സ്ത്രീധനത്തിന്റെ പേരിൽ യുവതിയെ ഭർത്താവും ഭർതൃവീട്ടുകാരും ആക്രമിച്ചെന്ന് പരാതി

ആലപ്പുഴ സ്വദേശി രഹ്നയുടെ പരാതിയിൽ ഭർത്താവ് നിധിനും കുടുംബാംഗങ്ങൾക്കുമെതിരെ തൃക്കുന്നപ്പുഴ പൊലീസ് കേസെടുത്തു.

ആലപ്പുഴ: തൃക്കുന്നപ്പുഴയിൽ സ്ത്രീധനത്തിന്റെ പേരിൽ യുവതിയെ ഭർത്താവും ഭർതൃവീട്ടുകാരും ആക്രമിച്ചെന്ന് പരാതി. ആലപ്പുഴ സ്വദേശി രഹ്നയുടെ പരാതിയിൽ ഭർത്താവ് നിധിനും കുടുംബാംഗങ്ങൾക്കുമെതിരെ തൃക്കുന്നപ്പുഴ പൊലീസ് കേസെടുത്തു. വഴക്കിനിടെ രഹ്നയെ ഭർത്താവ് നിലത്തിട്ട് വലിച്ചിഴക്കുന്നതിന്റെ ദൃശ്യങ്ങളടക്കം തെളിവുകൾ പൊലീസിന് കൈമാറി.

അതേസമയം ഏറെ വൈകീ കേസെടുത്ത പൊലീസ് നിധിനെയും കുടുംബാംഗങ്ങളെയും സ്റ്റേഷനിലേക്ക് വിളിപ്പിച്ചിട്ടുണ്ട്.സമാനതകളില്ലാത്ത ശാരീരിക മാനസിക പീഡനമാണ് യുവതി നേരീട്ടത്. വിവാഹം കഴിഞ്ഞ് ആറുവർഷമായി സ്ത്രീധനത്തിന്റെ പേരിൽ മർദ്ദനം ഏൽക്കേണ്ടിവന്നു. കഴിഞ്ഞ 22 ന് കുട്ടിയുടെ പിറന്നാൾ ആഘോഷത്തിന് എത്തിയ യുവതിയുടെ പിതാവിനെയും ഭർത്താവ് നിധിൻ മർദിച്ചു. യുവതിയെ വീട്ടിൽ വെച്ച് മർദിച്ച് വലിച്ചു.

പരിക്കേറ്റ് ആശുപത്രിയിൽ കഴിയവെ പരാതി അറിയിച്ചിട്ടും പൊലീസ് കേസ് എടുക്കാൻ താമസിപ്പിച്ചു. പൊലീസും പഞ്ചായത്തു അംഗവും ഇടപെട്ടിട്ടും കുട്ടിയുടെ വസ്ത്രങ്ങളും സാധനങ്ങളും എടുക്കാൻ ഭർതൃവീട്ടുകാർ അനുവദിച്ചില്ലെന്നും യുവതി പറഞ്ഞു. പിന്നീട് ജില്ലാ പൊലീസ് മേധാവിയെ യുവതി നേരിട്ട് കണ്ടതിനെ തുടർന്നാണ് എഫ്ഐആർ രജിസ്ട്രർ ചെയ്തത്. എന്നാൽ സ്ത്രീധന പീഡനക്കേസുകളിൽ പ്രാഥമിക നടപടിക്രമങ്ങൾ പൂർത്തിയാക്കേണ്ട കാലതാമസം മാത്രമേ ഉണ്ടായിട്ടുള്ള എന്നാണ് തൃക്കുന്നപ്പുഴ പോലീസിന്റെ വിശദീകരണം.