ഫ്രൂട്ട്സ്റ്റാളിൽ മോഷണം; പണവും സിസിടിവി മോഡവും വാച്ചും ബ്ലൂടൂത്ത് സ്പീക്കറും കത്തിയും കവർന്നു; സ്ഥിരം മോഷ്ടാവ് പിടിയിൽ

തിങ്കളാഴ്ച രാത്രിയിലാണ് വടശ്ശേരിക്കര മണിയാറ്റ് പ്ലാസയ്ക്ക് സമീപം ഫ്രൂട്ട്സ്റ്റാളിൽനിന്ന് പ്രതി 22,500 രൂപയും സിസിടിവിയുടെ വൈഫൈ മോഡവും വാച്ച്, ബ്ലൂടൂത്ത് സ്പീക്കർ, കത്തി എന്നിവയും മോഷ്ടിച്ച് കടന്നത്.

പത്തനംതിട്ട: വടശ്ശേരിക്കരയിൽ ഫ്രൂട്ട്സ്റ്റാളിൽ മോഷണം നടത്തിയ പ്രതി പിടിയിൽ. കോട്ടയം എരുമേലി സ്വദേശി എരുതുവാപുഴ അണിയറ ഹൗസിൽ സുമേഷ് മോഹനൻ (31) ആണ് പെരുനാട് പൊലീസിന്റെ പിടിയിലായത്. തിങ്കളാഴ്ച രാത്രിയിലാണ് വടശ്ശേരിക്കര മണിയാറ്റ് പ്ലാസയ്ക്ക് സമീപം ഫ്രൂട്ട്സ്റ്റാളിൽനിന്ന് പ്രതി 22,500 രൂപയും സിസിടിവിയുടെ വൈഫൈ മോഡവും വാച്ച്, ബ്ലൂടൂത്ത് സ്പീക്കർ, കത്തി എന്നിവയും മോഷ്ടിച്ച് കടന്നത്. മോഷണം നടന്ന സ്ഥലത്തുനിന്നും പ്രതിയുമായി ബന്ധിപ്പിക്കാവുന്ന തരത്തിലുള്ള ചില സൂചനകൾ പൊലീസിന് ലഭിച്ചതാണ് വളരെ വേഗം പ്രതിയെ കണ്ടെത്താൻ സഹായകമായത്.

പെരുനാട് പൊലീസ് സ്റ്റേഷൻ സബ് ഇൻസ്പെക്ടർ മിഥുൻ അശോക് ,വിജേഷ്, അക്ഷയ് വേണു , അരുൺ എ എസ് എന്നിവർ അടങ്ങിയ സംഘമാണ് പ്രതിയെ എരുമേലിയിൽനിന്നും പിടികൂടിയത്. ഇയാൾ കോട്ടയം ജില്ലയിലെ എരുമേലി , കാഞ്ഞിരപ്പള്ളി , കോട്ടയം വെസ്റ്റ് തുടങ്ങിയ പൊലീസ് സ്റ്റേഷനുകളിലും മോഷണക്കേസുകളിൽ പ്രതിയാണെന്നും ജയിൽ ശിക്ഷ അനുഭവിച്ചിട്ടുണ്ടെന്നും പൊലീസ് പറഞ്ഞു. റാന്നി ജുഡീഷ്യൽ ഒന്നാം ക്ലാസ് മജിസ്ട്രേട്ട് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.