കുടുംബവുമൊത്ത് ഒരു അവധിക്കാല യാത്രയാണോ? ബുക്കിങ്ങില്‍ പണം ലാഭിക്കാന്‍ ഇതാ ചില വഴികള്‍

കുടുംബത്തോടൊപ്പമുള്ള അവധിക്കാല യാത്രകളിൽ വലിയ തുക ലാഭിക്കാൻ സഹായിക്കുന്ന ചില കാര്യങ്ങൾ ശ്രദ്ധിക്കാം. വിമാന ടിക്കറ്റുകളിലെയും ഹോട്ടൽ ബുക്കിങ്ങുകളിലെയും ഹിഡൻ ചാർജുകൾ തിരിച്ചറിയാനും, യാത്രാ തീയതികളിൽ മാറ്റം വരുത്തിയും മികച്ച പ്ലാനിങ്ങിലൂടെയും ബഡ്ജറ്റ് കുറയ്ക്കാനും ഈ വിവരങ്ങൾ സഹായിക്കും.

കുടുംബത്തോടൊപ്പം ഒരു അവധിക്കാല യാത്ര പ്ലാന്‍ ചെയ്യുകയാണോ? വിമാന ടിക്കറ്റ്, ഹോട്ടല്‍ മുറികള്‍, ലഗേജ്, ഭക്ഷണം, യാത്രാച്ചെലവുകള്‍ എന്നിവയെല്ലാം കൂട്ടുമ്പോള്‍ യാത്രയുടെ ബഡ്ജറ്റ് പലപ്പോഴും നമ്മള്‍ ഉദ്ദേശിച്ചതിലും കൂടും. ബുക്കിങ്ങിനായി നെറ്റില്‍ തിരയുമ്പോള്‍ ആദ്യം കാണുന്ന കുറഞ്ഞ നിരക്ക് കണ്ട് പെട്ടെന്ന് ബുക്ക് ചെയ്യുന്നവരാണ് നമ്മളില്‍ പലരും. എന്നാല്‍ അല്പം ക്ഷമ കാണിച്ചാല്‍ വലിയ തുക ലാഭിക്കാനാകും. സ്‌ക്രീനില്‍ കാണുന്ന ഏറ്റവും ചെറിയ തുകയ്ക്ക് പിന്നാലെ പോകാതെ, യാത്രയുടെ മൊത്തം ചെലവ് താരതമ്യം ചെയ്യുകയാണ് എപ്പോഴും നല്ലത്. ഇതിനായി ശ്രദ്ധിക്കേണ്ട ചില കാര്യങ്ങള്‍ താഴെ പറയുന്നവയാണ്.

യാത്രാ തീയതികളില്‍ മാറ്റം വരുത്താം

യാത്ര തിരിക്കുന്ന തീയതി കൃത്യമായി മുന്‍കൂട്ടി തീരുമാനിക്കാതെ, രണ്ടോ മൂന്നോ ദിവസങ്ങളിലെ വിമാന നിരക്കുകള്‍ കൂടി പരിശോധിക്കുന്നത് ഗുണം ചെയ്യും. ഇതിനായി ഗൂഗിള്‍ ഫ്‌ലൈറ്റ്‌സിലെ കലണ്ടര്‍, പ്രൈസ് ഗ്രാഫ് ഫീച്ചറുകള്‍ ഉപയോഗിക്കാം. നിരക്കുകളില്‍ വലിയ മാറ്റം വരുമ്പോള്‍ അലേര്‍ട്ടുകള്‍ നല്‍കുന്ന പ്രൈസ് ട്രാക്കിങ് സംവിധാനവും ഇതിലുണ്ട്. വാരാന്ത്യങ്ങള്‍, അവധി ദിവസങ്ങള്‍, തിരക്കുള്ള സമയങ്ങള്‍ എന്നിവയ്ക്ക് തൊട്ടുമുമ്പോ ശേഷമോ ഉള്ള ദിവസങ്ങളിലേക്ക് യാത്ര മാറ്റുന്നത് വലിയ സാമ്പത്തിക ലാഭം നല്‍കിയേക്കാം. അതുപോലെ അടുത്തുള്ള മറ്റ് എയര്‍പോര്‍ട്ടുകളിലെ നിരക്കും പരിശോധിക്കുക. എന്നാല്‍ അവിടേക്ക് എത്താനുള്ള യാത്രാച്ചെലവ് ടിക്കറ്റില്‍ ലഭിക്കുന്ന ലാഭത്തേക്കാള്‍ കൂടുതലാണെങ്കില്‍ ഈ മാറ്റം ഒഴിവാക്കണം.

