പാലക്കാട് കെഎസ്ആർടിസി ബസുകൾ കൂട്ടിയിടിച്ചു, ഒരാൾ മരിച്ചു; ആറ് പേർക്ക് പരിക്കേറ്റു

പാലക്കാട് ഭാഗത്തേക്ക് പോവുകയായിരുന്ന കെഎസ്ആർടിസി ബസിന്റെ പിൻഭാഗത്ത് ഡോറിനോട് ചേർന്നാണ് ഇടിയേറ്റത്

പാലക്കാട്‌: വടക്കഞ്ചേരിയിൽ കെഎസ്ആർടിസി ബസുകൾ കൂട്ടിയിടിച്ച് ഒരാൾ മരിച്ചു. ആറ് പേർക്ക് പരിക്കേറ്റു. യത്തീംഖാന പള്ളിക്കു മുൻവശത്തുള്ള ബൈപ്പാസിൽ പാലത്തിനു സമീപത്ത് വച്ചാണ് സംഭവം. പാലക്കാട് ഭാഗത്തുനിന്നും പാലായ്ക്ക് പോവുകയായിരുന്ന കെഎസ്ആർടിസി ബസ് ബൈപ്പാസിൽ വച്ച് വടക്കഞ്ചേരി ടൗണിൽ നിന്നും പാലക്കാട്ടേക്ക് പോകുന്ന കെഎസ്ആർടിസി ബസിൽ ഇടിക്കുകയായിരുന്നു.  പാലക്കാട് ഭാഗത്തേക്ക് പോവുകയായിരുന്ന കെഎസ്ആർടിസി ബസിന്റെ പിൻഭാഗത്ത് ഡോറിനോട് ചേർന്നാണ് ഇടിയേറ്റത്. ഇതിനോട് ചേർന്നുള്ള സീറ്റിൽ ഇരുന്ന ആളാണ് മരിച്ചത്. പാലക്കാട് കല്ലേക്കുളങ്ങര സ്വദേശി ജയൻ എസ് നായർ(51) ആണ് മരിച്ചത്. സംഭവവുമായി ബന്ധപ്പെട്ട് കെ എസ് ആർ ടി സി ഡ്രൈവറെ അറസ്റ്റ് ചെയ്തു. പാലാ ബസിലെ ഡ്രൈവറായ കോട്ടയം മേവട സ്വദേശി ബാബു തോമസിനെയാണ് വടക്കഞ്ചേരി പോലീസ് അറസ്റ്റു ചെയ്തത്. വൈദ്യ പരിശോധന പൂർത്തിയാക്കി ഇയാളെ സ്റ്റേഷൻ ജാമ്യത്തിൽ വിടും.