അര്ധരാത്രി ഭര്ത്താവിനൊപ്പം യാത്ര ചെയ്യുന്നതിനിടെ യുവതി ട്രെയിനിൽ നിന്ന് വീണു; ട്രാക്കിൽ നടത്തിയ തെരച്ചിലിൽ ഗുരുതരമായി പരിക്കേറ്റ നിലയിൽ കണ്ടെത്തി
Synopsis
ഷൊര്ണൂരിൽ നിന്ന് കോഴിക്കോടേക്കുള്ള പാസഞ്ചര് ട്രെയിനിൽ ഭര്ത്താവിനൊപ്പം യാത്ര ചെയ്യുന്നതിനിടയിലാണ് സുകന്യ ട്രെയിനിൽ നിന്ന് ട്രാക്കിന് സമീപത്തേക്ക് വീഴുന്നത്
മലപ്പുറം: മലപ്പുറം താനൂരിൽ ട്രെയിനിൽ നിന്നും വീണ് പരിക്കേറ്റ യുവതിയെ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. നാഗപട്ടണം സ്വദേശിനി സുകന്യയാണ് ട്രെയിനിൽ നിന്ന് വീണത്. വീഴ്ചയിൽ സുകന്യക്ക് ഗുരുതരമായി പരിക്കേറ്റു.
ഇന്നലെ രാത്രി 12 മണിയോടെയാണ് സുകന്യ ട്രെയിനിൽ നിന്നും വീണത്. ഷൊര്ണൂരിൽ നിന്ന് കോഴിക്കോടേക്കുള്ള പാസഞ്ചര് ട്രെയിനിൽ ഭര്ത്താവിനൊപ്പം യാത്ര ചെയ്യുന്നതിനിടയിലാണ് സുകന്യ ട്രെയിനിൽ നിന്ന് ട്രാക്കിന് സമീപത്തേക്ക് വീഴുന്നത്. സുകന്യ ട്രെയിനിൽ നിന്ന് വീണുവെന്ന വിവരം ഉടൻ തന്നെ ഭര്ത്താവ് അധികൃതര് അറിയിക്കുകയായിരുന്നു.
തുടര്ന്ന് അര്ധരാത്രിയിൽ റെയില്വെ പൊലീസും താനൂര് പൊലീസും ട്രെയിൻ പോയ ട്രാക്കില് തെരച്ചിൽ നടത്തുകയായിരുന്നു. തെരച്ചിലിനിടെയാണ് ട്രാക്കിന് സമീപം പരിക്കേറ്റ നിലയിൽ സുകന്യയെ കണ്ടെത്തിയത്. തുടര്ന്ന് സുകന്യയെ ആംബുലന്സിൽ കയറ്റി തിരൂരങ്ങാടി താലൂക്ക് ആശുപത്രിയിലെത്തിച്ചു. പ്രാഥമിക ചികിത്സയ്ക്കുശേഷം പരിക്ക് ഗുരുതരമായതിനാൽ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റുകയായിരുന്നു. സുകന്യയുടെ തലയ്ക്കും മറ്റു ശരീരഭാഗങ്ങള്ക്കും പരിക്കേറ്റിട്ടുണ്ട്.