റെഡ് അലർട്ട്; മലപ്പുറം ജില്ലയിൽ ജാഗ്രത, ഖനന പ്രവർത്തനങ്ങൾ നിർത്തിവെക്കണം, നാടുകാണി ചുരത്തിൽ ഗതാഗത നിയന്ത്രണം
Synopsis
മണ്ണിടിച്ചിലിന് സാധ്യതയുള്ള സ്ഥലങ്ങള്, കനാല് പുറമ്പോക്കുകള്, തീരപ്രദേശങ്ങള് എന്നിവിടങ്ങളില് താമസിക്കുന്നവരെ സുരക്ഷിത സ്ഥലങ്ങളിലേക്ക് മാറ്റാന് തദ്ദേശസ്വയംഭരണ വകുപ്പിന് നിര്ദേശം നല്കി
മലപ്പുറം: മലപ്പുറം ജില്ലയില് ജാഗ്രത ഖനന പ്രവര്ത്തനങ്ങള് നിര്ത്തി വെക്കാന് നിര്ദ്ദേശം. അതിതീവ്രമഴ മുന്നറിയിപ്പുള്ളതിനാല് നാളെയും മറ്റന്നാളും റെഡ് അലര്ട്ട് പ്രഖ്യാപിച്ച സാഹചര്യത്തിലാണ് ഖനനപ്രവര്ത്തനങ്ങള് നിര്ത്തിവെയ്ക്കാന് ജില്ലാ ദുരന്തനിവാരണ അതോറിറ്റി ചെയര്മാന് കൂടിയായ ജില്ലാ കളക്ടര് വി.ആര്. വിനോദ് നിര്ദേശം നല്കിയത്. മണ്ണെടുക്കാന് അനുമതിയുള്ള സ്ഥലങ്ങളിലും ഈ ദിവസങ്ങളില് മണ്ണ് നീക്കാന് പാടില്ല.
24 മണിക്കൂര് മഴയില്ലാത്ത സാഹചര്യം വന്നാല് മാത്രമേ ക്വാറികളുടെ പ്രവര്ത്തനം പുനരാരംഭിക്കാന് പാടുള്ളു. മണ്ണിടിച്ചിലിന് സാധ്യതയുള്ള സ്ഥലങ്ങള്, കനാല് പുറമ്പോക്കുകള്, തീരപ്രദേശങ്ങള് എന്നിവിടങ്ങളില് താമസിക്കുന്നവരെ സുരക്ഷിത സ്ഥലങ്ങളിലേക്ക് മാറ്റാന് തദ്ദേശസ്വയംഭരണ വകുപ്പിന് നിര്ദേശം നല്കി. നിലമ്പൂര്-നാടുകാണി ചുരം വഴി അത്യാവശ്യയാത്രക്കാരെ മാത്രമേ അനുവദിക്കുകയുള്ളു.
അതിതീവ്രമഴയുടെ പശ്ചാത്തലത്തില് പുഴയിലിറങ്ങി കുളിക്കുന്നതിനും മലയോരമേഖലയിലൂടെയുള്ള രാത്രിയാത്രയ്ക്കും വിലക്കുണ്ട്. ആഢ്യന്പാറ, കേരളാംകുണ്ട്, വനം വകുപ്പിന് കീഴിലെ കൊടികുത്തിമല എന്നീ ഡെസ്റ്റിനേഷനുകളുള്പ്പെടെ മലയോരമേഖലയിലെ എല്ലാ ടൂറിസ്റ്റ് ഡെസ്റ്റിനേഷനുകളിലും പ്രവേശനം വിലക്കിയിട്ടുണ്ട്. ക്രെയിന്, മണ്ണിമാന്തിയന്ത്രങ്ങള് എന്നിവയുടെ ലഭ്യത ഉറപ്പു വരുത്താന് ആര്ടിഒക്ക് നിര്ദേശം നല്കി.
റെഡ് അലര്ട്ട് പ്രഖ്യാപിച്ച ദിവസങ്ങളില് മത്സ്യത്തൊഴിലാളികള്ക്ക് ആവശ്യമായ മുന്നറിയിപ്പുകള് നല്കാനും മുന്കരുതലുകള് സ്വീകരിക്കാനും ഫിഷറീസ് വകുപ്പ് ഡെപ്യൂട്ടി ഡയറക്ടര്ക്ക് നിര്ദേശം നല്കി. ജൂണ് ഒന്നുമുതല് എന്ഡിആര്എഫ് സംഘം ജില്ലയില് ക്യാംപ് ചെയ്യും.
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam