മണ്ണെണ്ണ കുടിച്ചാൽ കൊവിഡ് മാറുമെന്ന് പ്രചരിപ്പിച്ചു, മുഖ്യമന്ത്രിക്ക് കത്തും; മലപ്പുറം സ്വദേശിക്കെതിരെ കേസ്

മണ്ണെണ്ണ കൊവിഡിന് മരുന്നായി ഉപയോഗിക്കുന്നതായി ഇയാൾ ഫേസ്‍ബുക്കില്‍ പോസ്റ്റിട്ടിരുന്നു. ഇക്കാര്യം കാണിച്ച് മുഖ്യമന്ത്രിക്ക് കത്തയക്കുകയും ചെയ്തു

മലപ്പുറം: മണ്ണെണ്ണ കുടിച്ചാൽ കൊവിഡ് 19 മാറുമെന്ന് പ്രചരിപ്പിച്ച ആൾക്കെതിരെ പെരിന്തൽമണ്ണ പൊലീസ് കേസെടുത്തു. പെരിന്തൽമണ്ണ നാരങ്ങാകുണ്ടിലെ റൊണാൾഡ് ഡാനിയൽ(64) എന്നയാൾക്കെതിരെയാണ് കേസെടുത്തത്. മണ്ണെണ്ണയുടെ കാര്യം ചൂണ്ടിക്കാട്ടി മുഖ്യമന്ത്രി പിണറായി വിജയന് ഇയാള്‍ കത്തയച്ചിരുന്നു. ഇതേ തുടർന്ന് മലപ്പുറം എസ്‍പിയുടെ നിദേശപ്രകാരം കേസെടുക്കുകയായിരുന്നു. 

ഇയാൾ ഇതിന് മുമ്പും സമാനമായ നിരവധി കേസുകളിൽ പ്രതിയായിരുന്നു. മണ്ണെണ്ണ കൊവിഡിന് മരുന്നായി ഉപയോഗിക്കുന്നതായി ഇയാൾ ഫേസ്‍ബുക്കില്‍ പോസ്റ്റിട്ടിരുന്നു. വലിയ വിമര്‍ശനം ഉയര്‍ന്നെങ്കിലും ഇപ്പോഴും ഈ പോസ്റ്റ് പിന്‍വലിച്ചിട്ടില്ല.