ചർമ്മത്തിന്റെ പ്രായം കുറയ്ക്കാം; നിങ്ങളുടെ ബ്യൂട്ടി കിറ്റിൽ ഉണ്ടായിരിക്കേണ്ട സ്കിൻകെയർ ടൂളുകൾ

സൗന്ദര്യ സംരക്ഷണം എന്നത് ഇന്ന് വെറുമൊരു ക്രീമിലോ സെറത്തിലോ ഒതുങ്ങുന്നില്ല. ആഗോളതലത്തിൽ സ്കിൻകെയർ ഇൻഡസ്ട്രി വലിയൊരു മാറ്റത്തിന് സാക്ഷ്യം വഹിച്ചുകൊണ്ടിരിക്കുകയാണ്. 

തിളങ്ങുന്ന ചർമ്മം ആഗ്രഹിക്കാത്തവരായി ആരുമില്ല. എന്നാൽ തിരക്കേറിയ ജീവിതത്തിനിടയിൽ കൃത്യമായി പാർലറുകളിൽ പോകാനോ ഫേഷ്യൽ ചെയ്യാനോ പലർക്കും സമയം കിട്ടാറില്ല. ഇവിടെയാണ് മോഡേൺ 'സ്കിൻകെയർ ടൂളുകളുടെ' പ്രസക്തി. വെറും ക്രീമുകളും സെറങ്ങളും മാത്രം പോരാ, അവ ചർമ്മത്തിലേക്ക് ആഴ്ന്നിറങ്ങാനും ഫലം നൽകാനും ചില ഉപകരണങ്ങൾ കൂടി സഹായിക്കും. നിങ്ങളുടെ ചർമ്മത്തിന് പുതുജീവൻ നൽകാൻ സഹായിക്കുന്ന അഞ്ച് അത്യാവശ്യം സ്കിൻകെയർ ടൂളുകൾ ഏതൊക്കെയാണെന്ന് നോക്കാം.

ജെഡ് റോളർ & റോസ് ക്വാർട്സ് റോളറുകൾ

ലിംഫറ്റിക് ഡ്രെയിനേജ് എന്ന ശാസ്ത്രീയ തത്വത്തെ അടിസ്ഥാനമാക്കിയാണ് ഇവ പ്രവർത്തിക്കുന്നത്. ചർമ്മത്തിനടിയിലുള്ള ഫ്ലൂയിഡ് കെട്ടിക്കിടക്കുന്നത് ഒഴിവാക്കി രക്തചംക്രമണം സുഗമമാക്കാൻ ഈ കല്ലുകൾ സഹായിക്കുന്നു. മുഖത്തിന്റെ മധ്യഭാഗത്ത് നിന്ന് ചെവിക്ക് അടുത്തേക്ക് എന്ന രീതിയിൽ വേണം ഇത് ചലിപ്പിക്കാൻ. കണ്ണിന് താഴെയുള്ള ഭാഗത്ത് ചെറിയ റോളർ ഉപയോഗിക്കുക. രാവിലെ എഴുന്നേൽക്കുമ്പോൾ മുഖത്തുണ്ടാകുന്ന നീർക്കെട്ട് തൽക്ഷണം മാറ്റാൻ ഇത് സഹായിക്കും. തുടർച്ചയായി ഉപയോഗിക്കുന്നത് ചർമ്മത്തിന് സ്വാഭാവികമായ തിളക്കം നൽകും. ഉപയോഗിക്കുന്നതിന് മുൻപ് 10 മിനിറ്റ് ഫ്രിഡ്ജിൽ വെച്ച് തണുപ്പിച്ചാൽ ഇരട്ടി ഫലം ലഭിക്കും.

ഗ്വാ ഷാ

മുഖത്തെ മസിലുകൾക്ക് ഒരു വർക്കൗട്ട് നൽകുന്നത് പോലെയാണ് ഗ്വാ ഷാ ഉപയോഗിക്കുന്നത്. പരന്ന കല്ല് ഉപയോഗിച്ച് ചർമ്മത്തിൽ നൽകുന്ന മസാജ് മുഖത്തിന് ഒരു 'നാച്ചുറൽ ലിഫ്റ്റിംഗ്' നൽകും. സ്ഥിരമായി ഉപയോഗിച്ചാൽ താടിയെല്ലുകൾക്കും കവിൾത്തടങ്ങൾക്കും നല്ല ഷേപ്പ് ലഭിക്കും. പ്രായം കൂടുന്നതിനനുസരിച്ച് ചർമ്മം തൂങ്ങുന്നത് തടയാൻ ഇതിലും നല്ലൊരു വഴിയുണ്ടാവില്ല.

