വയനാട്ടില് രാഹുലിന്റെ തീരുമാനം വൈകുന്നു; കോൺഗ്രസ് കേന്ദ്രതെരഞ്ഞെടുപ്പ് സമിതി യോഗം നാളെ
Synopsis
രാഹുല് വയനാട്ടില് മത്സരിക്കുന്ന കാര്യത്തില് എഐസിസിയില് ആശയക്കുഴപ്പം നിലനില്ക്കുന്നതായാണ് സൂചന
ദില്ലി: കോണ്ഗ്രസ് അധ്യക്ഷന് രാഹുല് ഗാന്ധി ലോക്സഭാ തെരഞ്ഞെടുപ്പില് വയനാട്ടില് നിന്നും മത്സരിക്കുന്നകാര്യത്തില് പാര്ട്ടി നാളെ തീരുമാനമെടുത്തേക്കും. നാളെ ദില്ലിയില് ചേരുന്ന കോണ്ഗ്രസ് കേന്ദ്ര തെരഞ്ഞെടുപ്പ് സമിതിയോഗത്തില് ഇതു സംബന്ധിച്ച അന്തിമതീരുമാനമുണ്ടാവും എന്നാണ് പ്രതീക്ഷിക്കുന്നത്.
രാഹുല് വയനാട്ടില് മത്സരിക്കുന്ന കാര്യത്തില് എഐസിസിയില് ആശയക്കുഴപ്പം നിലനില്ക്കുന്നതായി നേരത്തെ സൂചനകളുണ്ടായിരുന്നു. രാഹുല് ഗാന്ധിയുടെ സ്ഥാനാര്ത്ഥിത്വം സംബന്ധിച്ച വിഷയത്തില് അന്തിമതീരുമാനം ഇന്നലെ വൈകിട്ടോടെ ഉണ്ടാവും എന്നാണ് എഐസിസി ജനറല് സെക്രട്ടറി ഉമ്മന് ചാണ്ടി നേരത്തെ അറിയിച്ചിരുന്നത്.
പശ്ചിമബംഗാളില് പ്രചാരണത്തിന് പോയ രാഹുല് ദില്ലിയില് തിരിച്ചെത്തിയാല് ഉടന് വയനാട് സീറ്റില് മത്സരിക്കുന്ന കാര്യത്തില് അന്തിമതീരുമാനം എടുക്കുമെന്നായിരുന്നു നേരത്തെ എഐസിസി വൃത്തങ്ങള് അറിയിച്ചിരുന്നത്. എന്നാല് ദില്ലിയില് തിരിച്ചെത്തിയ രാഹുലിന്റെ സാന്നിധ്യത്തില് നടന്ന ചര്ച്ചകളില് ഇക്കാര്യത്തില് വിഭിന്ന അഭിപ്രായം എഐസിസിയില് ഉണ്ടായി എന്നാണ് ഇപ്പോള് പുറത്തു വരുന്ന വിവരം.
കേരളത്തില് പ്രധാനമായും മത്സരം നടക്കുന്നത് ഇടതുപക്ഷവും യുപിഎയും തമ്മിലാണെന്നും അത്തരമൊരു സംസ്ഥാനത്ത് രാഹുല് മത്സരിച്ചാല് പ്രതിപക്ഷ ഐക്യം എന്ന ആശയത്തെ ചോദ്യം ചെയ്യാന് ഇടയാക്കിയേക്കാം എന്നും അദ്ദേഹത്തോട് അടുപ്പമുള്ള ചില നേതാക്കള് അഭിപ്രായപ്പെട്ടതായാണ് സൂചന. ബിജെപി ശക്തമല്ലാത്ത കേരളത്തില് മത്സരിക്കാതെ മറ്റൊരു സംസ്ഥാനത്ത് മത്സരിക്കുന്നതാവും നല്ലതെന്ന നിര്ദേശവും ചര്ച്ചകളില് ഉയര്ന്നു.