ഇൻസ്റ്റാഗ്രാമിൽ തരംഗമായി 'ബെബോട്ട്' ബ്യൂട്ടി ട്രെൻഡ്; എന്താണ് ഈ പുത്തൻ സൗന്ദര്യ സങ്കൽപ്പം?

സോഷ്യൽ മീഡിയ ലോകത്ത് ഓരോ ദിവസവും പുതിയ ട്രെൻഡുകൾ പ്രത്യക്ഷപ്പെടാറുണ്ട്. എന്നാൽ ഇപ്പോൾ ഇൻസ്റ്റാഗ്രാം റീൽസുകളിലും ടിക് ടോക്കിലും വൈറലായിരിക്കുന്നത്  'ബെബോട്ട്'  ട്രെൻഡാണ്. Y2K ഫാഷൻ രീതികളെയും മേക്കപ്പ് ശൈലികളെയും പുനർജീവിപ്പിക്കുന്ന ട്രെൻഡാണിത്.

ഇൻസ്റ്റാഗ്രാമിലും ടിക് ടോക്കിലും ഇപ്പോൾ തരംഗമായിക്കൊണ്ടിരിക്കുന്ന പുത്തൻ ബ്യൂട്ടി ട്രെൻഡാണ് 'ബെബോട്ട്'. സോഷ്യൽ മീഡിയ ഏറ്റെടുത്ത ഈ ട്രെൻഡ്, ഫിലിപ്പിനോ സൗന്ദര്യ സങ്കൽപ്പങ്ങളെയും 2000ത്തിലെ നോസ്റ്റാൾജിയയെയും പുനർജീവിപ്പിക്കുകയാണ്.

ഫിലിപ്പിനോ ഭാഷയിൽ 'സുന്ദരിയായ പെൺകുട്ടി' അല്ലെങ്കിൽ 'ഹോട്ട് ഗേൾ' എന്നാണ് 'ബെബോട്ട്' എന്ന വാക്കിന്റെ അർത്ഥം. 2005-ൽ പുറത്തിറങ്ങിയ വിഖ്യാത സംഗീത ബാൻഡ് ആയ 'ബ്ലാക്ക് ഐഡ് പീസ്' പാടിയ 'Bebot' എന്ന ഗാനമാണ് ഈ ട്രെൻഡിന്റെ ആധാരം. രണ്ട് പതിറ്റാണ്ടിന് ശേഷം 2026-ൽ ഈ ഗാനം വീണ്ടും വൈറലായതോടെ, അന്നത്തെ കാലത്തെ മേക്കപ്പ് സ്റ്റൈലുകളും ഫാഷനും ഇന്റർനെറ്റിൽ തരംഗമായി.

വെറുമൊരു മേക്കപ്പ് വീഡിയോ എന്നതിലുപരി, ഫിലിപ്പിനോ സംസ്കാരത്തെയും തനിമയെയും ആഘോഷിക്കുന്ന ഒന്നുകൂടിയാണ് ഈ ട്രെൻഡ്. ഇൻസ്റ്റാഗ്രാം റീൽസുകളിൽ തങ്ങളുടെ സാധാരണ ലുക്കിൽ നിന്നും പെട്ടെന്ന് ഗ്ലാമറസായ 'ബെബോട്ട്' ലുക്കിലേക്കുള്ള മാറ്റമാണ് പലരും പങ്കുവെക്കുന്നത്.

ബെബോട്ട് ലുക്കിന്റെ പ്രത്യേകതകൾ

2000 ത്തിൻ്റെ തുടക്കത്തിൽ നിലനിന്നിരുന്ന Y2K ബ്യൂട്ടി സ്റ്റൈലാണ് ഇതിന്റെ പ്രധാന ആകർഷണം. ക്ലീൻ ഗേൾ മേക്കപ്പുകളിൽ നിന്നും മാറി, അല്പം ബോൾഡ് ആയ മേക്കപ്പാണ് ഇതിൽ ഉപയോഗിക്കുന്നത്.

