കുന്നംകുളത്ത് ആന ഇടഞ്ഞു, നാട്ടുകാർ പരിഭ്രാന്തിയിലായി; പാപ്പാന്മാരും ആന ഉടമയും ചേർന്ന് തളച്ചു

തൃശൂർ കുന്നംകുളം ചൂണ്ടൽ പുതുശേരിയിൽ 'പുതുശേരി വിജയൻ' എന്ന ആന ഇടഞ്ഞത് നാട്ടുകാരിൽ പരിഭ്രാന്തി സൃഷ്ടിച്ചു. പനമ്പട്ടയെടുക്കുന്നതിനിടെ പ്രകോപിതനായ ആനയെ, പാപ്പാൻമാരുടെയും ഉടമയുടെയും സമയോചിതമായ ഇടപെടൽ മൂലം ഒരു മണിക്കൂറിനകം അപകടങ്ങളില്ലാതെ തളച്ചു. നിലവിൽ ആന ശാന്തനാണെന്ന് അധികൃതർ അറിയിച്ചു.

തൃശൂര്‍: കുന്നംകുളം ചൂണ്ടല്‍ പുതുശേരിയില്‍ ആന ഇടഞ്ഞത് നാട്ടുകാരെ പരിഭ്രാന്തിയിലാഴ്ത്തി. പുതുശേരി സ്വദേശിയുടെ ഉടമസ്ഥതയിലുള്ള 'പുതുശേരി വിജയന്‍' എന്ന ആനയാണ് ഇടഞ്ഞത്. ഉച്ചയ്ക്ക് 12:30ന് പഴുന്നാന റോഡിലുള്ള പാറക്കുളത്തിന് സമീപത്തെ പറമ്പിൽ നിന്നും പനമ്പട്ടയെടുക്കുന്നതിനിടെയാണ് സംഭവം. പട്ടയെടുക്കുന്നതിനിടെ പെട്ടെന്ന് പ്രകോപിതനായ ആന ഇടയുകയായിരുന്നു. ഉടന്‍ തന്നെ പാപ്പാന്‍മാരുടെയും ഉടമയുടെയും നേതൃത്വത്തില്‍ ആനയെ അനുനയിപ്പിക്കാനുള്ള ശ്രമങ്ങള്‍ ആരംഭിച്ചു. ഒരു മണിക്കൂര്‍ കഴിഞ്ഞ് സമീപവാസിയായ കുമാരന്റെ വീട്ടുമുറ്റത്ത് ആനയെ തളയ്ക്കുകയായിരുന്നു. പാപ്പാന്‍മാരുടെയും ഉടമയുടെയും സമയോചിതമായ ഇടപെടല്‍ മൂലം വലിയ അപകടങ്ങളോ നാശനഷ്ടങ്ങളോ ഉണ്ടാകാതെ ആനയെ തളയ്ക്കാനായി. നിലവില്‍ ആന ശാന്തനാണെന്നും ആശങ്കപ്പെടേണ്ട സാഹചര്യമില്ലെന്നും ഉടമസ്ഥന്‍ അറിയിച്ചു. വിവരമറിഞ്ഞ് കുന്നംകുളം പോലീസും സ്ഥലത്തെത്തിയിരുന്നു.