കോഴിക്കോട്ടെ ലോഡ്ജിൽ രാത്രി 2 മണിക്ക് ഒരു യുവതിയും 2 യുവാക്കളും, പൊക്കിയപ്പോൾ കിട്ടിയത് എംഡിഎംഎ; പ്രതികളിലൊരാൾക്കെതിരെ 12 ഓളം കേസുകൾ!
Synopsis
യുവതിയുടെ പേരിലാണ് ഇവര് ലോഡ്ജില് മുറിയെടുത്തത്. 108 ഗ്രാം എംഡിഎംഎയാണ് കസ്റ്റഡിയിലെടുത്തത്. ഇത് ചെറിയ പാക്കറ്റുകളിലാക്കി യുവാക്കള്ക്കും വിദ്യാര്ത്ഥികള്ക്കും വിതരണം ചെയ്യുകയായിരുന്നു പ്രതികളുടെ രീതിയെന്ന് പൊലീസ് പറഞ്ഞു.
കോഴിക്കോട്: കോഴിക്കോട് ഇരിങ്ങാടന്പള്ളിയില് എംഡിഎംഎയുമായി യുവതി ഉള്പ്പടെ മൂന്നു പേര് പൊലീസിന്റെ പിടിയില്. ഇരിങ്ങാടന് പള്ളിയിലെ സ്വകാര്യ ലോഡ്ജില് നടത്തിയ പരിശോധനയിലാണ് പ്രതികള് വലയിലായത്. യുവാക്കള്ക്കും വിദ്യാര്ത്ഥികള്ക്കും രാസലഹരിയെത്തിക്കുന്ന സംഘമാണ് പിടിയിലായത്. രഹസ്യ വിവരത്തിന്റെ അടിസ്ഥാനത്തില് ചേവായൂര് പൊലീസും ഡാന്സാഫും നടത്തിയ പരിശോധനയിലാണ് ലഹരിമരുന്നുമായി യുവതിയും സുഹൃത്തുക്കളും കുടുങ്ങിയത്.
ലോഡ്ജില് നിന്നും രാത്രി രണ്ടു മണിയോടെ ബേപ്പൂര് സ്വദേശി അമല് കുമാര്, പയ്യാനക്കല് സ്വദേശി ഷാഹുല് ഹമീദ്, പേരാമ്പ്ര പന്തിരിക്കര സ്വദേശി കാമ്യക റീജു എന്നിവരെ പൊലീസ് അറസ്റ്റ് ചെയ്തത്. യുവതിയുടെ പേരിലാണ് ഇവര് ലോഡ്ജില് മുറിയെടുത്തതെന്ന് പൊലീസ് പറഞ്ഞു. പരിശോധനയിൽ ഇവരുടെ ബാഗിൽ നിന്നും 108 ഗ്രാം എംഡിഎംഎ കണ്ടെടുക്കുകയായിരുന്നു. ലഹരിമരുന്ന് ചെറിയ പാക്കറ്റുകളിലാക്കി യുവാക്കള്ക്കും വിദ്യാര്ത്ഥികള്ക്കും വിതരണം ചെയ്യുകയായിരുന്നു പ്രതികളുടെ രീതിയെന്ന് പൊലീസ് പറഞ്ഞു.
പ്രതികളിലൊരാളായ അമൽ മുൻപും എംഡിഎംഎ കേസിൽ ഉൾപ്പെട്ടിട്ടുള്ള ആളാണ്. അമലിന്റെ പേരിൽ മാറാട് ,ബേപ്പൂര്, പന്നിയങ്കര, മെഡിക്കല് കോളേജ്, നല്ലളം പോലീസ് സ്റ്റേഷനുകളിലായി മയക്കുമരുന്ന് ഉപയോഗിച്ചതിനും, പൊതു സ്ഥലത്ത് ഇരുന്ന് മദ്യം കഴിച്ചതിനും, മദ്യപിച്ചു വാഹനം ഓടിച്ചതിനുമായി പന്ത്രണ്ടോളം കേസുകള് നിലവിലുണ്ട്. കുറച്ചു ദിവസങ്ങളായി ഡാന്സാഫ് സംഘത്തിന്റെ നിരീക്ഷണത്തിലായിരുന്നു പ്രതികള്. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു.
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam