നിയന്ത്രണംവിട്ട ബസ് വൈദ്യുതി പോസ്റ്റില്‍ ഇടിച്ച് മറിഞ്ഞു; നിരവധി പേര്‍ക്ക് പരിക്ക്

എളേറ്റില്‍ വട്ടോളിയില്‍ സ്വകാര്യ ബസ് നിയന്ത്രണം വിട്ട് മറിഞ്ഞ് നിരവധി പേര്‍ക്ക് പരിക്കേറ്റു. 

കോഴിക്കോട്: സ്വകാര്യ ബസ് നിയന്ത്രണം വിട്ട് മറിഞ്ഞ് നിരവധി പേര്‍ക്ക് പരിക്കേറ്റു. എളേറ്റില്‍ വട്ടോളി-പാലങ്ങാട് റോഡില്‍ എളേറ്റില്‍ വട്ടോളിയിലെ ഭാരത് പെട്രോള്‍ പമ്പിന് സമീപമാണ് അപകടമുണ്ടായത്. എളേറ്റില്‍ വട്ടോളിയില്‍ നിന്നും ഒടുപാറ വഴി നരിക്കുനിയിലേക്ക് സര്‍വീസ് നടത്തുന്ന ബുസ്താന എന്ന ബസ്സാണ് അപകടത്തില്‍പ്പെട്ടത്.

നിയന്ത്രണം വിട്ട ബസ് വൈദ്യുതി പോസ്റ്റില്‍ ഇടിച്ച് മറിയുകയായിരുന്നു. പരിക്കേറ്റവരെ എളേറ്റിലിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇവരില്‍ അഞ്ച് പേരെ പിന്നീട് വിദഗ്ധ ചികിത്സക്കായി കോഴിക്കോട് മെഡിക്കല്‍ കോളേജ് ആശുപത്രിയിലേക്ക് മാറ്റി. നിറയെ യാത്രക്കാരുണ്ടായിരുന്ന ബസ്സില്‍ അധികവും വിദ്യാര്‍ത്ഥികളായിരുന്നു. ഓടിക്കൂടിയ നാട്ടുകാരും മറ്റ് യാത്രക്കാരും ചേര്‍ന്ന് രക്ഷാപ്രവര്‍ത്തനം നടത്തി.