ടിക്കറ്റ് നിരക്ക് മാത്രം നോക്കിയാല്‍ പോരാ

4,999 രൂപയ്ക്ക് കാണുന്ന വിമാന ടിക്കറ്റിന് സീറ്റ് സെലക്ഷനും ലഗേജ് ഫീസും മറ്റ് നിരക്കുകളും കൂടി വരുമ്പോള്‍ ഈ തുകയായിരിക്കില്ല നല്‍കേണ്ടി വരിക. കുറഞ്ഞ നിരക്കിലുള്ള ടിക്കറ്റുകള്‍ തിരഞ്ഞെടുക്കുമ്പോള്‍ സ്വന്തമായി ലഗേജ് കൈകാര്യം ചെയ്യുകയോ മറ്റ് എയര്‍പോര്‍ട്ടുകളില്‍ ഇറങ്ങേണ്ടി വരുന്നതോ ആയ ബുദ്ധിമുട്ടുകള്‍ ഉണ്ടാകാമെന്ന് ഗൂഗിള്‍ ഫ്‌ലൈറ്റ്‌സ് തന്നെ മുന്നറിയിപ്പ് നല്‍കുന്നുണ്ട്. പണം നല്‍കുന്നതിന് മുന്‍പ് ലഗേജ്, സീറ്റ് തുടങ്ങിയ നിങ്ങളുടെ ആവശ്യങ്ങള്‍ക്കുള്ള തുക കൂടി ഉള്‍പ്പെടുത്തി വേണം എയര്‍ലൈനുകളുടെ നിരക്കുകള്‍ താരതമ്യം ചെയ്യാന്‍. ചിലപ്പോള്‍ അടിസ്ഥാന നിരക്ക് അല്പം കൂടുതലുള്ള ടിക്കറ്റുകളാകും ഇതെല്ലാം കൂട്ടുമ്പോള്‍ ഏറ്റവും ലാഭകരമായി മാറുക.

വിമാനക്കമ്പനികളുടെ നിയമങ്ങള്‍ അറിയണം

യാത്രയുടെ കാര്യത്തില്‍ ഉറപ്പില്ലാത്ത അവസ്ഥയാണെങ്കില്‍ ടിക്കറ്റ് റദ്ദാക്കാനും മാറ്റാനുമുള്ള സൗകര്യമുള്ള ടിക്കറ്റുകള്‍ ബുക്ക് ചെയ്യുന്നതാണ് നല്ലത്. ഇതിന് അല്പം തുക കൂടുതല്‍ നല്‍കേണ്ടി വന്നാലും ഭാവിയില്‍ ഇത് ഗുണം ചെയ്യും. വിമാനക്കമ്പനികള്‍ ലഗേജ്, ടിക്കറ്റ് റദ്ദാക്കല്‍, തീയതി മാറ്റല്‍ തുടങ്ങിയവയ്ക്ക് വ്യത്യസ്ത നിരക്കുകളാണ് ഈടാക്കുന്നത്. ഉദാഹരണത്തിന്, എയര്‍ ഇന്ത്യയുടെ ഇപ്പോഴത്തെ ടിക്കറ്റ് നിരക്കുകളില്‍ ഓരോ തരം ടിക്കറ്റിനും വ്യത്യസ്ത റദ്ദാക്കല്‍ ഫീസും തീയതി മാറ്റാനുള്ള ചാര്‍ജുകളുമാണുള്ളത്.

ഹോട്ടല്‍ ബുക്കിങ്ങിലും വേണം ശ്രദ്ധ

ഹോട്ടല്‍ വെബ്‌സൈറ്റുകളിലും ബുക്കിങ് ആപ്പുകളിലും കാണുന്ന ആകര്‍ഷകമായ കുറഞ്ഞ വാടക കണ്ട് മാത്രം റൂമുകള്‍ ബുക്ക് ചെയ്യരുത്. നികുതി, മറ്റ് ഫീസുകള്‍, ഭക്ഷണം എന്നിവയെല്ലാം ഉള്‍പ്പെടുമ്പോള്‍ അവസാനം നല്‍കേണ്ട തുക വര്‍ധിക്കും. അതിനാല്‍ ആദ്യം കാണുന്ന തുകയ്ക്ക് പകരം, മുഴുവന്‍ ദിവസത്തേക്കുമായി അവസാനം നല്‍കേണ്ടി വരുന്ന തുക താരതമ്യം ചെയ്യുക. മുറി കാന്‍സല്‍ ചെയ്യാനുള്ള നിബന്ധനകളും ശ്രദ്ധിക്കണം. ബുക്കിങ് റദ്ദാക്കിയാല്‍ പണം തിരികെ ലഭിക്കാത്ത മുറികള്‍ക്ക് വാടക കുറവായിരിക്കുമെങ്കിലും, യാത്ര മുടങ്ങിയാല്‍ ആ പണം മുഴുവന്‍ നഷ്ടമാകും. യാത്രയുടെ കാര്യത്തില്‍ അല്പം സംശയമുണ്ടെങ്കില്‍, ചെറിയ തുക അധികം നല്‍കിയാലും ബുക്കിങ് മാറ്റാനും റദ്ദാക്കാനും സാധിക്കുന്ന ഫ്‌ലെക്‌സിബിള്‍ റൂമുകള്‍ എടുക്കുന്നതാണ് സാമ്പത്തികമായി ബുദ്ധി.

താമസസ്ഥലം എവിടെയെന്ന് നോക്കണം

പ്രതിദിനം 1,500 രൂപ ലാഭം കിട്ടുന്ന ഹോട്ടലാണ് നിങ്ങള്‍ ബുക്ക് ചെയ്യുന്നതെങ്കില്‍ പോലും, അത് നിങ്ങള്‍ സന്ദര്‍ശിക്കാന്‍ ഉദ്ദേശിക്കുന്ന സ്ഥലങ്ങളില്‍ നിന്ന് ഏറെ അകലെയാണെങ്കില്‍ ഒരു പ്രയോജനവുമില്ല. അങ്ങോട്ടുള്ള ടാക്‌സി കൂലിയും എയര്‍പോര്‍ട്ടിലേക്കുള്ള യാത്രയും നിങ്ങളുടെ സമയവും പണവും നഷ്ടപ്പെടുത്തും. അതിനാല്‍ പ്രാദേശിക യാത്രകളും പ്രഭാതഭക്ഷണവും ഉള്‍പ്പെടെയുള്ള ചെലവുകള്‍ കണക്കാക്കി രണ്ടോ മൂന്നോ ഹോട്ടലുകള്‍ തമ്മില്‍ താരതമ്യം ചെയ്യുക. ഇന്ത്യയിലെ ഹോട്ടലുകളില്‍ ബുക്ക് ചെയ്യുമ്പോള്‍, സ്‌ക്രീനില്‍ കാണിക്കുന്ന തുകയില്‍ ജിഎസ്ടി ഉള്‍പ്പെട്ടിട്ടുണ്ടോ എന്ന് ഉറപ്പുവരുത്തുക. ജിഎസ്ടി കൗണ്‍സിലിന്റെ നിലവിലെ കണക്കുകള്‍ പ്രകാരം പ്രതിദിനം 7,500 രൂപ വരെയുള്ള ഹോട്ടല്‍ മുറികള്‍ക്ക് 12 ശതമാനവും അതിനുമുകളില്‍ 18 ശതമാനവുമാണ് നികുതി.

ഓഫറുകള്‍ക്ക് പിന്നാലെ മാത്രം പോകരുത്

ഡിസ്‌കൗണ്ട് കോഡുകള്‍, വാലറ്റ് ഓഫറുകള്‍, ലോയല്‍റ്റി പോയിന്റുകള്‍, കാര്‍ഡ് പ്രൊമോഷനുകള്‍ എന്നിവയെല്ലാം ചെലവ് കുറയ്ക്കാന്‍ സഹായിക്കും. എന്നാല്‍ ഒരു ഓഫര്‍ ഉപയോഗിക്കാന്‍ വേണ്ടി മാത്രം നിങ്ങളുടെ യാത്രയുടെ തീയതിയോ സ്ഥലമോ മാറ്റരുത്. കേവലം 2,000 രൂപയുടെ ഡിസ്‌കൗണ്ട് കിട്ടുമെന്ന് കരുതി ആവശ്യമില്ലാത്ത ഒരു 20,000 രൂപയുടെ ബുക്കിങ് നടത്തുന്നത് സാമ്പത്തിക ലാഭമല്ല.