കറുത്ത സ്കൂട്ടറിൽ 2 യുവാക്കൾ, സംശയം തോന്നി വണ്ടി തട‍ഞ്ഞതോടെ പരുങ്ങി; വസ്ത്രത്തിനുള്ളിൽ ഒളിപ്പിച്ച് കടത്തിയത് 157 ഗ്രാം എംഡിഎംഎ

വസ്ത്രത്തിനുള്ളിൽ ഒളിപ്പിച്ച നിലയിലായിരുന്നു മയക്കുമരുന്ന്. മയക്കുമരുന്ന് കടത്തിക്കൊണ്ട് വന്ന സ്കൂട്ടറും എക്സൈസ് കസ്റ്റഡിയിലെടുത്തു. രഹസ്യ വിവരത്തിന്‍റെ അടിസ്ഥാനത്തിൽ നടത്തിയ വാഹന പരിശോധനയിലാണ് പ്രതികൾ പിടിയിലായത്.

തിരുവനന്തപുരം: തിരുവനന്തപുരത്ത് വ്യാവസായിക അളവിൽ എംഡിഎംഎയുമായി രണ്ട് പേരെ അറസ്റ്റ് ചെയ്തു. എക്സൈസ് സ്പെഷ്യൽ സ്ക്വാഡ് സർക്കിൾ ഇൻസ്പെക്ടർ ടി.ആർ.മുകേഷ് കുമാറിന്റെ നേതൃത്വത്തിൽ നടത്തിയ പരിശോധനയിലാണ് 157 ഗ്രാം എംഡിഎംഎയുമായി യുവാക്കൾ പിടിയിലായത്. ആനയറ സ്വദേശി നന്ദു, ചെറിയകൊണ്ണി സ്വദേശി നന്ദഹരി എന്നിവരെയാണ് എക്സൈസ് അറസ്റ്റ് ചെയ്തത്. മയക്കുമരുന്ന് കടത്തിക്കൊണ്ട് വന്ന സ്കൂട്ടറും എക്സൈസ് കസ്റ്റഡിയിലെടുത്തു. രഹസ്യ വിവരത്തിന്‍റെ അടിസ്ഥാനത്തിൽ നടത്തിയ വാഹന പരിശോധനയിലാണ് പ്രതികൾ പിടിയിലായത്. വസ്ത്രത്തിനുള്ളിൽ ഒളിപ്പിച്ച നിലയിലായിരുന്നു മയക്കുമരുന്ന്.

പ്രിവന്റീവ് ഓഫീസർമാരായ മോൻസി, രഞ്ചിത്ത്, വിശാഖ്, സിവിൽ എക്‌സൈസ് ഓഫീസർമാരായ സുബിൻ, ശരത്, ബിനോജ്,ശരൺ, ശ്രീരാഗ്, അക്ഷയ്, അനന്ദു, വനിതാ സിവിൽ എക്‌സൈസ് ഓഫീസർ റജീന, സിവിൽ എക്‌സൈസ് ഓഫീസർ ഡ്രൈവർ അശ്വിൻ എന്നിവർ പങ്കെടുത്തു. സംഭവ സ്ഥലം എക്‌സൈസ് ഉന്നത ഉദ്യോഗസ്ഥരായ ജോയിന്റ് എക്‌സൈസ് കമ്മീഷണർ ആർ.ഗോപകുമാർ, ഡെപ്യൂട്ടി എക്‌സൈസ് കമ്മീഷണർ പി.എൽ.ഷിബു എന്നിവർ സന്ദർശിച്ചു.

കഴിഞ്ഞ ദിവസവും തലസ്ഥാനത്ത് ലഹരിമരുന്ന് പിടികൂടിയിരുന്നു. മണ്ണാമൂല സ്വദേശിയായ കാർത്തിക് (30) ആണ് ലഹരി മരുന്നുമായി പിടിയിലായത്. തിരുവനന്തപുരം എക്സൈസ് എൻഫോഴ്‌സ്‌മെന്റ് ആൻഡ് ആന്റി നാർക്കോട്ടിക് സ്പെഷ്യൽ സ്‌ക്വാഡ് നടത്തിയ പരിശോധനയിലാണ് മണ്ണാമൂല ഭാഗത്തു നിന്നും ബൈക്കിൽ കടത്തിക്കൊണ്ട് വന്ന മയക്കുമരുന്ന് ഗുളികകളും കഞ്ചാവും പിടികൂടിയത്. നൈട്രോസൺ 10 ഇന്നതിൽപ്പെട്ട 100 ടാബ്‌ലറ്റും, 25 ഗ്രാം കഞ്ചാവും എക്സൈസ് കണ്ടെടുത്തു. സ്പെഷ്യൽ സ്‌ക്വാഡ് എക്സൈസ് സർക്കിൾ ഇൻസ്പെക്ടർ ടി.ആർ.മുകേഷ് കുമാറിന്റെ നേതൃത്വത്തിലുള്ള പരിശോധന സംഘത്തിൽ പ്രിവന്റീവ് ഓഫീസർമാരായ മോൻസി, രഞ്ജിത്ത്, സിവിൽ എക്സൈസ് ഓഫീസർമാരായ സുബിൻ, ശരൺ, ശരത്, ശ്രീരാഗ്, ബിനോജ്, അക്ഷയ്, വനിത സിവിൽ എക്സൈസ് ഓഫീസർ റജീന എന്നിവരും ഉണ്ടായിരുന്നു.