കോന്നിയിൽ പഞ്ചായത്ത് ഹാളിൽ സിഡിഎസ് യോഗത്തിനിടെ ഫാൻ പൊട്ടിവീണു, കുടുംബശ്രീ അംഗത്തിന് മുഖത്ത് പരിക്ക്; പ്രതിഷേധവുമായി അംഗങ്ങൾ

കോന്നിയിൽ കുടുംബശ്രീ സിഡിഎസ് യോഗത്തിനിടെ സീലിംഗ് ഫാൻ പൊട്ടിവീണ് അംഗത്തിന് പരിക്കേറ്റു. കോന്നി പഞ്ചായത്ത് ഓഫീസിലെ പഴക്കമേറിയ കെട്ടിടത്തിൽ വെച്ചായിരുന്നു യോഗം നടന്നത്, പരിക്കേറ്റ സന്ധ്യ എന്ന സ്ത്രീ ചികിത്സയിലാണ്.

പത്തനംതിട്ട: കോന്നിയിൽ കമ്മ്യൂണിറ്റി ഡെവലപ്‌മെന്റ് സൊസൈറ്റി യോഗം നടക്കുന്നതിനിടെ സീലിംഗ് ഫാൻ പൊട്ടിവീണ് കുടുംബശ്രീ അംഗത്തിന് പരുക്കേറ്റു. കോന്നി സ്വദേശിനിയായ സന്ധ്യയ്ക്കാണ് അപകടത്തിൽ പരിക്കേറ്റത്. കോന്നി പഞ്ചായത്ത് ഓഫീസിലെ കമ്മ്യൂണിറ്റി ഹാളിൽ കുടുംബശ്രീ സിഡിഎസ് യോഗം നടന്നു കൊണ്ടിരിക്കെയാണ് അപ്രതീക്ഷിതമായി അപകടം ഉണ്ടായത്. ഹാളിന്റെ മേൽക്കൂരയിൽ ഉറപ്പിച്ചിരുന്ന സീലിംഗ് ഫാൻ അഴിഞ്ഞു വീഴുകയായിരുന്നു. അപകടത്തിൽ കോന്നി സ്വദേശി സന്ധ്യയുടെ മുഖത്താണ് പരുക്കേറ്റത്.

അപകടം നടന്ന ഉടൻ തന്നെ പരിക്കേറ്റ സന്ധ്യയെ സമീപത്തുള്ള കോന്നി താലൂക്ക് ആശുപത്രിയിൽ പ്രവേശിപ്പിച്ചു. ഇവർ അവിടെ ചികിത്സയിലാണ്. പഞ്ചായത്ത് ഓഫീസിലെ കമ്മ്യൂണിറ്റി ഹാൾ സ്ഥിതി ചെയ്യുന്നത് പഴക്കമേറിയ കെട്ടിടത്തിലാണെന്ന് അധികൃതർ ചൂണ്ടിക്കാട്ടി. കെട്ടിടങ്ങളുടെ കാലപ്പഴക്കമാണ് അപകടത്തിന് കാരണമായതെന്നും, ഇവയുടെ അറ്റകുറ്റപ്പണികളും സുരക്ഷാ പ്രശ്നങ്ങളും ഉടൻ തന്നെ പരിഹരിക്കുമെന്നും പഞ്ചായത്ത് അധികൃതർ അറിയിച്ചു.