പെട്രോൾ പമ്പിൻ്റെ വിശ്രമമുറിയിൽ കയറി പമ്പിലെ ജോലിക്കാരുടെ ഫോണുകൾ മോഷ്ടിച്ചു, ഷോറൂമിൽ വിൽപനയ്ക്ക് എത്തിച്ചപ്പോൾ പിടിയിലായത് ഇതര സംസ്ഥാന തൊഴിലാളി

രായമംഗലത്തെ പെട്രോൾ പമ്പിൽ നിന്ന് ജീവനക്കാരുടെ മൊബൈൽ ഫോണുകൾ മോഷ്ടിച്ച കേസിൽ അസം സ്വദേശിയായ യുവാവ് അറസ്റ്റിലായി. പെരുമ്പാവൂരിലെ മൊബൈൽ ഷോറൂമിൽ ഫോണുകൾ വിൽക്കാൻ ശ്രമിക്കുന്നതിനിടെയാണ് കുറുപ്പംപടി പൊലീസ് ഇയാളെ പിടികൂടിയത്.

പെരുമ്പാവൂർ: മൊബൈൽ മോഷണ കേസിൽ ഇതര സംസ്ഥാനത്തൊഴിലാളി അറസ്റ്റിൽ. അസം നൗഗോൺ ബോർഗുളി സ്വദേശി മുഹമ്മദ് ഇമാൻ ഹുസൈൻ (28)നെയാണ് കുറുപ്പംപടി പൊലീസ് അറസ്റ്റ് ചെയ്തത്. കഴിഞ്ഞ ഞായറാഴ്ച രാത്രി രായമംഗലം തായിക്കരച്ചിറയിലുള്ള പെട്രോൾ പമ്പിൻ്റെ വിശ്രമമുറിയിൽ കയറി പമ്പിലെ ജോലിക്കാരായ രണ്ട് പേരുടെ മൊബൈൽ ഫോണുകൾ മോഷ്ടിക്കുകയായിരുന്നു. പെരുമ്പാവൂരിലെ മൊബൈൽ ഷോറൂമിൽ മൊബൈൽ ഫോണുകൾ വില്പനയ്ക്ക് എത്തിച്ചപ്പോഴാണ് ഇയാൾ പിടിയിലായത്. സർക്കിൾ ഇൻസ്പെക്ടർ റിൻസ് എം തോമസ്, എസ് ഐ എൽദോപോൾ, സീനിയർ സിപിഒ മാരായ അരുൺ കെ കരുണൻ, ഇർഷാദ് ,സി പി ഒ രജിത്ത് എന്നിവരാണ് അന്വേഷണ സംഘത്തിൽ ഉണ്ടായിരുന്നത്.