• നേർത്ത പുരികങ്ങൾ : ഇന്നത്തെ കട്ടിയുള്ള പുരികങ്ങൾക്ക് പകരം, 2000-കളിലെ പോലെ വളരെ കൃത്യമായി വരച്ച നേർത്ത പുരികങ്ങളാണ് ഈ ലുക്കിന്റെ ഹൈലൈറ്റ്.
• ഫ്രോസ്റ്റഡ് ഐഷാഡോ: വെള്ളി, നീല അല്ലെങ്കിൽ ഇളം പിങ്ക് നിറങ്ങളിലുള്ള തിളക്കമുള്ള ഐഷാഡോകൾ കണ്ണുകൾക്ക് നൽകുന്നു.
• ഗ്ലോസി ലിപ്സ് : ചുണ്ടുകൾക്ക് കൂടുതൽ തിളക്കം നൽകുന്ന ലിപ് ഗ്ലോസുകൾ ഉപയോഗിക്കുന്നു. കടുപ്പമുള്ള ലിപ് ലൈനറും ഇതിന്റെ പ്രത്യേകതയാണ്.
• സൺ കിസ്ഡ് ലുക്ക് : വെയിലേറ്റാൽ കിട്ടുന്ന തരം തിളക്കം ചർമ്മത്തിന് നൽകാനായി ബ്രോൺസറുകൾ ധാരാളമായി ഉപയോഗിക്കുന്നു.

എങ്ങനെ 'ബെബോട്ട്' ലുക്ക് സ്വന്തമാക്കാം?

നിങ്ങൾക്കും ഈ ഇൻസ്റ്റാഗ്രാം ട്രെൻഡിന്റെ ഭാഗമാകണമെങ്കിൽ ഈ സ്റ്റെപ്പുകൾ പിന്തുടരാം:

• ബേസ് മേക്കപ്പ്: നിങ്ങളുടെ ചർമ്മത്തിന് തിളക്കം നൽകുന്ന തരം ഫൗണ്ടേഷൻ ഉപയോഗിക്കുക. ബ്രോൺസർ ഉപയോഗിച്ച് മുഖം ഷേപ്പ് ചെയ്യുക .
• കണ്ണുകൾ: സിൽവർ അല്ലെങ്കിൽ ഷിമ്മർ ഐഷാഡോ കൺപോളകളിൽ പുരട്ടുക. കണ്ണ് എഴുതാൻ കറുത്ത ഐലൈനർ ഉപയോഗിച്ച് സ്മഡ്ജ് ചെയ്യുന്നത് കൂടുതൽ ഭംഗി നൽകും.
• പുരികം: ഒരു പുരികം പെൻസിൽ ഉപയോഗിച്ച് നേർത്തതും കൃത്യമായ ഷേപ്പിലുള്ളതുമായ പുരികങ്ങൾ വരയ്ക്കുക.
• ചുണ്ടുകൾ: ഡാർക്ക് ബ്രൗൺ ലിപ് ലൈനർ കൊണ്ട് ചുണ്ടുകൾ വരച്ച ശേഷം നടുവിൽ ഇളം നിറത്തിലുള്ള ഗ്ലോസ് പുരട്ടുക.
• ഹെയർസ്റ്റൈൽ: 2000-കളിലെ പോപ്പുലർ ഹെയർസ്റ്റൈലായ 'പഫ്' എടുത്തോ അല്ലെങ്കിൽ മുടി ലൂസ് ആയി ഇട്ടോ ലുക്ക് പൂർത്തിയാക്കാം.

എന്തുകൊണ്ട് ഈ ട്രെൻഡ് ഇപ്പോൾ ഇത്ര വൈറലാകുന്നു?

സൗന്ദര്യ സങ്കൽപ്പങ്ങൾ എപ്പോഴും മാറിക്കൊണ്ടിരിക്കും. മിനിമലിസ്റ്റിക് മേക്കപ്പുകൾ മടുക്കുമ്പോഴാണ് ആളുകൾ പഴയകാലത്തെ അല്പം 'ഡ്രാമാറ്റിക്' മേക്കപ്പ് രീതികളിലേക്ക് തിരിച്ചുപോകുന്നത്. കൂടാതെ, ലോകത്തിന്റെ വിവിധ ഭാഗങ്ങളിൽ നിന്നുള്ള സംഗീതവും ഫാഷനും ഇൻസ്റ്റാഗ്രാമിലൂടെ അതിരുകളില്ലാതെ പ്രചരിക്കുകയും ചെയ്യുന്നു. ഫിലിപ്പിനോ താരങ്ങളും വിദേശ ഇൻഫ്ലുവൻസർമാരും ഒരുപോലെ ഈ ട്രെൻഡ് ഏറ്റെടുത്തതോടെ, ഇൻസ്റ്റാഗ്രാം ഫീഡുകൾ ഇപ്പോൾ 'ബെബോട്ട്' മയമാണ്. മലയാളി ഇൻഫ്ലുവൻസർമാരും തങ്ങളുടെ വേർഷൻ ബെബോട്ട് വീഡിയോകളുമായി ഇപ്പോൾ സോഷ്യൽ മീഡിയയിൽ സജീവമാണ്.