ഹോട്ടലിന് മുന്നിൽ സ്കൂട്ടർ നിർത്തിയതേ ഓർമ്മയുള്ളു; തിരിച്ചിറങ്ങിയപ്പോൾ കാണാനില്ല; സിസിടിവി നോക്കി മണിക്കൂറുകൾക്കുള്ളിൽ പ്രതിയെ തൂക്കി
Synopsis
കോഴിക്കോട് കുന്ദമംഗലത്ത് ഹോട്ടലിന് മുന്നിൽ നിർത്തിയിട്ട സ്കൂട്ടർ മോഷ്ടിച്ച ആന്ധ്ര സ്വദേശിയെ പോലീസ് മണിക്കൂറുകൾക്കുള്ളിൽ പിടികൂടി
കോഴിക്കോട്: ഹോട്ടലിന് മുന്നില് താക്കോല് സഹിതം നിര്ത്തിയിട്ട സ്കൂട്ടറുമായി കടന്നുകളഞ്ഞ ആന്ധ്ര സ്വദേശി പിടിയില്. ഐ ഐം കാന്റീനിലെ ഡ്രൈവറായി ജോലി ചെയ്യുന്ന കല്ലുരു ഒബ്ലേസു (40) വിനെയാണ് കുന്ദമംഗലം പൊലീസ് അറസ്റ്റ് ചെയ്തത്. ഇന്നലെ രാത്രി കുന്ദമംഗലത്തുള്ള സംഗമം ഹോട്ടലിന് മുന്പിലായിരുന്നു സംഭവം. വെള്ളന്നൂര് സ്വദേശിയായ അരുണ് ചാവി സ്കൂട്ടറില് തന്നെ വച്ച് ഹോട്ടലില് പോയ തക്കത്തിനാണ് മോഷണം നടന്നത്.
പരാതി ലഭിച്ചതിനെ തുടര്ന്ന് സ്ഥലത്തെത്തിയ പൊലീസ് സമീപ പ്രദേശങ്ങളിലെ സി സി ടി വി ദൃശ്യങ്ങള് പരിശോധിച്ചപ്പോള് ഇയാള് സ്കൂട്ടറുമായി താമരശ്ശേരി ഭാഗത്തേക്കാണ് പോയതെന്ന് വ്യക്തമായി. പ്രതിയെ പിന്തുടര്ന്ന പൊലീസ് അടിവാരത്ത് വച്ച് സ്കൂട്ടര് സഹിതം ഇയാളെ അറസ്റ്റ് ചെയ്യുകയായിരുന്നു. കുന്ദമംഗലം ഇന്സ്പെക്ടര് കിരണിന്റെ നേതൃത്വത്തില് എസ് ഐ നിധിന്, സി പി ഒമാരായ രതീഷ്, ഷമീര് എന്നിവര് ചേര്ന്നാണ് ഒബ്ലേസുവിനെ അറസ്റ്റ് ചെയ്തത്. കോടതിയില് ഹാജരാക്കിയ ഇയാളെ റിമാൻഡ് ചെയ്തു.
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam