മീൻ പിടിച്ച് മടങ്ങിയ വള്ളം കരയ്ക്കടുത്ത് തിരമാലയിൽ പെട്ട് മറിഞ്ഞു; മത്സ്യത്തൊഴിലാളിക്ക് ഗുരുതര പരിക്ക്

കരയോട് 50 മീറ്റർ അകലെ വെച്ച്  തിരമാലയില്‍പെട്ട് മറിയുകയായിരുന്നു.  നകുലനുള്‍പ്പെടെ ഏഴ് പേരാണ് വള്ളത്തിലുണ്ടായിരുന്നത്

തൃശ്ശൂർ: കയ്പമംഗലം വഞ്ചിപ്പുര ബീച്ചില്‍ മത്സ്യ ബന്ധനം കഴിഞ്ഞ് മടങ്ങിയ വള്ളം മറിഞ്ഞ് തൊഴിലാളിക്ക് പരിക്ക്. കയ്പമംഗലം സ്വദേശി കോഴിശേരി നകുലൻ (50) ആണ് പരിക്കേറ്റത്. ഇയാളെ തൃശൂർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇന്ന് പുലര്‍ച്ചെ രണ്ട് മണിയോടെയായിരുന്നു അപകടം. മത്സ്യബന്ധനത്തിനു ശേഷം മീനുമായി കരയിലേയ്ക്ക് കയറുകയായിരുന്ന കോഴി പറമ്പിൽ ഗണേശന്റെ ഉടമസ്ഥതയിലുള്ള ആദിപരാശക്തി എന്ന ഫൈബര്‍ വള്ളമാണ് അപകടത്തില്‍പ്പെട്ടത്. 

കരയോട് 50 മീറ്റർ അകലെ വെച്ച്  തിരമാലയില്‍പെട്ട് മറിയുകയായിരുന്നു.  നകുലനുള്‍പ്പെടെ ഏഴ് പേരാണ് വള്ളത്തിലുണ്ടായിരുന്നത്. മറ്റുള്ളവര്‍ പരിക്കേൽക്കാതെ രക്ഷപ്പെട്ടു. കരയിലുണ്ടായിരുന്ന മറ്റു മത്സ്യത്തൊഴിലാളികൾ ചേർന്നാണ് രക്ഷാപ്രവർത്തനം നടത്തിയത്. വള്ളം ദേഹത്തേക്ക് മറിഞ്ഞാണ് നകുലന് തണ്ടെല്ലിന് ഗുരുതരമായി പരിക്കേറ്റത്.  വള്ളത്തിലുണ്ടായിരുന്ന മീനും വലയ്ക്കും എഞ്ചിനും നാശനഷ്ടമുണ്ട്. ഏകദേശം നാല് ലക്ഷത്തോളം രൂപയുടെ നാശ നഷ്ടം സംഭവിച്ചതായി തൊഴിലാളികൾ പറഞ്ഞു.

അപകടം സംഭവിച്ച വള്ളത്തിനും, തൊഴിലാളികൾക്കും  സർക്കാർ  അർഹമായ നഷ്ട പരിഹാരം നൽകണമെന്ന് മത്സ്യതൊഴിലാളി കോൺഗ്രസ് സംസ്ഥാന സെക്രട്ടറി മണി കാവുങ്ങൾ ആവശ്യപ്പെട്ടു. ർഡി.സി.സി ജനറൽ സെക്രട്ടറി കെ.എഫ്.ഡൊമിനിക്ക്, സജേഷ് പള്ളത്ത്, കെ.വി.തമ്പി, ദാസൻ പനയ്ക്കൽ, കെ.ആർ.രഘുനാഥൻ, കെ.കെ.പ്രഭാകരൻ എന്നിവരും സന്നിഹിതരായിരുന്നു.