ഡ്രോണ്‍ ഉപയോഗിച്ച് മരുന്ന് തളിക്കാനെത്തിയവര്‍ സഞ്ചരിച്ച വാഹനം കത്തിനശിച്ചു, സംഭവം തൃശ്ശൂരില്‍

വടക്കാഞ്ചേരി ഫയർഫോഴ്സ് സ്ഥലത്തെത്തി തീ അണച്ചു. തീപിടിക്കാനുണ്ടായ കാരണം വ്യക്തമല്ല.

തൃശ്ശൂര്‍: തൃശ്ശൂർ ചേലക്കരയിൽ നിർത്തിയിട്ട വാഹനത്തിന് തീപിടിച്ചു. ചേലക്കര അന്തിമഹാകാളൻകാവ് പ്രദേശത്ത് റോഡിൽ നിർത്തിയിട്ട് ഒമിനി  വാഹനത്തിനാണ് തീ പിടിച്ചത്. നെൽപ്പാടത്ത് ഡ്രോൺ ഉപയോഗിച്ച് മരുന്ന് തളിക്കാൻ ആളുകൾ എത്തിയ വാഹനമാണ് തീ പിടിച്ചത്. ആളപായം ഒന്നുമില്ല. ചേലക്കര പൊലീസ് സ്ഥലത്തെത്തി. വടക്കാഞ്ചേരി ഫയർഫോഴ്സ് സ്ഥലത്തെത്തി തീ അണച്ചു. തീപിടിക്കാനുണ്ടായ കാരണം വ്യക്തമല്ല.

ഇതിനിടെ, ഇന്ന് രാവിലെ ഷൊര്‍ണ്ണൂരില്‍ ഹോം അപ്ലയന്‍സ് കടയില്‍ തീപിടിത്തമുണ്ടായി. ഷൊര്‍ണൂര്‍ പൊലീസ് സ്റ്റേഷന് മുന്‍വശത്തെ ഹോം അപ്ലയന്‍സ് കടയിലാണ് തീപിടിത്തം. ന്യൂരാധ എന്റര്‍ പ്രൈസസിലാണ് തീപിടിത്തമുണ്ടായത്. രാവിലെ 9.30 ഓടെയാണ് പുക ഉയരുന്നത് ശ്രദ്ധയില്‍പെട്ടത്. ഏറെ നേരത്തെ ശ്രമത്തിനൊടുവിലാണ് തീ നിയന്ത്രണ വിധേയമാക്കിയത്.