'ചലാൻ അടക്കേണ്ടി വന്നില്ല', റോഡിലെ അഭ്യാസികൾക്ക് സംഭവിച്ചതിന്റെ വീഡിയോയുമായി എംവിഡി!

റോഡിൽ അഭ്യാസ പ്രകടനം നടത്തിയ യുവാക്കൾക്ക് സംഭവിച്ചതിന്റെ വീഡിയോ പങ്കുവച്ച് എംവിഡി

തിരുവനന്തപുരം: റോഡിൽ അഭ്യാസ പ്രകടനങ്ങൾ നടത്തി സ്വയം അപകടങ്ങൾ വിളിച്ചുവരുത്തുന്നവരും മറ്റുള്ളവരെ അപകടത്തിൽ പെടുത്തുന്നവരും ഉണ്ട്. അത്തരക്കാർക്കെതിരെ മോട്ടോർ വാഹന വകുപ്പ് നടപടികൾ തുടരുമ്പോഴും ഇത്തരം നിയമലംഘനങ്ങൾക്ക് കാര്യമായ കുറവൊന്നും വരുന്നില്ലെന്ന് പറയേണ്ടി വരും.

എംവിഡിയുടെ ഫൈൻ മാത്രമല്ല, സ്വന്തം ജീവൻ വരെ അപകടത്തിലാകുന്ന സംഭവങ്ങളാണ് ഇത്തരം റോഡിലെ അഭ്യാസികൾ നടത്തുന്നത്. ഇപ്പോഴിതാ അത്തരമൊരു വീഡിയോ ആണ് എംവിഡി ഫേസ്ബുക്ക് പേജിൽ പങ്കുവച്ചിരിക്കുന്നത്. ആഢംബര ബൈക്കിൽ എത്തിയ രണ്ടുപേർ അതി സാഹസികമായ രീതിയിൽ വണ്ടി ഓടിക്കുന്നതും, പിന്നാലെ അപകടത്തിൽ പെടുന്നതും ആണ് വീഡിയോയിൽ. ചലാൻ അടക്കേണ്ടി വന്നില്ല എന്നാണ് വീഡിയോക്ക് എംവിഡി ഫേസ്ബുക്ക് പേജിൽ നൽകിയ കുറിപ്പ്.

കുട്ടികളുടെ വാഹനമോടിക്കൽ ശിക്ഷാ നടപടികൾ അറിയാത്തവർക്കായി

1.മോട്ടോർ വാഹന നിയമം വകുപ്പ് 180 & 181പ്രകാരം പിഴ

2. വാഹന ഉടമ / രക്ഷിതാവ് ഇവരിലൊരാൾക്ക് 25000 രൂപ പിഴ. (MV Act 199 A(2)

3. രക്ഷിതാവ് അല്ലെങ്കിൽ ഉടമയ്ക്ക് 3 വർഷം വരെ തടവ് ശിക്ഷ. (MV Act 199 A(2)

4.വാഹനത്തിൻ്റെ റെജിസ്ടേഷൻ ഒരു വർഷം റദ്ദാക്കൽ. Mv Act 199 A (4)

5. ഇരുപത്തിയഞ്ച് വയസു വരെ ഇന്ത്യയിലെവിടെ നിന്നും ലൈസൻസ്/ലേർണേർസ് എടുക്കുന്നതിന് വിലക്ക്. (MV Act 199 A(5)

6. ജുവനൈൽ ജസ്റ്റിസ് ആക്റ്റ് പ്രകാരമുള്ള മറ്റു നടപടികൾ (MV Act 199 A(6)

അതേസമയം, ക്യാമറയിൽ നിന്ന് രക്ഷപ്പെടുന്നതിനുവേണ്ടി മുല്ലപ്പൂ ചൂടുന്ന പോലെ തലയിൽ ഹെൽമെറ്റ് എടുത്ത് തിരിച്ചു വച്ച് യാത്ര ചെയ്യുന്നവരും തലക്കേൽക്കുന്ന ആഘാതം ചെറുക്കുന്ന ഇ പി എസ് ഫോം ഇല്ലാത്ത ചിരട്ട പോലത്തെ ഹെൽമറ്റുകളും മറ്റും ധരിക്കുന്നവരും സ്വയം വഞ്ചന ചെയ്യുക മാത്രമല്ല സമൂഹത്തിന് തീർത്തും തെറ്റായ സന്ദേശങ്ങള്‍ നല്‍കുക കൂടിയാണ് ചെയ്യുന്നതെന്ന് എംവിഡി അധികൃതര്‍ ഓര്‍മ്മിപ്പിച്ചു.

ഇങ്ങനെ ചെയ്യുന്ന രക്ഷിതാക്കൾ സ്വന്തം മക്കൾക്ക് നൽകുന്ന സന്ദേശം എന്താണ്? താടി ഭാഗങ്ങൾ അടക്കം പൂർണ്ണമായി മൂടുന്നതും തലയ്ക്ക്  കൃത്യമായി ഇണങ്ങുന്നതും  പൂർണ്ണ സുരക്ഷാ മാനദണ്ഡങ്ങൾ പാലിക്കുന്നതുമായ ഹെൽമെറ്റ് ഉപയോഗിക്കുക മാത്രമല്ല ഒരു വിരൽ കടക്കാവുന്ന  ഗ്യാപ്പിൽ ചിൻസ് സ്ട്രാപ്പ് മുറുക്കി ഹെൽമെറ്റ് ഉപയോഗിച്ചാൽ മാത്രമേ അത് യാത്രകളിൽ തലയ്ക്ക് സംരക്ഷണം നൽകൂ എന്നും എംവിഡി ഓര്‍മ്മിപ്പിച്ചു.