ന്യൂനപക്ഷ വിഭാഗങ്ങളിൽപെട്ട വിധവകൾക്ക് ഭവന പുനരുദ്ധാരണ പദ്ധതിയിൽ അപേക്ഷിക്കാം; ഒരാൾക്ക് ലഭിക്കുക 50,000 രൂപ
Synopsis
അപേക്ഷകയുടെ സ്വന്തം പേരിലോ അല്ലെങ്കില് പങ്കാളിയുടെ പേരിലോ ഉള്ള വീടിന്റെ പരമാവധി വിസ്തീര്ണം 1200 സ്ക്വയര് ഫീറ്റ് കവിയരുത്. അപേക്ഷക കുടുംബത്തിലെ ഏക വരുമാനദായകയായിരിക്കണം.
തിരുവനന്തപുരം: മുസ്ലിം, ക്രിസ്ത്യന്, ബുദ്ധ, സിക്ക്, പാഴ്സി, ജൈന് എന്നീ ന്യൂനപക്ഷ മത വിഭാഗത്തില്പ്പെടുന്ന വിധവകള്, വിവാഹബന്ധം ഏര്പ്പെടുത്തിയതോ ഉപേക്ഷിക്കപ്പെട്ടതോ ആയ സ്ത്രീകള് എന്നിവര്ക്കുള്ള ഇമ്പിച്ചി ബാവാ ഭവന പുനരുദ്ധാരണ പദ്ധതിയില് ന്യൂനപക്ഷ ക്ഷേമ വകുപ്പ് ധനസഹായം നല്കുന്നു. ശരിയായ ജനലുകള്, വാതിലുകള്, മേല്ക്കൂര, ഫ്ലോറിങ്, ഫിനിഷിംഗ്, പ്ലംബിംഗ്, സാനിറ്റേഷന്, ഇലക്ട്രിഫിക്കേഷന് എന്നിവയില്ലാത്ത വീടുകളുടെ അടിസ്ഥാന സൗകര്യം മെച്ചപ്പെടുത്തുന്നതിനാണ് ധനസഹായം.
ഒരു വീടിന്റെ അറ്റകുറ്റപ്പണികള്ക്ക് 50,000 രൂപയാണ് ധനസഹായം നല്കുന്നത്. ഇത് തിരിച്ചടയ്ക്കേണ്ടതില്ല. അപേക്ഷകയുടെ സ്വന്തം പേരിലോ അല്ലെങ്കില് പങ്കാളിയുടെ പേരിലോ ഉള്ള വീടിന്റെ പരമാവധി വിസ്തീര്ണം 1200 സ്ക്വയര് ഫീറ്റ് കവിയരുത്. അപേക്ഷക കുടുംബത്തിലെ ഏക വരുമാനദായകയായിരിക്കണം. പൂരിപ്പിച്ച അപേക്ഷ അനുബന്ധ രേഖകള് സഹിതം അതാത് ജില്ലാ കളക്ടറേറ്റിലെ ന്യൂനപക്ഷ ക്ഷേമ സെക്ഷനില് നേരിട്ടോ ഡെപ്യൂട്ടി കളക്ടര് (ജനറല്), ജില്ലാ ന്യൂനപക്ഷ ക്ഷേമ സെക്ഷന്, ജില്ലാ കളക്ടറേറ്റ് എന്ന വിലാസത്തില് ജില്ലാ കളക്ടറേറ്റിലേക്ക് തപാല് മുഖാന്തിരമോ അപേക്ഷിക്കാം. അപേക്ഷ ഫോറവും മറ്റു വിശദാംശങ്ങളും www.minoritywelfare.kerala.gov.in എന്ന വെബ്സൈറ്റില് ലഭിക്കുന്നതാണ്. അപേക്ഷകള് അത് ജില്ലാ കളക്ടറേറ്റില് സ്വീകരിക്കുന്ന അവസാന തീയതി ഓഗസ്റ്റ് 25.