ട്രെയിനിനുള്ളില് യാത്രക്കാരന് തൂങ്ങിമരിച്ചു; കാലുകള് നിലത്ത് തട്ടിയ നിലയില്, അന്വേഷണം
Synopsis
റെയില്വേ പൊലീസും റെയില് ഉദ്യോഗസ്ഥരും സ്ഥലത്ത് എത്തി പരിശോധന നടത്തിയ ശേഷമാണ് മൃതദേഹം അഴിച്ച് മാറ്റിയത്.
കൊല്ലം: ഓടിക്കൊണ്ടിരിക്കുന്ന ട്രെയിനിന് ഉള്ളില് യാത്രക്കാരനെ തൂങ്ങി മരിച്ചനിലയില് കണ്ടെത്തി. കഴിഞ്ഞ ദിവസം രാവിലെ ഏഴ് മണിയോടെ കൊല്ലത്ത് എത്തിയ മലബാര് ഏക്സ്പ്രസ്സ് ട്രെയിനിലെ ശുചിമുറിയിലാണ് യാത്രക്കാരനെ തൂങ്ങി മരിച്ച നിലയില് കണ്ടെത്തിയത്. ഭിന്നശേഷിക്കാരുടെ ബോഗിയലായിരുന്നു സംഭവം. ആളെ തിരിച്ചറിഞ്ഞിട്ടില്ല.
സംഭവത്തെക്കുറിച്ച് റെയില്വേ പൊലീസ് അന്വേഷണം തുടങ്ങി. ഏകദേശം അന്പത് വയസ്സ് പ്രായം തോന്നിക്കുന്ന ആളെയാണ് ട്രെയിനിനുള്ളില് ജീവനൊടുക്കിയ നിലയില് കണ്ടെത്തിയത്. ട്രെയിന് കായകുളത്ത് നിര്ത്തിയിട്ടപ്പോള് ഇയാളെ ബോഗിയിലുണ്ടായിരുന്ന ഗാഡ് കണ്ടിരുന്നു. തുടര്ന്ന് കൊല്ലത്ത് എത്തിയപ്പോള് റയില്വേ ഗാഡുകള് നടത്തിയ പരിശോധനയിലാണ് മൃതദേഹം കണ്ടെത്തിയത്. കാലുകള് നിലത്ത് തട്ടിയ നിലയിലായിരുന്നു.
റെയില്വേ പൊലീസും റെയില് ഉദ്യോഗസ്ഥരും സ്ഥലത്ത് എത്തി പരിശോധന നടത്തിയ ശേഷമാണ് മൃതദേഹം അഴിച്ച് മാറ്റിയത്. ഉടുത്തിരുന്ന കൈലിയില് തൂങ്ങി മരിച്ചതായിരിക്കും എന്നാണ് പൊലീസിന്റെ നിഗമനം. മൃതദേഹം ഇപ്പോള് കൊല്ലം ജില്ലാആശുപത്രിയിലെ മോര്ച്ചറിയില് സൂക്ഷിച്ചിരിക്കുകയാണ്. മരിച്ച ആള് ഭിന്നശേഷിക്കാരനാണ്.
ഫോറന്സിക് വിദഗ്ദര് ഉള്പ്പെടെയുള്ളവര് ട്രെയിനില് പരിശോധന നടത്തി.ഭിന്നശേഷിക്കാരുടെ ബോഗിയില് മറ്റ് യാത്രക്കാര് ആരുംതന്നെ ഇല്ലായിരുന്നു. ഇയാള് ഏത് സ്റ്റേഷനില് നിന്നാണ് ട്രെയിനില് കയറിയതെന്ന് കണ്ടെത്താനുള്ള ശ്രമത്തിലാണ് പൊലീസ്. റെയില്വേ സ്റ്റേഷനുകളിലെ സിസിടിവി ക്യാമറകളിലെ ദൃശ്യങ്ങള് പരിശോധിക്കാനാണ് പൊലീസിന്റെ നീക്കം.
(ആത്മഹത്യ ഒരു പ്രശ്നത്തിനും പരിഹാരമല്ല. പ്രതിസന്ധികൾ അത്തരം തോന്നൽ ഉണ്ടാക്കിയാൽ കൗൺസലിംഗ് പിന്തുണക്കായി ഈ നമ്പറുകളിൽ വിളിക്കാം 1056, 0471- 2552056)
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam