അലക്ഷ്യമായി പിന്നിലേക്കെടുത്ത കാർ തട്ടി യുവാവ് റോഡിൽ വീണു, പിന്നാലെയെത്തിയ ലോറി കയറി, സ്കൂട്ടർ യാത്രികന് ദാരുണാന്ത്യം

കിളിമാനൂർ ഭാഗത്തുനിന്നും പുതിയകാവിലേക്ക് സ്കൂട്ടറിൽ വരികയായിരുന്ന ശ്രീജുവിനെ, മാർക്കറ്റിന് സമീപത്തുവെച്ച് അലക്ഷ്യമായി പിന്നോട്ട് എടുത്ത കാർ തട്ടി വീഴ്ത്തുകയായിരുന്നു.

തിരുവനന്തപുരം: കാർ തട്ടി റോഡിൽ വീണ യുവാവ് എതിർദിശയിൽ നിന്നുവന്ന ലോറിക്കടിയിൽപ്പെട്ട് മരണപ്പെട്ടു. ചെങ്കിക്കുന്ന് പ്ലാവിള വീട്ടിൽ നിന്നും നഗരൂർ നെയ്ത്തുശാല നെല്ലിക്കുന്ന് വീട്ടിൽ വാടകയ്ക്ക് താമസിക്കുന്ന ശ്രീജു (27) ആണ് മരിച്ചത്. വെള്ളിയാഴ്ച രാത്രി 10.30 ഓടെ പുതിയകാവ് മാർക്കറ്റിന് സമീപമായിരുന്നു അപകടം നടന്നത്. കിളിമാനൂർ ഭാഗത്തുനിന്നും പുതിയകാവിലേക്ക് സ്കൂട്ടറിൽ വരികയായിരുന്ന ശ്രീജുവിനെ, മാർക്കറ്റിന് സമീപത്തുവെച്ച് അലക്ഷ്യമായി പിന്നോട്ട് എടുത്ത കാർ തട്ടി വീഴ്ത്തുകയായിരുന്നു.

അപകടത്തിൽ സ്കൂട്ടറിൽ നിന്നും തെറിച്ച് റോഡിലേക്ക് വീണ ശ്രീജുവിന്‍റെ തലയിലൂടെയാണ് എതിർദിശയിൽ നിന്ന് വന്ന ലോറി കയറിയത്. അപകടമുണ്ടാക്കിയ കാർ നിറുത്താതെ പോയെന്ന് നാട്ടുകാർ പറയുന്നു. അപകടസ്ഥലത്തുവെച്ചുതന്നെ ശ്രീജു മരണപ്പെട്ടു. വിവരമറിഞ്ഞ പൊലീസെത്തി മേൽനടപടികൾ സ്വീകരിച്ചു. അപകടമുണ്ടാക്കിയ കാറിനായി അന്വേഷണം പുരോഗമിക്കുകയാണ്. പ്രദേശത്തെ സിസിടിവി ദൃശ്യങ്ങൾ പൊലീസ് ശേഖരിച്ചിട്ടുണ്ട്.