നായ്ക്കൾ കൂട്ടത്തോടെ തുരത്തി, രക്ഷപ്പെടാൻ ഓടി വന്ന് ചാടിയത് ആഴമുള്ള കിണറ്റിൽ; പനമണ്ണയിൽ പുള്ളിമാനെ രക്ഷിച്ച് വനപാലകർ

പാലക്കാട് ഒറ്റപ്പാലം പനമണ്ണയിൽ നായ്ക്കൾ ഓടിച്ചതിനെ തുടർന്ന് കിണറ്റിൽ വീണ പുള്ളിമാനെ രക്ഷപ്പെടുത്തി. വനപാലകരും നാട്ടുകാരും ചേർന്നാണ് മാനിനെ പുറത്തെടുത്തത്. മാനിനെ അനങ്ങൻ മല വനമേഖലയിലേക്ക് തുറന്നുവിടുമെന്ന് അധികൃതർ അറിയിച്ചു.

പാലക്കാട്: ഒറ്റപ്പാലം പനമണ്ണയിൽ കിണറ്റിൽപ്പെട്ട പുള്ളിമാനിനെ രക്ഷപ്പെടുത്തി. രണ്ട് വയസ് പ്രായം തോന്നിക്കുന്ന മാനാണ് ആഴമേറിയ കിണറ്റിൽ അകപ്പെട്ടത്. പനമണ്ണ പള്ളിക്കുന്ന് പണ്ഡാരപറമ്പിൽ മുഹമ്മദിൻ്റെ വീട്ടുമുറ്റത്തെ കിണറാണു മാനിനു കെണിയായത്. നായ്ക്കൾ കൂട്ടത്തോടെ തുരത്തിയപ്പോൾ ഓടി രക്ഷപ്പെടാനുള്ള ശ്രമത്തിനിടെയാണു മാൻ കിണറ്റിൽ വീണത്.

വനപാലകരെത്തി പ്രദേശവാസികളുടെ സഹായത്തോടെ വൈകീട്ടു നാലോടെയാണ് മാനിനെ പുറത്തെത്തിച്ചത്. അനങ്ങൻ മല വനമേഖലയോടു ചേർന്നുള്ള പ്രദേശമാണിത്. മാനിന് ആരോഗ്യപ്രശ്നങ്ങൾ ഇല്ലെന്നും സുരക്ഷിതമായി വനമേഖയിലേക്ക് തുറന്നുവിടുമെന്നും വനം വകുപ്പ് അറിയിച്ചു.