ്ക്കും ക്ഷീണത്തിനും കാരണമായേക്കാം. പടിപടിയായി കുറയ്ക്കുക.
• പകരക്കാരെ കണ്ടെത്തുക: ശർക്കര, ഈന്തപ്പഴം, തേൻ എന്നിവ മിതമായ അളവിൽ ഉപയോഗിക്കാം. എങ്കിലും ഇവയിലും കലോറി ഉണ്ടെന്നത് മറക്കരുത്.
• ലേബലുകൾ വായിക്കുക: സൂപ്പർമാർക്കറ്റുകളിൽ നിന്ന് വാങ്ങുന്ന പാക്കറ്റുകളിൽ 'High Fructose Corn Syrup' അല്ലെങ്കിൽ 'Dextrose' എന്ന് കണ്ടാൽ അത് പഞ്ചസാര തന്നെയാണ്.

വെറുമൊരു ഡയറ്റ് എന്നതിലുപരി, ശരീരത്തോടുള്ള ആദരവായാണ് പുതിയ തലമുറ ഇതിനെ കാണുന്നത്. കേവലം രണ്ടാഴ്ച പഞ്ചസാര ഒഴിവാക്കിയാൽ തന്നെ നിങ്ങളുടെ ഉറക്കത്തിലും ആക്റ്റീവ്‌നെസ്സിലും വരുന്ന മാറ്റം അത്ഭുതകരമായിരിക്കും.