അഭിമാന നിമിഷം! ഡൽഹിയിലെ റിപ്പബ്ലിക് ദിന പരേഡിലേക്ക് കൊച്ചിയിൽ നിന്നൊരു പെൺകുട്ടി; കര്‍ത്തവ്യപഥത്തിൽ നൃത്തം അവതരിപ്പിക്കാൻ അഭിരാമി

കൊച്ചി നായരമ്പലം സ്വദേശിനിയും ഭരതനാട്യം വിദ്യാർത്ഥിനിയുമായ അഭിരാമി പ്രദീപ്, ഡൽഹിയിലെ കർത്തവ്യപഥത്തിൽ നടക്കുന്ന റിപ്പബ്ലിക് ദിന പരേഡിൽ ചുവടുവെയ്ക്കാൻ തെരഞ്ഞെടുക്കപ്പെട്ടു. 

കൊച്ചി: റിപ്പബ്ലിക് ദിന പരേഡിൽ പങ്കെടുക്കാൻ അവസരം നേടി കൊച്ചി സ്വദേശിനിയും കർണാടകയിലെ അലയൻസ് യൂണിവേഴ്സിറ്റിയിൽ എം എ ഭരതനാട്യം വിദ്യാർത്ഥിനിയുമായ അഭിരാമി പ്രദീപ്. ഡൽഹിയിലെ കര്‍ത്തവ്യപഥത്തിൽ റിപ്പബ്ലിക് ദിനാഘോഷത്തിന്റെ ഭാഗമായി നടക്കുന്ന പ്രധാന പരേഡിലാണ് അഭിരാമി ചുവടുവെയ്ക്കുക.

സംസ്ഥാനതല കലാപരിപാടികളിലും മത്സരങ്ങളിലും മികവ് തെളിയിച്ച കലാകാരിയാണ് നായരമ്പലം സ്വദേശിനിയായ അഭിരാമി. വിവിധ സംസ്ഥാനങ്ങളിൽ നിന്നുള്ള പ്രതിഭകളെ ഉൾപ്പെടുത്തി നടത്തുന്ന ഈ പരേഡിൽ പങ്കെടുക്കുകയെന്നത് വലിയ നേട്ടമായാണ് കണക്കാക്കുന്നത്. സ്കൂൾ കാലം മുതൽ കലാരംഗത്ത് സജീവമായിരുന്ന അഭിരാമി, സർവകലാശാലയിൽ നിന്നുളള പത്തം​ഗ സംഘത്തോടൊപ്പമാണ് ചുവടുവെക്കുക. നൃത്തം ഉൾപ്പെടെ ന​ങ്ങ്യാ​ർ​കൂ​ത്തി​ലും വൃ​ന്ദ​വാ​ദ്യം ഇ​ന​ങ്ങ​ളി​ലും അഭിരാമി മി​ക​വ് തെ​ളി​യിച്ചിട്ടുണ്ട്.

റിപ്പബ്ലിക് ദിനത്തിൽ രാഷ്ട്രപതി അധ്യക്ഷത വഹിക്കുന്ന ദേശീയ പരേഡിൽ സേനാ വിഭാഗങ്ങളും വിവിധ സംസ്ഥാനങ്ങളുടെ സാംസ്കാരിക സംഘങ്ങളും പങ്കെടുക്കുന്നുണ്ട്. രാജ്യത്തിന്റെ ഐക്യവും വൈവിധ്യവും ഒരുമിച്ച് അവതരിപ്പിക്കുന്ന ഈ വേദിയിൽ പങ്കെടുക്കാൻ അവസരം ലഭിച്ചതിന്റെ അഭിമാനത്തിലാണ് അഭിരാമിയും കുടുംബവും.