ഫേഷ്യൽ സ്റ്റീമർ

മുഖം കഴുകിയാലും ചർമ്മത്തിലെ സുഷിരങ്ങളിൽ അഴുക്ക് അവശേഷിക്കാറുണ്ട്. ആഴ്ചയിലൊരിക്കൽ ഫേഷ്യൽ സ്റ്റീമർ ഉപയോഗിക്കുന്നത് ചർമ്മം ആഴത്തിൽ വൃത്തിയാക്കാൻ സഹായിക്കും. ആവി പിടിക്കുമ്പോൾ സുഷിരങ്ങൾ തുറക്കുകയും ബ്ലാക്ക് ഹെഡ്‌സ്, വൈറ്റ് ഹെഡ്‌സ് എന്നിവ നീക്കം ചെയ്യാൻ എളുപ്പമാവുകയും ചെയ്യുന്നു. ഇതിന് ശേഷം പുരട്ടുന്ന സെറങ്ങൾ ചർമ്മം വേഗത്തിൽ വലിച്ചെടുക്കും.

ഇലക്ട്രിക് ഫേഷ്യൽ ക്ലീൻസിംഗ് ബ്രഷ്

വെറും കൈകൾ കൊണ്ട് മുഖം കഴുകുമ്പോൾ നീക്കം ചെയ്യാൻ പറ്റാത്ത അഴുക്കുകൾ നീക്കാൻ ഈ ബ്രഷ് സഹായിക്കും. വളരെ സോഫ്റ്റ് ആയ നാരുകൾ കൊണ്ട് നിർമ്മിച്ച ഈ ബ്രഷ് വൈബ്രേഷൻ സാങ്കേതികവിദ്യയിലാണ് പ്രവർത്തിക്കുന്നത്. മൃതകോശങ്ങളെ നീക്കം ചെയ്ത് ചർമ്മത്തിന് തൽക്ഷണം തിളക്കം നൽകാൻ ഇത് സഹായിക്കുന്നു. പ്രത്യേകിച്ച് മേക്കപ്പ് സ്ഥിരമായി ഉപയോഗിക്കുന്നവർക്ക് ഇത് ഒരു 'മസ്റ്റ് ഹാവ്' ടൂളാണ്.

ഐസ് റോളർ

വെയിലിൽ പോയി വന്ന് മുഖം കരുവാളിച്ചിരിക്കുകയാണോ? എങ്കിൽ ഐസ് റോളർ എടുത്തു പതുക്കെ മുഖത്ത് മസാജ് ചെയ്യുക. ചർമ്മത്തിലെ അമിതമായ ചൂടും ചുവപ്പും മാറ്റാൻ ഇത് സഹായിക്കും. കൂടാതെ മുഖത്തെ സുഷിരങ്ങൾ ചെറുതാക്കാനും ചർമ്മം കൂടുതൽ ടൈറ്റ് ആക്കാനും ഐസ് റോളർ മികച്ചതാണ്.

ഈ ഉപകരണങ്ങളെല്ലാം ഉപയോഗിക്കുന്നതിനേക്കാൾ പ്രധാനമാണ് അവയുടെ ശുചിത്വം. ഓരോ തവണ ഉപയോഗിച്ച ശേഷവും ഈ ടൂളുകൾ ആൽക്കഹോൾ വൈപ്‌സോ സോപ്പ് വെള്ളമോ ഉപയോഗിച്ച് വൃത്തിയാക്കണം. ഇല്ലെങ്കിൽ അണുക്കൾ പടരാൻ സാധ്യതയുണ്ട്. കൂടാതെ, ചർമ്മത്തിൽ വലിയ രീതിയിലുള്ള ഇൻഫെക്ഷനുകളോ മുറിവുകളോ ഉണ്ടെങ്കിൽ ഡോക്ടറുടെ നിർദ്ദേശമില്ലാതെ ഇവ ഉപയോഗിക്കരുത്.