പിന്നെയും ജീവനെടുത്ത് കാട്ടാന; മലമ്പുഴയിൽ കാട്ടാന ആക്രമണത്തിൽ അകമലവാരം സ്വദേശിക്ക് ദാരുണാന്ത്യം

വീടിന് സമീപത്തുള്ള മരത്തിന്റെ ചുവട്ടിൽ കിടന്നുറങ്ങുകയായിരുന്നു ചന്ദ്രൻ. പുലർച്ചെയായിരുന്നു ആനയുടെ ആക്രമണം 

പാലക്കാട്: പാലക്കാട് മലമ്പുഴയിൽ കാട്ടാനയുടെ ആക്രമണത്തിൽ ഒരാൾ മരിച്ചു. അകമലവാരം സ്വദേശി ചന്ദ്രനാണ് മരിച്ചത്. വീടിന് സമീപത്തുള്ള മരത്തിന്റെ ചുവട്ടിൽ കിടന്നുറങ്ങുകയായിരുന്നു ചന്ദ്രൻ. പുലർച്ചെയായിരുന്നു ആനയുടെ ആക്രമണം. ഇന്ന് പുലര്‍ച്ചെ 4.30ഓടെയാണ് സംഭവമുണ്ടായത്. വെള്ളരിത്താനം സ്വദേശിയായ 55കാരൻ ചന്ദ്രനാണ് ആനയുടെ ആക്രമണത്തിൽ ജീവൻ നഷ്ടമായത്. ചൂട് കാലമായതിനാൽ വീടിനടുത്തുള്ള പുളിമരത്തിന് ചുവട്ടിൽ കിടന്നുറങ്ങുകയായിരുന്നു ചന്ദ്രൻ. 

ഇങ്ങനെ ഉറങ്ങുന്നത് പതിവാണ്. ചന്ദ്രനൊപ്പം 2 സുഹൃത്തുക്കള്‍ കൂടിയുണ്ടായിരുന്നു. കാട്ടാന വരുന്ന ശബ്ദം കേട്ട് ഇവര്‍ ഓടിരക്ഷപ്പെട്ടു. ഉറക്കത്തിലായിരുന്ന ചന്ദ്രൻ അറിഞ്ഞില്ല. ആന ചന്ദ്രനെ വലിച്ചെടുത്ത് കൊണ്ടുപോയി എന്നാണ് ദൃക്സാക്ഷികള്‍ പറയുന്നത്. നാട്ടുകാര്‍ ബഹളം വെച്ച് ആനയെ തുരത്തി. ചന്ദ്രനെ ഉടനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഈ ഭാഗത്ത് ആനയിറങ്ങാറുള്ള സ്ഥലമാണെന്നും പ്രദേശവാസികള്‍ പറയുന്നു.