ടാക്സി ഡ്രൈവറെ വെട്ടിക്കൊല്ലാൻ ശ്രമിച്ച കേസ് : പ്രതികൾ 29 വർഷത്തിന് ശേഷം അറസ്റ്റിൽ

1997-ൽ പേരൂരിൽ ടാക്സി ഡ്രൈവറെ വെട്ടിക്കൊലപ്പെടുത്താൻ ശ്രമിച്ച കേസിലെ പ്രതികളെ 29 വർഷത്തിന് ശേഷം ഏരൂർ പൊലീസ് അറസ്റ്റ് ചെയ്തു.

കൊല്ലം: ടാക്സി ഡ്രൈവറെ വെട്ടിക്കൊലപ്പെടുത്താൻ ശ്രമിച്ച കേസിലെ പ്രതികളെ 29 വർഷത്തിന് ശേഷം ഏരൂർ പൊലീസ് അറസ്റ്റ് ചെയ്തു. ഒന്നാം പ്രതി ഏരൂർ കരിമ്പിൻകോണം തലയ്ക്കൽ പുത്തൻവീട്ടിൽ സുനിൽ കുമാർ (52), നാലാം പ്രതി അശോക മന്ദിരത്തിൽ അജിത്താണ് (49) എന്നിവരാണ് അറസ്റ്റിലായത് . രണ്ടാംപ്രതി നിലവിൽ വിചാരണ നേരിടുകയാണ്. മൂന്നാം പ്രതി കേസിന്റെ വിചാരണയ്ക്കിടെ മരണപ്പെട്ടു. 1997-ൽ ആണ് കേസിന് ആസ്പദമായ സംഭവം ഉണ്ടായത്. പേരൂരിൽ ടാക്സി ഡ്രൈവറായ ഷൈജുവിനെ നാൽവർ സംഘം കൊലപ്പെടുത്താൻ ശ്രമിച്ചു. സംഘർഷത്തിനിടെ ഷൈജുവിനെ വലതു കൈപ്പത്തി വെട്ടി മാറ്റി. പ്രതികൾക്ക് സെഷൻ കോടതി ആറുവർഷം കഠിനതടവ് വിധിച്ചിരുന്നു. ഇതിനെതിരെ പ്രതികൾ ഹൈക്കോടതിയിൽ അപ്പീൽ നൽകിയിരുന്നു. പക്ഷേ ഹൈക്കോടതി സെക്ഷൻ കോടതിയുടെ ഉത്തരവ് ശരിവെക്കുകയായിരുന്നു. വാദിയായ ഷൈജുവും ഇതിനിടെ മരിച്ചു.