പോസ്റ്റ് ഓഫീസ് ഇനി 'ഓൾഡ് സ്കൂൾ' അല്ല! കേരളത്തിലെ ആദ്യ 'ജെൻ-സി' കൗണ്ടർ കോട്ടയം സിഎംഎസ് കോളേജിൽ

ഇന്ത്യാ പോസ്റ്റിന്റെ കേരളത്തിലെ ആദ്യത്തെ ജെൻ-സീ പോസ്റ്റ് ഓഫീസ് എക്സ്റ്റൻഷൻ കൗണ്ടർ കോട്ടയം സിഎംഎസ് കോളേജിൽ പ്രവർത്തനം ആരംഭിച്ചു. വിദ്യാർത്ഥികൾ തന്നെയാണ് ഇത് രൂപകൽപ്പന ചെയ്തിരിക്കുന്നത്. 

കോട്ടയം: ഇന്ത്യാ പോസ്റ്റിന്റെ കേരളത്തിലെ ആദ്യത്തെ ജെൻ-സീ പോസ്റ്റ് ഓഫീസ് എക്സ്റ്റൻഷൻ കൗണ്ടർ കോട്ടയം സിഎംഎസ് കോളേജിൽ തുറന്നു. കേരള സെൻട്രൽ റീജിയൺ പോസ്റ്റൽ സർവീസസ് ഡയറക്ടർ എൻ.ആർ.ഗിരി ഉദ്ഘാടനം ചെയ്തു. 'വിദ്യാർത്ഥികൾ, വിദ്യാർത്ഥികളാൽ, വിദ്യാർത്ഥികൾക്ക് വേണ്ടി' എന്ന തത്വശാസ്ത്രത്തിൽ നിന്നാണ് ഈ ആശയം ഉടലെടുത്തത്. ഇന്ത്യാ പോസ്റ്റ് ഉദ്യോഗസ്ഥരുടെ സഹകരണത്തോടെ സിഎംഎസ് കോളേജ് വിദ്യാർത്ഥികളാണ് ഈ സ്ഥാപനത്തിൻ്റെ മുഴുവൻ രൂപകൽപ്പനയും ആസൂത്രണവും നിർമ്മാണപങ്കാളിത്തവും നിർവഹിച്ചത്. ഇത് സർഗ്ഗാത്മകതയുടെയും സുസ്ഥിരതയുടെയും സേവനത്തിൻ്റെയും മികച്ച സംയോജനത്തെ പ്രതിനിധീകരിക്കുന്നു.

ഊർജ്ജസ്വലതവും യുവത്വവും കൂടിച്ചേർന്ന ഒരു പ്രകൃതിസൗഹൃദ ഇടമാണ് ഈ പോസ്റ്റൽ എക്സ്റ്റൻഷൻ കൗണ്ടർ. ഇൻഡോർ, ഔട്ട്‌ഡോർ ഏരിയകൾ സുഗമമായി ഇവിടെ സമന്വയിക്കുന്നു. പുതുതലമുറയ്ക്ക് വേണ്ടിയുള്ള ഈ എക്സ്റ്റൻഷൻ കൗണ്ടർ, പ്രകൃതിയുമായി ഇണങ്ങിച്ചേരുക എന്ന കോളേജിൻ്റെ അടിസ്ഥാന തത്വത്തിൽ ഉറച്ചുനിൽക്കുന്നതോടൊപ്പം ഒരു വർക്ക് കഫേയായും ഗ്രീൻ കോർണറായും കമ്മ്യൂണിറ്റി കേന്ദ്രമായുമെല്ലാം പ്രവർത്തിക്കുന്നു.

ജെൻ-സീ പോസ്റ്റൽ എക്സ്റ്റൻഷൻ കൗണ്ടറിൻ്റെ പ്രധാന സവിശേഷതകൾ:

• പിക്നിക് ടേബിൾ ശൈലിയിലുള്ള ഇരിപ്പിട ക്രമീകരണങ്ങളും വെർട്ടിക്കൽ ഗാർഡനുമുള്ള, ഉന്മേഷദായകവും ശാന്തവുമായ അന്തരീക്ഷം പ്രദാനം ചെയ്യുന്ന പരിസ്ഥിതി സൗഹൃദ ഇരിപ്പിടങ്ങൾ. പഴയ ടയറുകൾ പുനരുപയോഗിച്ച് നിർമ്മിച്ച ഇരിപ്പിടങ്ങൾ സുസ്ഥിരതയോടും പരിസ്ഥിതി സൗഹൃദപരമായ പ്രവർത്തനങ്ങളോടുമുള്ള വിദ്യാർത്ഥികളുടെ പ്രതിബദ്ധതയെ പ്രതിഫലിപ്പിക്കുന്നു.
• ലാപ്ടോപ്പുകൾക്കും മൊബൈലുകൾക്കുമുള്ള ചാർജിംഗ് പോയിൻ്റുകളോടുകൂടി സജ്ജീകരിച്ചിരിക്കുന്ന വർക്ക് ഫ്രണ്ട്ലി കൗണ്ടർ ലെഡ്ജ്.
• പുസ്തകങ്ങളും ബോർഡ് ഗെയിമുകളുമുള്ള ബുക്ക് ഷെൽഫ്, ശാന്തമായ അന്തരീക്ഷത്തിൽ വായിക്കാനുള്ള ഇൻഡോർ വായനാമൂല എന്നിവ വിനോദത്തിനും വിശ്രമത്തിനുമുള്ള കോർണറിൽ ഉൾപ്പെടുന്നു.
• പാക്കേജിംഗ് മെറ്റീരിയലുകളും 'മൈ സ്റ്റാമ്പ്' പ്രിൻ്ററുമുള്ള സമ്പൂർണ്ണ എംപിസിഎം ബുക്കിംഗ് കൗണ്ടർ സേവന ലഭ്യത മെച്ചപ്പെടുത്തുന്നു.
• ഇന്ത്യാ പോസ്റ്റ്, 'അക്ഷരനഗരി' എന്നറിയപ്പെടുന്ന കോട്ടയത്തിൻ്റെ സാംസ്കാരിക പൈതൃകം, കേരള പാരമ്പര്യം, സിഎംഎസ് കോളേജിൻ്റെ സത്ത, പ്രകൃതിയിൽ നിന്ന് പ്രചോദനം ഉൾക്കൊണ്ട രൂപകൽപ്പനകൾ എന്നിവ പ്രതിഫലിപ്പിക്കുന്ന വിദ്യാർത്ഥികളുടെയും ജീവനക്കാരുടെയും കലാസൃഷ്ടികൾ ഉൾപ്പെട്ട അകത്തളങ്ങൾ

സേവന കേന്ദ്രം എന്നതിലുപരി വർക്ക്‌പ്ലേസ്, മീറ്റിംഗ് പ്ലേസ്, ക്രിയേറ്റീവ് ഹബ്, റിലാക്സേഷൻ സോൺ, കമ്മ്യൂണിറ്റി കോർണർ എന്നിവ കൂടിയായി ഈ ജെൻ-സീ ശൈലിയിലുള്ള എക്സ്റ്റൻഷൻ കൗണ്ടർ പ്രവർത്തിക്കുന്നു. ഇത് ഇന്ത്യാ പോസ്റ്റിൻ്റെ പാരമ്പര്യത്തെ അഭിമാനത്തോടെ ഭാവിയിലേക്ക് കൊണ്ടുപോകുന്നു.