നെഞ്ചുവേദന, ആശുപത്രിയിലേക്ക് പോകും വഴി ബൈക്കില് ബസ് ഇടിച്ച് റോഡിലേക്ക് വീണു, വയോധികയ്ക്ക് ദാരുണാന്ത്യം
Synopsis
സഹോദരനൊപ്പം ബൈക്കില് പോവുകയായിരുന്ന 62 കാരി ബൈക്കിൽ ബസ് തട്ടി റോഡിലേക്ക് വീണു. പിന്നാലെ ഇതേ ബസിന്റെ ടയർ ഇവരുടെ ദേഹത്ത് കയറിയാണ് ദാരുണാന്ത്യം
കോഴിക്കോട്: നെഞ്ചുവേദനയെ തുടര്ന്ന് സഹോദരനൊപ്പം ബൈക്കില് പോവുകയായിരുന്ന വീട്ടമ്മക്ക് വാഹനാപകടത്തില് ദാരുണാന്ത്യം. എരഞ്ഞിപ്പാലം രാരിച്ചന് റോഡ് വലിയപറമ്പത്ത് പിപി വില്ലയില് വിലാസിനി(62) ആണ് മരിച്ചത്. എരഞ്ഞിപ്പാലം ജംഗ്ഷനില് വെച്ച് കഴിഞ്ഞ ദിവസം ഉച്ചയോടെയാണ് അപകടമുണ്ടായത്. ശാരീരിക അസ്വസ്ഥതകള് അനുഭവപ്പെട്ടതിനെ തുടര്ന്ന് സഹോദരന് ഗോപിക്കൊപ്പം എരഞ്ഞിപ്പാലത്തെ സ്വകാര്യ ആശുപത്രിയിലേക്ക് പോവുകയായിരുന്നു ഇവര്.
ബസ് തട്ടി റോഡിലേക്ക് തെറിച്ചുവീണ വിലാസിനിയുടെ തലയിലൂടെ ഇതേ ബസിന്റെ ടയര് കയറിയിറങ്ങുകയായിരുന്നു. മലാപ്പറമ്പ് ഭാഗത്തേക്ക് പോവുകയായിരുന്ന സിറ്റി ബസ്സാണ് അപകടമുണ്ടാക്കിയത്. വിലാസിനി സംഭവസ്ഥലത്ത് വെച്ചുതന്നെ മരിച്ചു. മൃതദേഹം മെഡിക്കല് കോളേജ് ആശുപത്രി മോര്ച്ചറിയില് സൂക്ഷിച്ചിരിക്കുകയാണ്. ഇന്ക്വസ്റ്റ്, പോസ്റ്റ്മോര്ട്ടം നടപടികള്ക്ക് ശേഷം ബന്ധുക്കള്ക്ക് വിട്ടുനല്കും. അയ്യപ്പന്-ജാനു ദമ്പതികളുടെ മകളാണ് അവിവാഹിതയായ വിലാസിനി. മറ്റു സഹോദരങ്ങള്: ശോഭന, രാജന്, ബാബു, ബേബി, അജിത, അനിത.
ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam