ഫോം 16 ലഭിച്ചോ? ശ്രദ്ധിക്കുക, ഈ വിവരങ്ങൾ പരിശോധിക്കാതെ ഐടിആർ ഫയൽ ചെയ്യരുത്

എന്തുകൊണ്ടാണ് ഫോം-16 ഇത്ര പ്രാധാന്യമർഹിക്കുന്നത്? ഇനി ഫോം 16 കയ്യിൽ കിട്ടിയാൽ എന്തൊക്കെ കാര്യങ്ങളാണ് പരിശേധിക്കേണ്ടത്?

നികുതിദായകർ ആദായനികുതി റിട്ടേണുകൾ ഫയൽ ചെയ്ത് തുടങ്ങിയിട്ടുണ്ട്. തൊഴിലുടമകളിൽ നിന്നും ജീവനക്കാർക്ക് ഫോം-16 ഇതിനകംതന്നെ ലഭിച്ചിട്ടുണ്ടാകും. എന്താണ് ഫോം 16? 1961 ലെ ആദായനികുതി നിയമത്തിലെ സെക്ഷൻ 203 പ്രകാരം ശമ്പളം വാങ്ങുന്ന പ്രൊഫഷണലുകൾക്ക് അവരുടെ തൊഴിലുടമകൾ നൽകുന്ന ഒരു രേഖയാണ് ഫോം 16. ഒരു സാമ്പത്തിക വർഷത്തിൽ ജീവനക്കാരന് സ്ഥാപനമോ തൊഴിലുടമയോ നൽകുന്ന ശമ്പളത്തെക്കുറിച്ചും ശമ്പളത്തിൽ നിന്നും നീക്കം ചെയ്ത ആദായനികുതിയെക്കുറിച്ചുമുള്ള മുഴുവൻ വിശദാംശങ്ങളും ഫോമിൽ അടങ്ങിയിരിക്കുന്നു. ആദായനികുതി നിയമപ്രകാരം, ഓരോ തൊഴിലുടമയും, ശമ്പളം നൽകുന്ന സമയത്ത്, ആ സാമ്പത്തിക വർഷത്തിൽ പ്രാബല്യത്തിലുള്ള ആദായനികുതി സ്ലാബ് നിരക്കുകളുടെ അടിസ്ഥാനത്തിൽ കണക്കാക്കുന്ന നികുതി കുറയ്ക്കേണ്ടതുണ്ട്

ഇനി ഫോം 16 കയ്യിൽ കിട്ടിയാൽ എന്തൊക്കെ കാര്യങ്ങളാണ് പരിശേധിക്കേണ്ടത്?

ഫോം-16 കൃത്യമായി എല്ലാ കാര്യങ്ങളും പരാമർശിച്ചിട്ടുണ്ടോ എന്ന് പരിശോധിക്കുക. ഐടിആർ ഫയൽ ചെയ്യുന്നതിന് മുൻപ് ഈ 5 കാര്യങ്ങൾ പരിഗണിക്കുക.

പരിഗണിക്കേണ്ട പ്രധാന പോയിന്റുകൾ:

1. നിങ്ങളുടെ പാൻ നമ്പറിന്റെ കൃത്യത ഉറപ്പാക്കുക.

2. ഫോം-16-ൽ പരാമർശിച്ചിരിക്കുന്ന നിങ്ങളുടെ പേരും വിലാസവും കമ്പനിയുടെ ടാക്സ് ഡിഡക്ഷൻ ആൻഡ് കളക്ഷൻ അക്കൗണ്ട് നമ്പറും (TAN) പരിശോധിച്ചുറപ്പിക്കുക.

3. ഫോം-26എഎസും വാർഷിക വിവര പ്രസ്താവനയും (എഐഎസ്) ഉപയോഗിച്ച് ഫോം-16ൽ പറഞ്ഞിരിക്കുന്ന നികുതി കിഴിവുകൾ ക്രോസ്-ചെക്ക് ചെയ്യുക.

4. നിങ്ങൾ പഴയ നികുതി വ്യവസ്ഥയാണ് തിരഞ്ഞെടുത്തതെങ്കിൽ, നികുതി ലാഭിക്കുന്ന കിഴിവുകളുടെ വിശദാംശങ്ങൾ സൂക്ഷ്മമായി അവലോകനം ചെയ്യുക.

5. 2024-25 സാമ്പത്തിക വർഷത്തിൽ നിങ്ങൾ ജോലി മാറിയെങ്കിൽ, നിങ്ങളുടെ മുൻ തൊഴിലുടമയിൽ നിന്നും ഫോം-16 ലഭിച്ചിട്ടുണ്ടെന്ന് ഉറപ്പാക്കുക.