കരിമ്പനയിൽ നിന്ന് ഇളനീര് വെട്ടാനെത്തിയ യുവാക്കൾക്ക് തോന്നിയ സംശയം; പൊളിഞ്ഞ് കിടന്ന ഈർമ്പനക്കുള്ളിൽ നിന്ന് രണ്ട് മലമ്പാമ്പുകളെ പിടികൂടി

പാലക്കാട് ചെത്തല്ലൂരിൽ സ്വകാര്യ വ്യക്തിയുടെ പറമ്പിൽ നിന്ന് എട്ടടിയോളം നീളമുള്ള രണ്ട് വലിയ മലമ്പാമ്പുകളെ ഒന്നിച്ചു പിടികൂടി. കരിമ്പനയുടെ ഇളനീര് പറിക്കാൻ എത്തിയ യുവാക്കളാണ് പാമ്പുകളെ കണ്ടെത്തി വനംവകുപ്പിനെ വിവരമറിയിച്ചത്

പാലക്കാട്: ചെത്തല്ലൂരിൽ രണ്ടു മലമ്പാമ്പുകളെ ഒന്നിച്ചു പിടികൂടി. മണ്ണാർക്കാട് തച്ചനാട്ടുകര ചെത്തല്ലൂർ തെക്കുമുറിയിൽ സ്വകാര്യ വ്യക്തിയുടെ കുന്നത്ത് കുഴി പറമ്പിൽ വളപ്പിലാണ് രണ്ടു വലിയ മലമ്പാമ്പുകൾ ഒന്നിച്ച് ഉണ്ടായിരുന്നത്. പറമ്പിൽ ഈർമ്പന പൊളിഞ്ഞ് കിടന്നിരുന്നതിന് അകത്താണ് മലമ്പാമ്പുകൾ വസിച്ചിരുന്നത്. പ്രദേശത്തെ യുവാക്കൾ കരിമ്പനയുടെ ഇളനീര് ഇടാൻ വേണ്ടി പറമ്പിൽ എത്തിയപ്പോഴാണ് താഴെ കിടന്ന ചപ്പലയിൽ അനക്കം കണ്ടത്. തുടർന്ന് നോക്കിയപ്പോഴാണ് മലമ്പാമ്പ് ആണ്ന്ന് മനസിലായത്. ഉടൻതന്നെ മണ്ണാർക്കാട് ഫോറസ്റ്റ് അധികൃതരെ വിവരം അറിയിച്ചു. പ്രദേശത്ത് ആദ്യമായി എത്തിയ പടുകൂറ്റൻ മലമ്പാമ്പുകളെ കാണാൻ നിരവധി ആളുകളാണ് തടിച്ചുകൂടിയത്. എട്ടടിയോളം നീളമുള്ള മലമ്പാമ്പുകളെ ഇന്ന് ഉച്ചയ്ക്ക് രണ്ടുമണിയോടുകൂടിയാണ് നാട്ടുകാരുടെ ശ്രദ്ധയിൽ പെട്ടത്. ചെത്തല്ലൂരിൽ ആദ്യമായാണ് ഇത്തരം രണ്ടു മലമ്പാമ്പുകളെ ഒന്നിച്ചു പിടികൂടുന്നത്